އިމްރާން މިނިވަންކުރަން ގޮވާލައި ކުރި މުޒާހަރާއިން 1،000 މީހަކު ހައްޔަރު

ޕާކިސްތާނުގެ ސަލާމަތީ ބާރުތަކުން މުޒާހަރާ ހުއްޓުވަން ބާރުގެ ބޭނުންކުރަނީ: އިއްޔެ މުޒާހަރާ ހުއްޓުވި އިރު ހާހެއްހާ މީހުން ވަނީ ހައްޔަރުކޮށްފައި. -- ފޮޓޯ: އޭއެފްޕީ

28 ނޮވެމްބަރ 2024 - 08:57

2 comments

ޕާކިސްތާނުގެ ކުރީގެ ބޮޑުވަޒީރު އިމްރާން ޚާން މިނިވަން ކުރުމަށް ގޮވާލައި ވެރިރަށް އިސްލާމްއާބާދުގައި މުޒާހަރާކުރި މީހުންގެ ތެރެއިން ހާހެއްހާ މީހުން ހައްޔަރުކޮށްފައިވާ ކަމަށް އެ ގައުމުގެ ފުލުހުން ބުނެފި އެވެ.

އިމްރާން 2023 ވަނަ އަހަރުގެ އޮގަސްޓް މަހު ޖަލަށް ލާފައި ވަނީ ވެރިކަމުން ދުރުކުރުމަށް ފަހު އޭނާގެ މައްޗަށް އެތައް ތުހުމަތެއްކޮށް ހިންގި ޝަރީއަތްތަކަށް ފަހުގަ އެވެ. ކޮރަޕްޝަނާއި މަގާމުގެ ނުފޫޒު ބޭނުންކުރުމާއި ދައުލަތުގެ ސިއްރުތައް ހާމަކުރުން ފަދަ އެތައް ތުހުމަތެއް ކޮށްފައި ވާއިރު އިމްރާން ވިދާޅުވަނީ އެއީ އޭނާ އަލުން ސިޔާސީ މައިދާނަށް ނުކުތުން ހުއްޓުވަން އުފައްދައިގެން އުޅޭ މައްސަލަތަކެއް ކަމަށެވެ.

އިމްރާންގެ ސަޕޯޓަރުން ގެންދަނީ މިދިޔަ ފެބްރުއަރީ މަހުން ފެށިގެން އެކި ސަރަހައްދުތަކަށް އެއްވެ މުޒާހަރާކުރަމުންނެވެ. ނަމަވެސް މި ދެތިން ދުވަހު ބޭއްވި އެއްވުންތަކަކީ މިހާތަނަށް އެންމެ ގިނަ މީހުން ބައިވެރިވި އަދި ހަމަނުޖެހުން އެންމެ ބޮޑުވި އެއްވުންތަކެވެ.

މަގުތަކަށް މީހުން ނުކުމެ އުޅުމާއި ތަންތަނަށް އެއްވުން މަނާކޮށްފައި އޮއްވައި 10،000 އަށް ވުރެ ގިނަ މީހުން އިސްލާމްއާބާދަށް ވަދެ އިމްރާންގެ މިނިވަންކަމަށް ގޮވާލައި އަޑު އުފުލާފައިވެ އެވެ. އިސްލާމްއާބާދުގައި ސަރުކާރުގެ އޮފީސްތައް ހުންނަ ހިސާބަށް އެއްވިޔަ ނުދޭން ސަލާމަތީ ބާރުތަކުގެ 20،000 މީހަކު ނެރެފައިވެ އެވެ. މުޒާހަރާގެ ބައިވެރިންނާއި ސަލާމަތީ ބާރުތަކާ ދެމެދު ކުރިމަތިލުންތައް ހިނގުމަށް ފަހު އިއްޔެ ވަނީ މުޒާހަރާ ރޫޅާލައި މީހުން ހައްޔަރުކޮށްފަ އެވެ.

އިސްލާމްއާބާދުގެ ޕޮލިސް އިންސްޕެކްޓަ ޖެނެރަލް އަލީ ނާސިރު ރިޒްވީ ވިދާޅުވީ އާދީއްތަ ދުވަހުން ފެށިގެން އަންގާރަ ދުވަހުގެ ނިޔަލަށް މުޒާހަރާގެ ބައިވެރިންގެ ތެރެއިން 954 މީހަކު ހައްޔަރުކޮށްފައިވާ ކަމަށެވެ. މި މީހުން ހައްޔަރުކުރީ ސަރުކާރުގެ އޮފީސްތައް ހުންނަ ސަރަހައްދު ތެރެއަށް ޖަމާވުމުން ކަމަށް ވެސް އޭނާ ވިދާޅުވި އެވެ.

ސަރުކާރުން އިއްޔެ ބުނި ގޮތުގައި ކަރުނަ ގޭހާއި ބަޑި ހިފައިގެން ސިފައިން ގޮސް މަގުތައް ހުސްކުރުމުގެ ކުރިން ހިނގި ކުރިމަތިލުންތަކުގައި ފުލުހަކާއި ސްޓޭޓް ޕެރަމިލިޓަރީގެ ހަތަރު މީހަކު މަރުވެފައިވާ ކަމަށެވެ.

ޕާކިސްތާނުގެ ހޯމް މިނިސްޓަރު މުހްސިން ނަކްވީ ނެރުއްވި ބަޔާނެއްގައި ވިދާޅުވީ ސަލާމަތީ ބާރުތަކުން ޕީޓީއައިގެ މުޒާހަރާ، ވިސްނުންތެރިކަމާ އެކު މަސައްކަތްކޮށް ހުއްޓުވާފައިވާ ކަމަށެވެ. ޕީޓީއައި އިން ބުނެފައި ވަނީ "މި ވަގުތަށް މުޒާހަރާ ކެންސަލް" ކުރީ ކަމަށެވެ.