ބެންކޮކް ދަތުރާ ގުޅިގެން ނެރުނީ ޒިންމާއިން ބޭރު، ހަގީގަތާ ހިލާފު ރިޕޯޓެއް: ހދ. އަތޮޅު ކައުންސިލް

ހދ. އަތޮޅު ކައުންސިލްގެ މެމްބަރުންނާއި ގިނަ އަދަދެއްގެ މުވައްޒަފުން ނުވަ ލައްކަ އަށް ވުރެ ގިނަ ރުފިޔާ ހަރަދުކޮށްގެން ތައިލެންޑުގެ ބެންކޮކަށް ދިޔަ ދަތުރާ ގުޅިގެން އޮޑިޓު ރިޕޯޓު ނެރުނީ އޮޑިޓާ ޖެނެރަލްގެ ޒިންމާ އާއި މަސްއޫލިއްޔަތުތަކުން ބޭރު، ހަގީގަތެއް ނެތް ރިޕޯޓެއް ކަމަށް ހދ. އަތޮޅު ކައުންސިލުން ބުނެފި އެވެ.

އޮޑިޓް އޮފީހުން މި ހަފުތާގައި އާންމުކުރި އޮޑިޓް ރިޕޯޓެއްގައި ބުނީ ހދ. އަތޮޅުން ކައުންސިލުގެ ބަޖެޓުން 952،885ރ. ހަރަދުކޮށްގެން މިދިޔަ އަހަރު އޮކްޓޯބަރު މަހު ބެންކޮކަށް ތަޖުރިބާ އާއި ތަމްރީނު ހޯދުމަށް 10 ދުވަހުގެ ދަތުރެއްގައި އެ ކައުންސިލްގެ ބައެއް މެމްބަރުންނާއި މުވައްޒަފުން ދިޔަ ކަމަށެވެ. އެ ދަތުރުގައި ބައިވެރިވީ 13 ކައުންސިލަރުންނާއި ސެކްރެޓަރީ ޖެނެރަލް އަދި ސީނިއާ މެނޭޖުމަންޓްގެ ހަ ބޭފުޅުން ހިމެނޭ ގޮތަށް ޖުމްލަ 20 މީހުން ކަމަށް އެ ރިޕޯޓުގައި ވެ އެވެ.

އެ ދަތުރުގެ މަގުސަދަކީ ތައިލެންޑުގެ އެކިއެކި ކަންކަމާ ގުޅޭގޮތުން ތަޖުރިބާ ހޯދުމާއި އަތޮޅުގެ ކުރިއެރުމަށް ކުރެވޭނެ ކަންކަމުގައި ތައިލެންޑުގެ އިންވެސްޓަރުން ހޯދުމަށް މަގުފަހިކުރުމެވެ. އޭގެ އިތުރުން، ގުޑް ގަވަނަންސާއި ޕަބްލިކް ޕޮލިސީ އަދި ރޫރަލް ޑިވެލޮޕްމަންޓްގެ ދާއިރާތަކުން ތަޖުރިބާ އާއި މައުލޫމާތު ހޯދުން ކަމަށް ކައުންސިލުގެ ދަތުރު ރިޕޯޓުގައި ވީ ނަމަވެސް އެކަމުން އެއްވެސް ފައިދާއެއް ވެފައިވާ ނުވާ ކަމަށް އޮޑިޓުގައިވެ އެވެ.

HDh. Atoll Council ge gina bayaku in 9 lakka kharadhu kohgen Bangkok ah dhiya massala eh

The most trusted news source in the Maldives

Mihaaru

މިކަމާ ގުޅިގެން އަތޮޅު ކައުންސިލުން މިއަދު ނެރުނު ބަޔާނެއްގައި ބުނީ ފިނޭންސް މިނިސްޓްރީގެ ހުއްދަ ނުހޯދައި އެ ދަތުރުކޮށްފައިވާތީ ފިޔަވަޅު އަޅަން ޖެހޭ ކަމަށް އޮޑިޓް ރިޕޯޓުގައިވީ ނަމަވެސް، ފިނޭންސުން އެގޮތަށް އަމަލުކުރަން ޖެހޭ ކަމަށް ނެރުނު ސާކިއުލާގައި ކައުންސިލްތައް ނުހިމެނޭ ކަމަށެވެ.

ސާކިއުލާގެ ދަށުން، ކައުންސިލްތަކުން ހުއްދަ ހޯދަން ނުޖެހޭކަން އޮޑިޓް އޮފީހަށް އެނގިފައި ނެތުމަކީ އޮޑިޓާ ޖެނެރަލްގެ ޒިންމާދާރުކަމާއި ގާބިލްކަމާ މެދު ސުވާލު އުފެދޭ ކަމެއް ކަމަށް ކައުންސިލުން ބުނެފައިވެ އެވެ.

ކައުންސިލުން ބުނީ ބެންކޮކް ދަތުރުން އެއްވެސް މަންފާއެއް ނުވާ ކަމަށް އޮޑިޓް ރިޕޯޓުގައި ވަނީ އެއްވެސް އަސާސެއް ނެތި، އަތޮޅު ކައުންސިލްތަކަށް ގާނޫނުން ދީފައިވާ ބާރުތަކާއި މަސްއޫލިއްޔަތުތަކަށް ވެސް ރިއާޔަތް ކުރުމެއް ނެތި ކަމަށެވެ.

އެ ދަތުރުން އެއްވެސް ފައިދާއެއް ނުވާ ކަމަށް ބުނެފައިވަނީ ދަތުރުގައި ބައިވެރިވި 12 ރަށުގެ ކައުންސިލް ރައީސުންގެ ބަހެއް ނެތި ކަމަށް ވެސް ބުނެފައިވެ އެވެ.

"ތަމްރީނާއި ތަޖުރިބާ ހޯދަން ބަޖެޓުން ކުރެވުނު ހަރަދުތަކުން ނުކުންނަ ނަތީޖާ އާއި ލިބޭ މަންފާ އިގްތިސޯދީ ނަޒަރަކުން އެކަނި ވަޒަން ކުރާއިރު، އިންސާނީ ތަރައްގީއަކީ ވެސް ތަހުޒީބުވަމުން އަންނަ ދުނިޔޭގައި ވަޒަން ކުރަން ޖެހޭ ކަންކަމުގެ ތެރޭގައި އޮޑިޓް ރިޕޯޓުގައި ފާހަގަކޮށްފައި ނެތުމަކީ ވަރަށް ޒިންމާދާތުކަން ކުޑަ އަމަލެއްގެ ގޮތުގައި ކައުންސިލުން ދެކެމެވެ." ހދ. އަތޮޅު ކައުންސިލުގައި ބުނެފައިވެ އެވެ.

އެ ކައުންސިލުން ބުނީ އިދާރީ ދާއިރާތައް ލާމަރުކަޒީ ނިޒާމުން ހިންގުމުގެ ފުރުސަތު އޮތްއިރު، މާލީ ނިޒާމު ހަރުދަނާކުރުމުގެ ނަމުގައި ނެރޭ ރިޕޯޓުތަކަކީ ޒިންމާދާރުކަމާ އެކު ނެރޭ ޖަވާބުދާރީވެވޭނެ ރިޕޯޓުތަކަކަށް ވާން ޖެހޭ ކަމަށެވެ.

އަދި އޮޑިޓް ރިޕޯޓުގައި ހުރީ ހަގީގަތާ ހިލާފު މައުލޫމާތު ކަމަށް ބުނެ، އެކަން އެ ކައުންސިލުން ކުށްވެރި ކޮށްފައިވެ އެވެ.