ތަފާތު ބޮޑުކޮށް ޓްރަމްޕް އަލުން ވެރިކަމަށް

އެމެރިކާގެ ކުރީގެ ރައީސް ޑޮނަލްޑް ޓްރަމްޕް ރިޔާސީ އިންތިހާބު ކާމިޔާބު ކުރައްވައި، ރިޔާސީ ދެވަނަ ދައުރު ކަށަވަރު ކުރައްވައިފި އެވެ.

ރިޔާސީ އިންތިހާބުގައި ޑިމޮކްރެޓްސްގެ ކެންޑިޑޭޓް އަދި މިހާރު ނައިބު ރައީސް ކަމަލާ ހެރިސްއާ ވާދަކުރައްވައި، އުމުރުން 78 އަހަރުގެ ޓްރަމްޕް އިންތިހާބު ކާމިޔާބު ކުރެއްވީ 277 އިލެކްޓޯރަލް ވޯޓުންނެވެ. ކަމަލާއަށް ލިބިވަޑައިގަތީ 224 އިލެކްޓޯރަލް ވޯޓެވެ.

މިއީ އެމެރިކާގައި ފަހުގެ ތާރީހެއްގައި ޖެހިޖެހިގެން ނޫން ގޮތަކަށް ރިޔާސީ ދެވަނަ ދައުރެއް ބޭފުޅަކު ކާމިޔާބު ކުރެއްވި ފުރަތަމަ ފަހަރެވެ. އަދި ޓްރަމްޕް ވާނީ ޖިނާއީ ކުށެއް ސާބިތުވެފައި ފުރަތަމަ ރައީސަށެވެ. ބަރަހަނާ ފިލްމު ކުޅޭ އަންހެނަކާ ބޭއްވި ނަހަމަ ގުޅުމެއްގެ ވާހަކަ ނުދެއްކުމަށް ޝަރުތުކޮށް ކެމްޕެއިން ފައިސާއިން އެކަމަށް ހަރަދުކޮށް އަދި އެކަން ސިއްރުކުރަން ވިޔަފާރީގެ ހިސާބުތައް އޮޅުވާލި ކަމުގެ ކުށް ޓްރަމްޕުގެ މައްޗަށް ވަނީ ސާބިތުވެފަ އެވެ.

އެކަމަކު އަދި އެ ކުށުގެ އަދަބު ކަނޑައެޅުން އޮތީ މި މަހަށް ތާވަލްކޮށްފަ އެވެ. ގާނޫނީ ތަޖުރިބާކާރުން ވިދާޅުވަނީ ޓްރަމްޕަށް ޖަލު ހުކުމެއްގެ ބަދަލުގައި އަންނާނީ ޖޫރިމަނާއެއް ކަމަށެވެ.

ޓްރަމްޕް ހޯއްދެވި ކާމިޔާބީއާ އެކު، ދުނިޔޭގެ ގިނަ ގައުމުތަކުން ވެރިން މިހާރު ގެންދަވަނީ އޭނާއަށް މަރުހަބާ ދަންނަވަމުންނެވެ.

ޑޮނަލްޑް ޓްރަމްޕާ ވާދަކުރެއްވި ނައިބު ރައީސް ކަމަލާ ހެރިސްގެ ސަޕޯޓަރުން މާޔޫސްކަމާ އެކު ނަތީޖާތައް ބަލަން މަޑުކޮށްލައިގެން. -- ފޮޓޯ: އޭއެފްޕީ

ޓްރަމްޕް ވާނީ އެމެރިކާގެ 47 ވަނަ ރައީސަށެވެ. ރިޔާސީ ދައުރު ފުރިހަމަކުރައްވައިފި ނަމަ އޭނާ ވެ ވަޑައިގަންނަވާނީ އެމެރިކާގެ ވެރިކަމުގައި އުމުރުން އެންމެ ދޮށީ ރައީސަށެވެ. މިހާރުގެ ރައީސް ޖޯ ބައިޑެންގެ އުމުރަކީ 81 އަހަރެވެ. ޓްރަމްޕް ވެރިކަމުގެ ހަތަރު އަހަރުގެ ދައުރު ނިންމަވާލައްވާއިރު އުމުރުން 82 އަހަރު ވާނެ އެވެ.

ޓްރަމްޕް އެންމެ ފުރަތަމަ ވެރިކަން ކުރެއްވީ ޖެނުއަރީ 20، 2017 އިން ޖެނުއަރީ 20، 2021 އަށެވެ. އެ ފަހަރު އިންތިހާބު ކާމިޔާބުކުރެއްވީ ވެސް އެމެރިކާގެ މަދު އަންހެން ރިޔާސީ ކެންޑިޑޭޓުންގެ ތެރޭގައި ހިމެނިވަޑައިގެންނެވި ހިލަރީ ކްލިންޓަނާ ވާދަކުރައްވަ އެވެ. ޓްރަމްޕްގެ މައްޗަށް ޖިނާއީ އެތައް ކުށެއްގެ ތުހުމަތުކޮށް ކޯޓާ ހިސާބަށް ގޮސްފައި ވާއިރު އޭގެ ތެރޭގައި ހިމެނެނީ މިހާރުގެ ރައީސް ބައިޑެންއާ ވާދަކުރައްވައި ނާކާމިޔާބީއާ ކުރިމަތިވެ ވަޑައިގަތުމުން އިންތިހާބުގެ ނަތީޖާ އަނބުރާލުމަށާއި ގައުމުގައި ހަމަނުޖެހުން އުފެއްދުމަށް ކުރި ކަންކަމާ އެވެ.

ޓްރަމްޕް މަގާމުގެ ހުވާކުރައްވާނީ އަންނަ އަހަރުގެ ޖެނުއަރީ މަހުގެ 20 ވަނަ ދުވަހު އެވެ.

ޓްރަމްޕް ރައީސްކަން ކާމިޔާބުކުރެއްވި އިރު، ގާނޫނު ހަދާ މަޖިލީހުގެ މަތިގެ، ސެނެޓްގެ އަޣުލަބިއްޔަތު ވެސް ޑިމޮކްރެޓްސްގެ އަތުން ޓްރަމްޕްގެ ރިޕަބްލިކަން އަށް ވަނީ ލިބިފަ އެވެ. ހައުސް އޮފް ކޮމަންސްގެ އަޣުލަބިއްޔަތު އަދި މިހާތަނަށް ސާފުކުރި ނަތީޖާއިން ކަށަވަރެއް ނުވެ އެވެ.