މާސްޓާސް ކިޔަވަން ޖަޕާނު ސަރުކާރުން ދޭ ސްކޮލާޝިޕަށް ހުޅުވާލައިފި

ޖަޕާނު ސަރުކާރުން ދޭ، ދަ ޕްރޮޖެކްޓް ފޯ ހިއުމަން ރިސޯސަސް ޑިވެލޮޕްމަންޓް ސްކޮލާޝިޕް (ޖޭޑީއެސް) ގައި ބައިވެރިވުމުގެ ފުރުސަތު ހުޅުވާލައިފި އެވެ.

މި ސްކޮލާޝިޕްގެ ދަށުން އަހަރަކު ހަ ފުރުސަތު ދެ އެވެ. މި ސްކޮލާޝިޕުގައި ކޮންމެ ޔުނިވާސިޓީއަކުން ފުރުސަތު ދޭނީ ދެ ފަރާތަކަށެވެ. މި ސްކޮލާޝިޕްގައި ކިޔެވުމުގެ ހުރިހާ ހަރަދަކާއި ދަތުރުގެ ހަރަދުތަކުގެ އިތުރުން، ޖަޕާނުގައި ދިރިއުޅުމާއި އެނބުރި ރާއްޖެ އައުމުގެ ހުރިހާ ހަރަދެއް ވެސް ދޭނީ ޖަޕާނު ސަރުކާރުންނެވެ.

މި ސްކޮލާޝިޕަކީ ސަރުކާރުގެ އިދާރީ ހިންގުމަށް ބޭނުންވާ އިންސާނީ ވަސީލަތް ތަރައްގީކުރުމަށް އެހީތެރިވެދިނުމުގެ ގޮތުން އެކި އިދާރާތަކުގެ މުވައްޒަފުންނަށް މާސްޓާސް ޑިގްރީއަށް ތައުލީމު ހާސިލުކުރުމަށް ދޭ ފުރުސަތެކެވެ. އަދި މިއީ، އެ މުވައްޒަފުންނަކީ ގައުމުގެ އިޖުތިމާއީ އަދި އިގުތިސާދީ ތަރައްގީގެ ޕްލޭންތައް އެކުލަވާލުމުގައި ފުރިހަމައަށް ބައިވެރިވާ، ގައުމީ ތަރައްގީގައި އިސްދައުރެއް އަދާކުރާނެ ބަޔަކަށް ހެދުމުގެ މަގުސަދުގައި މަތީ ތައުލީމު ހާސިލްކުރުމަށް ދޭ ފުރުސަތެކެވެ.

ޖަޕާނު ސަރުކާރުން 2020 ވަނަ އަހަރުން ފެށިގެން ދެމުން އަންނަ މި ސްކޮލާޝިޕްގައި މި އަހަރު ފުރުސަތު ހުޅުވާލާފައި ވަނީ:

- އިންޓަނޭޝަނަލް ޔުނިވާސިޓީ އޮފް ޖަޕާން (އައިޔޫޖޭ)އިން މާސްޓާ އޮފް އާޓްސް އިން އިކޮނޮމިކްސް ނުވަތަ މާސްޓާ އޮފް އާޓްސް އިން އިންޓަނޭޝަނަލް ޑިވެލޮޕްމަންޓް ކިޔެވުމުގެ ފުރުސަތު

- ރިޓްސުމެއިކަން ޔުނިވާސިޓީއިން މާސްޓާ އޮފް އާޓްސް އިން އިންޓަނޭޝަނަލް ރިލޭޝަންސް ކިޔެވުމުގެ ފުރުސަތު

- ރިޓްސުމެއިކަން އޭޝިއާ ޕެސިފިކް ޔުނިވާސިޓީ (ރިޓްސުމެއިކަން އޭޕީޔޫ) އިން މާސްޓާ އޮފް ސައިންސް އިން އިންޓަނޭޝަނަލް ކޯޕަރޭޝަން ޕޮލިސީ ކިޔެވުމުގެ ފުރުސަތު

ހަމައެކަނި ދިވެހިންނަށް ފުރުސަތު ދޭ މި ސްކޮލާޝިޕްގައި އެޕްލިކޭޝަން ހުށަހެޅޭނީ 2025 ވަނަ އަހަރުގެ އޭޕްރިލް މަހުގެ އެއް ވަނަ ދުވަހާ ހަމައަށް 22 އަހަރު ފުރިފައިވާ އަދި 39 އަހަރު ނުފުރޭ މީހުންނަށެވެ.

ސްކޮލާޝިޕަށް ހުށަހަޅާ ފަރާތްތަކަކީ ދިވެހި ސަރުކާރުން ބަލައިގަންނަ ބެޗްލާސް ޑިގްރީއެއް އޮންނަ ސިވިލް ސާވިސްގައި މަސައްކަތް ކުރާ މުވައްޒަފުންނާއި މިނިވަން މުވައްސަސާތަކުގެ ދާއިމީ މުވައްޒަފުންނާއި ކޯޓުތަކާއި ކޯޓުތަކާއި ގުޅުން ހުރި އިދާރާތަކުގެ ދާއިމީ މުވައްޒަފުންނެވެ. އަދި މި ފަރާތްތަކަކީ މަދުވެގެން ދެ އަހަރުގެ މަސައްކަތުގެ ތަޖުރިބާ ހުރި ފުލް ޓައިމްކޮށް މިހާރު މަސައްކަތްކުރާ މުވައްޒަފުންނަށް ވާން ޖެހެ އެވެ.

މި ސްކޮލާޝިޕަށް އެދި ހުށަހަޅާ ފަރާތްތަކަށް ޖޭޑީއެސްގެ ފަރާތުން ޕްރޮމޯޝަން ސެމިނާތައް ބޭއްވުމަށް ވަނީ ހަމަޖެހިފަ އެވެ. މި ސެމިނާތަކުން ސްކޮލާޝިޕުގެ ތަފްސީލީ މައުލޫމާތާއި އެޕްލިކޭޝަން ޑޮކިއުމަންޓްތައް ތައްޔާރުކުރާނެ ގޮތުގެ ތަފްސީލީ މައުލޫމާތުތަކާއި ފޯމު ހުށަހެޅުމުގެ މައުލޫމާތުތައް ބައިވެރިންނަށް ހިއްސާކުރާނެ އެވެ.

މި ސްކޮލާޝިޕުގައި ބައިވެރިވާން ބޭނުންވާ ފަރާތްތަކަށް ނޮވެމްބަރު މަހުގެ 24 ވަނަ ދުވަހުގެ 16:00 ގެ ނިޔަލަށް އޮންލައިންކޮށް އެޕްލިކޭޝަން ހުށަހެޅޭނެ އެވެ. މި ސްކޮލާޝިޕާއި ގުޅޭ އިތުރު މައުލޫމާތު https://jds-scholarship.org/country/maldives/index.html ލިންކުން ލިބޭނެ އެވެ.

ޖަޕާން ސަރުކާރުން 2020 ވަނަ އަހަރު ފެށި ފަހުން ޖޭޑީއެސް ސްކޮލާޝިޕްގެ ދަށުން މިހާތަނަށް 21 ފަރާތަކަށް ޖަޕާނުގައި ކިޔެވުމުގެ ފުރުސަތު ވަނީ ދީފަ އެވެ. އޭގެ ތެރެއިން 12 ދަރިވަރުން ވަނީ މާސްޓާސް ޑިގްރީ ފުރިހަމަކޮށް އެނބުރި ރާއްޖެ އައިސްފަ އެވެ.