ޑޮލަރު މާރު ކުރުމާބެހޭ އުސޫލުތައް ގާނޫނެއްގެ ތެރެއަށް ގެނައުން މުހިންމު: ރައީސް

ރިސޯޓްތަކަށް އަންނަ ކޮންމެ ޓޫރިސްޓަކަށް 500 ޑޮލަރު މާރު ކުރަންޖެހޭ ގޮތަށް އެމްއެމްއޭއިން ހެދި ބޭރު ފައިސާއާ ބެހޭ ބިލުގައި އޮތުމަކީ ވަރަށް ރަނގަޅު ކަމެއް ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.

އެމްއެމްއޭ އިން ބޭރު ފައިސާއާބެހޭ ގާނޫނެއް އެކުލަވާލުމަށްޓަކައި، އެކަމާބެހޭ ބިލެއް އެކުލަވާލުމަށްފަހު އާންމުންގެ ހިޔާލަށް ރޭ ވަނީ ހުޅުވާލައިފަ އެވެ.

އެ ބިލަށް އިޝާރަތް ކުރައްވައި، ރައީސް މިއަދު އެކްސްގައި ކުރެއްވި ޕޯސްޓެއްގައި ވިދާޅުވީ 500 ޑޮލަރު މާރު ކުރަންޖެހޭ ގޮތަށް އެ ބިލުގައި އޮތުމަކީ ވަރަށް ރަނގަޅު ކަމެއް ކަމަށާއި އެކަމަށްޓަކައި އެމްއެމްއޭއަށް ޝުކުރު އަދާކުރައްވާ ކަމަށެވެ.

"ގަވާއިދު ތަންފީޒުކުރުން ވަރުގަދަ ކުރުމަށްޓަކައި އެމްއެމްއޭ އިން އިސްނަގައިގެން ބޭރު ފައިސާއާ ބެހޭ ގާނޫނެއް ހެދިގެން ދިއުމަކީ މުހިއްމު ކަމެއް. މި ގާނޫނުގެ ސަބަބުން ރިސޯޓުތަކަށް އަންނަ ކޮންމެ ޓޫރިސްޓަކަށް 500 ޑޮލަރު މާރު ކުރެވިގެންދާނެ،" ރައީސް ވިދާޅުވި އެވެ.

ރައީސް ވިދާޅުވި ގޮތުގައި ޓޫރިޒަމް ނޫން ދާއިރާ ތަކުން ވެސް ވަކި ވަރަކަށް ވުރެ ގިނައިން ޑޮލަރު އާމްދަނީ ލިބޭ ނަމަ، ބޭންކްތަކުން ޑޮލަރު މާރު ކުރަންޖެހޭ ގޮތަށް ހިމަނާފައިވައިވުމުން ބޭންކިން ނިޒާމުގައި ދައުރުވާ ޑޮލަރު ކުރިން އަންދާޒާކުރި ވަރަށް ވުރެ އިތުރުވެގެން ދާނެ އެވެ.

ގާނޫނަށް ގެންނަ ބަދަލުތަކުގެ ނަތީޖާއަކަށް ވެގެން ދާނީ ރައީސް ވިދާޅުވި ގޮތުގައި އާއްމު ރައްޔިތުންނަށާއި ކުދި އަދި މެދު ފަންތީގެ ވިޔަފާރިވެރިންނަށް ޑޮލަރު ލިބުން ފަސޭހަވުމެވެ. އެގޮތުން ރައީސް ވިދާޅުވީ: - 2025 ޖުލައި މަހުން ފެށިގެން ސަރުކާރުން ހިއްސާވާ ކުންފުނިތަކުން ޕެރަލަލް މާކެޓަށް ނުގޮސް ރަސްމީ ރޭޓްގައި ޑޮލަރު ލިބޭނެ އިންތިޒާމު ހަމަޖެހޭނެ.

- 2026 ގެ ފުރަތަމަ ކުއާޓާގައި ވެލާނާ އިންޓަނޭޝަނަލް އެއާޕޯޓުން ފުރާ ކޮންމެ ދިވެއްސަކަށް ލިބޭ 1000 ޑޮލަރު ލިބޭ ގޮތް ހެދޭނެ.

