އައިޖީއެމްއެޗްގެ ކިއު ކުޑަވާނީ ސްޕެޝަލިޓީގެ އިތުރު ހޮސްޕިޓަލްތައް އަޅައިގެން: ނާޒިމް

ސަރުކާރުގެ މައި ހޮސްޕިޓަލަށް ބާރު ކުޑަކުރެވޭނީ ސްޕެޝަލިޓީ ހިދުމަތް ދޭ އިތުރު ތަންތަން އަޅައިގެން ކަމަށް ހެލްތު މިނިސްޓަރު އަބްދުﷲ ނާޒިމް އިބްރާހިމް އިއްޔެ ވިދާޅުވެއްޖެ އެވެ.

"މިހާރު" އަށް ދެއްވި އިންޓަވިއުގައި ނާޒިމް ވިދާޅުވީ، ކެންސަރާއި ތެލެސީމިއާ އަށް ހާއްސަ ހޮސްޕިޓަލެއް ރައީސް ޑރ. މުހައްމަދު މުއިއްޒުގެ ވެރިކަމުގެ މި ދައުރުގެ ތެރޭގައި އަޅާނެ ކަމަށެވެ. އޭގެ އިތުރުން ކުޑަކުދިންނާއި އަންހެނުންނަށް ފަރުވާ ދިނުމަށް ހާއްސަ ހޮސްޕިޓަލެއް އިމާރާތް ކުރުމުގެ ޕްލޭންތައް ކުރަމުން އަންނަ ކަމަށް މިނިސްޓަރު ވިދާޅުވި އެވެ.

އާއްމުންގެ އަބަދު ވެސް ޝަކުވާއަކީ ސްޕެޝަލިސްޓުންނަށް ދެއްކުމަށް އޮންނަ ކިއު ދިގުވުން ކަމަށާއި އެންމެން ވެސް ބޭނުންވަނީ އައިޖީއެމްއެޗަށް ދައްކަން ކަމަށް އޭނާ ވިދަޅުވި އެވެ. ނަމަވެސް، އެކި ބަލިތަކަށް ހާއްސަ ހޮސްޕިޓަލްތައް އިމާރާތްކުރުމުން ސިއްހީ ދާއިރާ އަށް ހެޔޮ ބަދަލުތައް އަންނާނެ ކަން ފާހަގަކުރެއްވި އެވެ.

ސަރުކާރުން ވަނީ ހުޅުމާލޭގައި ތެލެސީމިއާ ހޮސްޕިޓަލެއް އަޅަން ސޮއިކޮށްފަ އެވެ. ކެންސަރު ހޮސްޕިޓަލަށް ހާއްސަކޮށް އައިޖީއެމްއެޗް ސަރަހައްދުގައި 25 ބުރީގެ ހޮސްޕިޓަލެއް އެޅުމުގެ ޕްލޭންތައް ވެސް ބާރު ސްޕީޑުގައި ކުރަމުން އަންނަ ކަމަށް ވަނީ ބުނެފަ އެވެ.

"ސްޕެޝަލިސްޓް ހޮސްޕިޓަލްތައް އައީމަ، އެއާ ގުޅޭ ތަންތަނަށް ރިފާ ކުރެވުނީމަ މި ކްރިއޭޓް ވަނީ އިތުރު ސްޕޭސް. މިއީ ސިމްޕަލް ލޮޖިކް. އެ ތަނުން [އައިޖީއެމްއެޗުގައި] ޖާގައެއް ކްރިއޭޓްވަނީ، ކްރިއޭޓްވީމަ އަޅުގަނޑުމެންނަށް ހިތްހަމަޖެހިގެން ރައްޔިތުންނަށް އެހެނިހެން ކަންކަން ކޮށްދެވޭނެ. އިތުރު ބެޑްސް ވެސް އެ ތަނުގައި ހުޅުވިގެންދާނެ،" ސްޕެޝަލިސްޓް ހޮސްޕިޓަލްތަކާ އެކު ލިބޭނެ ފަސޭހަތަކަށް އިޝާރާތް ކުރައްވަމުން ނާޒިމް ވިދާޅުވި އެވެ.

"ކުޑަކުދިންގެ ހޮސްޕިޓަލެއް އުފެދުނީމަ ކުޑަކުދިން އެތަނަށް [އައިޖީއެމްއެޗަށް] ލާން ނުޖެހިއްޖެއްޔާ އިތުރު ބޮޑެތި މީހުންނަށް ޖާގަ ލިބޭނެ."

ހެލްތު މިނިސްޓަރު ނާޒިމް "މިހާރު"އަށް އިއްޔެ އިންޓަވިއު ދެއްވަނީ.-- ފޮޓޯ: ފަޔާޒު މޫސާ/ މިހާރު

އައިޖީއެމްއެޗްގައި ކާޑިއެކް ސެންޓަރާއި ނެޝަނަލް ޔޫރޯ ރީނަލް އެންޑް ފާޓިލިޓީ ސެންޓަރު ހުޅުވީ، ނާޒިމްގެ ވެސް ބައިވެރިވުން އޮތް ކުރީގެ ރައީސް އަބްދުﷲ ޔާމީންގެ ވެރިކަމުގަ އެވެ.

އޭނާ ވިދާޅުވީ އެ ދެ ސެންޓަރާއެކު ހިތާއި ކިޑްނީގެ ބައްޔަށް ފަރުވާ ހޯދަން ބޭރަށް ދިއުން ވަރަށް ބޮޑު ތަނުން ކުޑަ ވެފައިވާ ކަމަށެވެ.

އެ އުސޫލުން، ޑޮކްޓަރުން ލިބޭ ވަރާއި ރާއްޖޭގެ ސިއްހީ ދާއިރާ ކުރިއަރަމުން އަންނަ ވަރަކަށް ފަރުވާއަށް ބޭރަށް ދާ މީހުންގެ އަދަދު މަދުވާނެކަން އޭނާ ފާހަގަކުރެއްވި އެވެ. ނަމަވެސް، ދުނިޔޭގައި ވަރަށް ބާރު ސްޕީޑުގައި އާ އެހެން ބަލިތައް ދެނެގަތުމާއި ޓެކްނޮލޮޖީ ކުރިއަރަމުން އަންނަ ވަރަކަށް، ރާއްޖޭގެ ސިއްހީ ދާއިރާ ކުރިނާރައިފި ނަމަ ގޮންޖެހުންތައް ކުރިމަތިވާނެ ކަމަށް ވެސް ނާޒިމް ވިދާޅުވި އެވެ.

ސަރުކާރުގެ މައި ހޮސްޕިޓަލްގެ ސްޕެޝަލިސްޓުންނަށް ދައްކަން އޮންނަ ކިއު ދިގުވުމުގެ ޝަކުވާ އަބަދުވެސް ބޮޑެވެ. އެހެންވެ، އެކަމަށް ހައްލެއް ގެންނަން އައިޖީއެމްއެޗުން ވަނީ މާލޭގެ ހަތަރު އަވަށުގައި ޖީޕީ ކްލިނިކް ހަދައި ރިފަރަލް ސިސްޓަމަށް ދާން ނިންމައިފަ އެވެ.