ތިމާވެއްޓަށް ގެއްލުން ދިނުމުން ކޮށްފައިވާ ޖޫރިމަނާތަކުން ދައުލަތަށް ލިބެން ޖެހޭ ފައިސާގެ އަދަދު 930 މިލިއަން ރުފިޔާއަށް ވުރެ މައްޗަށް ގޮސްފައިވާ ކަމަށް އޮޑިޓް ރިޕޯޓެއްގައި ބުނެފި އެވެ.
އެކަން ފާހަގަކޮށްފައި ވަނީ އޮޑިޓް އޮފީހުން އިއްޔެ އާންމުކުރި ތިމާވެއްޓާ ބެހޭ މިނިސްޓްރީގެ 2022 ވަނަ އަހަރުގެ މާލީ ބަޔާންތަކުގެ އޮޑިޓާއި 2019، 2020 އަދި 2021 ގެ ކޮމްޕްލަޔަންސް އޮޑިޓް ރިޕޯޓުގަ އެވެ.
އެ ރިޕޯޓުގައި ބުނި ގޮތުގައި، ތިމާވެއްޓަށް ލިބޭ ގެއްލުންތަކަށް ޖޫރިމަނާ ކަނޑައެޅުމާއި ބަދަލު ހޯދުމުގެ ގަވާއިދުގެ ދަށުން ކޮށްފައިވާ ޖޫރިމަނާތަކުގެ މައްސަލަތަކާ ގުޅިގެން ސެޕްޓެމްބަރު 16، 2024 ގެ ނިޔަލަށް ޖުމްލަ 930،328،480ރ. ރުފިޔާ ދައުލަތަށް ލިބެން ޖެހެ އެވެ.
އޭގެ ފަހުން މިހާރު އަހަރަކަށް ވުރެ ގިނަ ދުވަސްވެފައި ވާތީ، ތިމާވެށީގެ ޖޫރިމަނާގެ މިހާރުގެ ޖުމްލަ އަދަދު އަދި ކަށަވަރެއް ނުވެ އެވެ.
އިސްލާހުކުރަން ލަފާދިން ގޮތް
ދައުލަތުގެ މާލިއްޔަތު ގަވާއިދުގައި ބަޔާންކޮށްފައިވާ ގޮތަށް، ދައުލަތަށް ލިބެން ޖެހޭ ފައިސާ ހޯދުމަށް ފިޔަވަޅު އެޅުމަށް އޮޑިޓް ރިޕޯޓުގައި މިނިސްޓްރީއަށް ލަފާދީފައިވެ އެވެ.
- ފައިސާ ދެއްކުމަށް ކަނޑައަޅާފައިވާ މުއްދަތުގެ ތެރޭގައި ފައިސާ ހޯދުމަށް މަސައްކަތްކުރުން
- ފައިސާ ދެއްކުމަށް ކަނޑައަޅާފައިވާ މުއްދަތު ހަމަވާއިރު ފައިސާ ނުލިބިއްޖެ ނަމަ، ހަތް ދުވަހުގެ ތެރޭގައި ފައިސާ ދެއްކުމަށް ހަނދާންކޮށްދީ، ފައިސާ ދައްކަން ޖެހޭ ފަރާތަށް ލިޔުން ފޮނުވުން
- އެ ހަތް ދުވަހުގެ ތެރޭގައި ފައިސާ ނުދައްކައިފި ނަމަ، ފައިސާ ހޯދުމުގެ މައްސަލަ ޝަރީއަތަށް ހުށަހެޅުން
ތިމާވެށީގެ ޖޫރިމަނާތަކުގެ ފައިސާ ނުލިބުމަކީ ވަރަށް ބޮޑުވެފައި އޮތް މައްސަލައެކެވެ. އެ ޖޫރިމަނާތައް ނުދައްކާ މައްސަލާގައި، އެފަދަ ވިޔަފާރިތައް ހުއްޓުވަން ކަމާބެހޭ ފަރާތްތަކާ އެކު މަޝްވަރާ ފަށަން ރައްޔިތުންގެ މަޖިލީހުގެ ތިމާވެއްޓާއި މޫސުމީ ބަދަލުތަކާ ބެހޭ ކޮމިޓީން މިދިޔަ އަހަރުގެ ފެބްރުއަރީ މަހު ފާސްކޮށްފައިވެ އެވެ.
