ޒަރީރަށް ހަމަލާދިން މައްސަލާގައި ގައްބަރޭ އާއި އިތުރު ދެ މީހުންނަށް ކުށް ސާބިތެއް ނުވި

ރައްޔިތުންގެ މަޖިލީހުގެ ކުރީގެ މެމްބަރު ހަސަން ޒަރީރަށް ހަމަލާދިން މައްސަލާގައި ދައުލަތުން ދައުވާ އުފުލި، އިބްރާހިމް އަބްދުﷲ (ގައްބަރޭ) އާއި އިތުރު ދެ މީހުންގެ މައްޗަށް ކުށް ސާބިތުނުވާ ކަމަށް ކްރިމިނަލް ކޯޓުން ހުކުމްކޮށްފި އެވެ.

މިދިޔަ އަހަރުގެ މެއި މަހުގެ ތެރޭގައި ޒަރީރަށް ހަމަލާ ދިނީ ޓީވީއެމް ކައިރީގައި ހުންނަ ހަބީބީ ކެފޭގައި އޭނާ އިންނަވަނިކޮށް މަރުތޭލަކުންނެވެ. އެ ހަމަލާގައި އޭނާގެ ބޮލަށް ވަރަށް ބޮޑަށް އަނިޔާވި އެވެ.

އެ މައްސަލައާ ގުޅިގެން ޕްރޮސިކިއުޓާ ޖެނެރަލްގެ އޮފީހުން ދައުވާކުރަން ފޮނުވީ ގައްބަރޭ އާއި ތ. ކިނބިދޫ، ދީފްރަމްގޭ އަހުމަދު އަވްޝަމާއި މ. ތާޖް މުލާއިމް މުހައްމަދުގެ މައްޗަށެވެ.

ނުރައްކާތެރި ހަތިޔާރު ބޭނުންކޮށްގެން މާރާމާރީ ހިންގުމުގެ ދައުވާ ގައްބަރޭ އަށް ކުރިއިރު އެ މައްސަލާގައި ދައުލަތުން ބުނެފައި ވަނީ ސައިކަލެއްގައި އޭނާ ކެފޭއަށް ގޮސް، ޒަރީރުގެ ގައިގައި އަތުންނާއި ފައިން ތަޅައި ޒަރީރުގެ ބޮލުގައި މަރުތޭލުން ޖަހައި ބޮލަށް ހަމަލާދީ، ހަތިޔާރެއް ބޭނުންކޮށްގެން މާރާމާރީ ހިންގާފައިވާ ކަމަށެވެ.

އެކަމަކު އެ ދައުވާއަށް އޭނާ އިންކާރުކުރެ އެވެ.

އެ މައްސަލަ ބެއްލެވި ކްރިމިނަލް ކޯޓުގެ އިސް ގާޒީ އާދަމް މުހައްމަދުގެ ހުކުމްގައި ވިދާޅުވީ ޕީޖީން ހުށަހެޅި އެއްވެސް ހެއްކެއްގެ ހެކި ބަހުން ގައްބަރޭ، ނުރައްކާތެރި ހަތިޔާރެއް ބޭނުންކޮށްގެން މާރާމާރީ ހިންގި ކަމަށް ބުނެފައި ނުވާ ކަމަށެވެ. ޒަރީރުގެ ހެކި ބަހުގައި ވެސް މާރާމާރީ ހިންގި މީހުންގެ ތެރޭގައި ގައްބަރޭ ނުހިމެނޭ ކަމަށް ކަނޑައެޅިގެން ބުނެފައިވާ ކަމަށާއި އެ ތަނުގައި އެވަގުތު އިން މީހަކާއި ސިއްރު ހެކީގައި ވެސް އޭނާ ނުހިމެނޭ ކަމަށް ބުނެފައިވާ ކަމަށް ހުކުމްގައިވެ އެވެ.

ހުކުމްގައި ބުނީ ދައުލަތުން ހުށަހެޅި ވީޑިއޯ އެންޑް އިމޭޖް އެނާލިސިސް ރިޕޯޓު ތައްޔާރުކުރި ފަރާތުން ވެސް ވަނީ ސީސީޓީވީ ފޫޓޭޖުން ފެންނަ ފަރާތަކީ ގައްބަރޭ ކަން ކަަށަވަރު ނުވާ ކަަމަށް ބުނެފައި ކަމަށެވެ. އެހެންވެ، އޭނާގެ މައްޗަށް ކުރާ އެ ދައުވާ ސާބިތު ނުވާ ކަމަށް ހުކުމްގައިވެ އެވެ.

އެ މައްސަލާގައި ބައިވެރިވި ކަމަށް އަވްޝަމާއި މުލާއިމްގެ މައްޗަށް ދައުވާއިރު އެ މީހުންގެ މައްޗަށް ކުރާ ދައުވާ ވެސް ސާބިތު ނުވާ ކަމަށް ވެސް ކޯޓުން ވަނީ ހުކުމްކޮށްފަ އެވެ.

އެ މީހުންނަށް ކުރި ހުކުމްގައި ވެސް ވަނީ ސީސީޓީވީ ފޫޓޭޖުން އެ ފެންނަނީ އެ މީހުންކަން ޔަގީން ނުކޮށްދެވޭ ކަމަށެވެ. އަދި ހެކި ބަސް ދިން މީހަކު ބުނާ ގޮތުގައި މާރާމާރީ ހިންގި މީހެއް ކަމަށް ބުނެ ވަކި މީހެއް ނަން ކުރިން ޒަރީރު ބުންޏަސް ފަހުން ވަނީ އެއީ ކޮން ބައެއްކަން ނޭނގޭ ކަމަށް ބުނެފަ އެވެ. އަދި އެކަމުގައި ސިއްރު ހެކި ދީފައިވާ ބައެއް މައުލޫމާތުތައް، އެހެން ހެކިންގެ ހެކިބަހާ ދިމާ ނުވާކަން ވެސް ފާހަގަކުރެ އެވެ.

Gabbarey aa dhekolhah Police ah Zareer dhevvi bayaan badhalu koffi

The most trusted news source in the Maldives

Mihaaru

އެ މައްސަލާގައި ބަޔާން ދެމުން ޒަރީރު ފުރަތަމަ ވިދާޅުވެފައި ވަނީ ހަމަލާދިނީ ގައްބަރޭ ކަމަށެވެ. އެކަމަކު ފަހުން ފުލުހުންނަށް ދިން ބަޔާން ބަދަލުކޮށް، އެއީ ގައްބަރޭ ކަން ޔަގީން ނުވާ ކަމަށް ވިދާޅުވެފައިވާ ފުލުހުން ބުނެފައިވެ އެވެ.

ބަޔާން ބަދަލުކުރީ އެކަމުގެ ތެރެއަށް ވަންނަން ބޭނުން ނުވާތީ ކަމަށް އޭނާ ވިދާޅުވި ކަމަށް ފުލުހުން ކޯޓުގައި ބުންޏެވެ.