- 2026 ގެ ފުރަތަމަ ކުއާޓާގައި ކްރެޑިޓް ކާޑު ލިމިޓްތައް ބޮޑުކޮށްދެވޭނެ ކަމަށް.

- 2025 ޖުލައި މަހުން ފެށިގެން ވިޔަފާރިވެރިންނަށް ތަކެތި އިމްޕޯޓްކުރުމުގެ ގޮތުން ބޭންކުތަކަށް ޓީޓީ ހެދުމަށް ދޫކުރާ ޑޮލަރުގެ ނިސްބަތް އިތުރުކުރެވޭނެ.

އެމްއެމްއޭ އިން "ބޭރު ފައިސާއާބެހޭ ބިލް"ގެ ނަމުގައި ގާނޫނެއް އެކުލަވާލުމަށްޓަކައި، އާންމުންގެ ހިޔާލަށް ރޭ ހުޅުވަާލުމުން، މިހާރު އޮތް ގަވާއިދުގެ ދަށުން ބޭންކުތައް މެދުވެރިކޮށް މާރުކުރަންޖެހޭ ޑޮލަރުގެ އަދަދުތަކަށް ލުއިތަކެއް ދީފައިވާ ކަމުގެ އަޑުތައް ފެތުރުނެވެ.

އެކަމާ ގުޅިގެން އެމްއެމްއޭ އިން ބޭއްވި ނޫސްވެރިންގެ ބައްދަލުވުމެއްގައި ގަވަރުނަރު އަހުމަދު މުނައްވަރު ވިދާޅުވީ މިހާރު އޮތް ގަވާއިދަށް ގާނޫނީ ބާރު ދިނުމަށް ގާނޫނެއް އެކުލައިލުން ފިޔަވައި، އެއްވެސް ލުޔެއް ދީފައެއް ނުވާނެ ކަމަށެވެ.

އެ ބިލާ ގުޅޭގޮތުން ނޫސްވެރިންގެ ބައްދަލުވުމުގެ ތެރެއިން ނޫސްވެރިންނާ ހިއްސާކުރި ޕްރެޒެންޓޭޝަންގައި ބުނީ، ކެޓަގަރީ "އޭ" ގައި ހިމެނޭ ރިސޯޓުތަކާއި ހޮޓާތަކާއި ޓޫރިސްޓް އުޅަނދުތައް ކޮންމެ ޓޫރިސްޓަކަށް، ބޮލަކަށް 500 ޑޮލަރުގެ ރޭޓުން، ރާއްޖޭގެ ބޭންކަކަށް ޑޮލަރު މާރުކުރަން ލާޒިމްވެ އެވެ. އަދި ކެޓަގަރީ "ބީ" ގައި ހިމެނޭ ގެސްޓް ހައުސްތަކުން ކޮންމެ ޓޫރިސްޓެއްގެ ބޮލަކަށް 25 ޑޮލަރުގެ ރޭޓުން ކޮންމެ މަހަކު އެ އަދަދު ބޭންކަކަށް ޖަމާކޮށް މާރުކުރަން ޖެހެ އެވެ.

އެއީ މިހާރު އޮތް ގަވާއިދުގައި ވެސް ހިމަނާފައި އޮތް އަދަދުތަކެވެ.

މުނައްވަރު ވިދާޅުވި ގޮތުގައި ޓޫރިޒަމް ދާއިރާގައި ހަރަކާތްތެރިވާ ފަރާތްތަކަށް އިންސާފުވެރިވުމުގެ ގޮތުން، އާ ކެޓަގަރީއެއް ބިލްގައި ވަނީ ހިމަނައިފަ އެވެ.

އެގޮތުން ޓޫރިޒަމް ދާއިރާގައި ނުހިމެނޭ ފަރާތްތަކުން އަހަރެއްގެ ތެރޭގައި 20 މިލިއަން އެމެރިކާ ޑޮލަރަށް ވާ އަދަދަށް ބޭރު ފައިސާ ލިބޭނަމަ، ބޭރު ފައިސާގެ އާމްދަނީގެ 25 ޕަސެންޓަށް ވުރެ ދަށް ނުވާ އަދަދެއް ރާއްޖޭގެ ބޭންކް އެކައުންޓަކަށް ޖަމާކުރަން މަޖުބޫރުވާ ގޮތަށް ބިލްގައި ވަނީ ހިމަނައިފަ އެވެ.