ތިމާވެށީގެ ޖޫރިމަނާތައް ނުލިބޭ މައްސަލާގައި އީއާރުއޭ އާއި އެޓާނީ ޖެނެރަލްގެ އޮފީހުގެ އިސްވެރިން އޮކްޓޯބަރު 2024 ގައި ވަނީ މަޖިލީހުގެ ކޮމިޓީއަށް ހާޒިރުކޮށް ސުވާލު ވެސް ކޮށްފަ އެވެ.
އީއާރުއޭ އިން އެ ކޮމިޓީގައި ބުނެފައިވާ ގޮތުގައި، ތިމާވެއްޓަށް ގެއްލުން ދިނުމުން ކޮށްފައިވާ ޖޫރިމަނާގެ ފައިސާ ދައުލަތަށް ނުލިބި ދިގުލައިގެން ދާއިރު، އެ ފައިސާ ހޯދުމަށް ކޯޓަށް ދިއުމުގެ ބާރު އެ އޮތޯރިޓީ އަށް ނެތުމަކީ އެ ފައިސާ ހޯދުމަށް އޮތް އެންމެ ބޮޑު ގޮންޖެހުމެވެ.
އޭޖީ އޮފީހުން ބުނެފައި ވަނީ ރާއްޖޭގެ ފަރުތަކަށް އަރާ ބޭރުގެ ބޯޓުތައް ޖޫރިމަނާ ކުރުމުން އެ ފައިސާ ނުދައްކާ ރާއްޖެއިން ބޭރަށް ފުރައިގެންދާ މައްސަލަ ވޭތުވެދިޔަ ތިން އަހަރު ވަރަށް ބޮޑަށް ދިމާވަމުންދާ ކަމަށެވެ.
އޮޑިޓް ރިޕޯޓުގައި ފާހަގަކުރި އިތުރު މައްސަލަތައް
- ކުރީ ސަރުކާރުގައި އެންސީއައިޓީ (މިހާރުގެ ނޭޝަނަލް ޑިޖިޓަލް ސާވިސް)އަށް މިނިސްޓްރީ މެދުވެރިކޮށް 2021 ވަނަ އަހަރު ގަނެފައިވާ ގިނަ އަދަދެއްގެ މައިކްރޮސޮފްޓުގެ ވޮލިއުމް ލައިސެންސް ދައުލަތުގެ އިދާރާތަކާ ހަވާލުނުކުރެވުމުގެ ސަބަބުން ހުރީ ބޭނުން ނުކުރެވި. 20،000 މައިކްރޮސޮފްޓް 365 ލައިންސަންސްގެ ތެރެއިން ޖޫން 2022 ގެ ނިޔަލަށް ބޭނުންކޮށްފައި ވަނީ އޭގެ ތެރެއިން ގާތްގަނޑަކަށް ދެބައިކުޅަ އެއް ބައި. އަދި ބޭނުންނުކުރާ ލައިސަންސްތަކަށް 18.3 މިލިއަން ރުފިޔާ ހަރަދުކޮށްފައިވޭ.
- މައިކްރޮސޮފްޓް ނޫން އިތުރު ޕްރޮޑަކްޓުތަކުގެ ތެރެއިން 9،000 އަށް ވުރެ ގިނަ ލައިސަންސްތައް ހަވާލުނުކޮށް ހުރި އިރު، އެއަށް 2.6 މިލިއަން ރުފިޔާ ހަރަދުކޮށްފައިވޭ.
- ކުރީ ސަރުކާރުގައި ފެނަކަ ކޯޕަރޭޝަނާ ގުޅިގެން 2021 ވަނަ އަހަރު ވަނަ އަހަރު ހިންގި "ހޯމް ސޯލާ" ޕްރޮގްރާމްގެ މަގުސަދު ހާސިލްކުރެވުނު މިންވަރު އެއްބަސްވުމާ އެއްގޮަތަށް މިނިސްޓްރީން މޮނިޓާކޮށް އިވެލުއޭޓްކޮށްފައި ނުވޭ.
- 20 ރަށެއްގެ ކުނި މެނޭޖުކުރުމަށް ކައުންސިލްތަކަށް ހިލޭ އެހީ ދިނުމުގައި މާލިއްޔަތާ ބެހޭ ސާކިއުލާ އާއި މަސައްކަތުގެ އެއްބަސްވުމާ އެއްގޮތަށް އަމަލުކޮށްފައި ނުވޭ.