ސަރުކާރު ކުންފުނިތަކުގެ ކޮރަޕްޝަން އަދިވެސް ނުހުއްޓޭ: ނާޒިމް

ސަރުކާރު ހިއްސާވާ ކުންފުނިތަކުގައި ކޮރަޕްޝަންގެ އަމަލުތައް އަދިވެސް ހިންގަމުންދާ ކަމަށް ރައްޔިތުންގެ މަޖިލީހުގެ ނައިބު ރައީސް އަދި ދިއްގަރު ދާއިރާގެ މެންބަރު އަހުމަދު ނާޒިމް މިއަދު ވިދާޅުވެއްޖެ އެވެ.

ރައްޔިތުންގެ މަޖިލިހުގެ މިއަދުގެ ޖަލްސާގައި، އަންނަ އަހަރަށް ލަފާ ކުރާ ދައުލަތުގެ ބަޖެޓާ ގުޅޭގޮތުން ވާހަކަ ދައްކަވަމުން ނާޒިމް ވިދާޅުވީ މިދިޔަ އަހަރު ސަރުކާރު ކުންފުނިތަކަށް 940 މިލިއަން ރުފިޔާ ހަރަދު ކޮށްފައިވާ ކަމަށެވެ. ނަމަވެސް އެ ކުންފުނިތައް އިސްލާހުވާ ތަނެއް އަދި ރަނގަޅުވާ ތަނެއް ނުފެންނަ ކަމަށް ނާޒިމް ވިދާޅުވި އެވެ.

އޭގެ އިތުރުން ކުންފުނިތަކުގެ ތެރޭގައި ހިންގާ ކޮރަޕްޝަންގެ އަމަލުތައް ވެސް ހުއްޓޭ މަންޒަރު ނުުފެންނަ ކަމަށް އޭނާ ވިދާޅުވި އެވެ. އަދި ކޮރަޕްޝަނާ ގުޅޭގޮތުން މީގެ ކުރިން ވެސް ފެންނަމުން ދިޔަ ސުރުހީތައް އަދިވެސް ފެންނަ ކަމަށް ނާޒިމް އޭނާ ވިދާޅުވި އެވެ.

"ސަރުކާރުގެ ކުންފުނިތަކުން ލޭ މަނާ ނުވޭ. [އެއީ] ލޭ އަންނަމުންދާ ވަރަށް ބޮޑު ޒަހަމެއް،" ނާޒިމް ވިދާޅުވި އެވެ.

އެ މައްސަލަތައް ހައްލު ކުރުމަށްޓަކައި ފިނޭންސް މިނިސްޓަރު މޫސާ ޒަމީރު ކެރިވަޑައިގެން ނުކުމެ، ފިޔަވަޅުތައް އަޅުއްވަންޖެހޭ ކަމަށް ނާޒިމް ވިދާޅުވި އެވެ.

ކުންފުނިތަކުގެ ބެލެނިވެރި ފަރާތް ކަމުގައިވާ ޕީސީބީ އުވާލައި، އެ މަސައްކަތް މިނިސްޓްރީގެ ދަށަށް ބަދަލު ކުރަން ޖެހޭ ކަމަށާއި އެސްއޯއީތައް އިސްލާހު ކުރުމަށްޓަކައި މިނިސްޓަރު މަސައްކަތް ކުރައްވަން ޖެހޭ ކަމަށް ނާޒިމް ވިދާޅުވި އެވެ.

ނާޒިމް ވިދާޅުވި ގޮތުގައި ކުރިން ހެދިފައި ހުރި އެއްބަސްވުންތައް ހުރި ގޮތުން ކޮރަޕްޝަންގެ ކަންކަން އަދިވެސް ހިންގަމުންދާ އެއް ދާއިރާއަކީ ސިއްހީ ދާއިރާ އެވެ.

އޭގެ މިސާލެއް ފާހަގަ ކުރައްވައި، ނާޒިމް ވިދާޅުވީ އިންޖެކްޝަނެއް ޖަހަން އާސަންދަ އިން 24،000ރ. ކޮންމެ މީހަކު ހަރަދުކުރަން ޖެހޭ މައްސަލައެއް މި ފަހުން ފެންމަތިވި ކަމަށެވެ.

އޭގެ ތަފްސީލް ބެލިއިރު މިދިޔަ ދެ އަހަރު ތެރޭގައި 1،000 އަށް ވުރެ ގިނަ އެފަދަ އިންޖެކްޝަން އާސަންދަ ކުންފުނިން ގަނެފައިވާ ކަމަށް ނާޒިމް ވިދާޅުވި އެވެ. އެ ކުންފުންޏަށް 24 މިލިއަން ރުފިޔާ ދައުލަތުން ދީފައިވާ އިރު އޭގެ އަސްލު އަގު ފަސް މިލިއަން ރުފިޔާއަށް ވެސް ނާރާ ކަމަށް ނާޒިމް ވިދާޅުވި އެވެ.

"ވެރިކަން ބަދަލުވުމާއެކު ހޮސްޕިޓަލްތަކުގައި ހުންނަ މެޝިންތަކުގައި ބްރޭންޑުތައް ބަދަލުވޭ. މި ކަހަލަ ކަންކަން ވާތީ އަޅުގަނޑު މި ދަންނަވަނީ މީގެ ތެރެއިން ފޭދިގެން ދާ ބައި ވަރަށް ބޮޑޭ،" ނާޒިމް ވިދާޅުވި އެވެ.

އޭގެ އިތުރުން އާސަންދަ އިން ބޭރުގެ ހޮސްޕިޓަލްތަކާ އެކީ ހަދާފައި ހުރި އެއްބަސްވުންތަކުގައި މެދުވެރިއެއް ހުންނަ ކަން ޔަގީން ކުރެވޭ ކަމަށް ނާޒިމް ވިދާޅުވި އެވެ. އެ ހޮސްޕިޓަލްތަކުން ޗާޖު ކޮށްފައި ހުންނަނީ ގަބޫލު ކުރަން ދަތި ބޮޑެތި އަގުތަކެއް ކަމަށާއި އަދި ބަޔަކަށް ބައި އެޅިފައި އޮތް ނަމަވެސް އެ އެއްބަސްވުންތައް މި ސަރުކާރުން ދަމަހައްޓަން ނުޖެހޭނެ ކަމަށް އޭނާ ވިދާޅުވި އެވެ.