އަންނަ އަހަރު އއ. ތޮއްޑޫގައި ޑޮލަރު އޭޓީއެމް އެއް ބަހައްޓާނެ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.
އއ. އަތޮޅަށް ރައީސް މިހާރު ކުރައްވަމުން ގެންދަވާ ދަތުރުފުޅުގައި މިއަދު ހެނދުނު ތޮއްޑުއަށް ވަޑައިގެން ރައްޔިތުންނާ ވާހަކަފުޅު ދައްކަވަމުން، އެ ރަށަކީ ލޯކަލް ޓޫރިޒަމް ވަރަށް ބޮޑަށް ފުޅާވެ ކުރިއަރަަމުން އަންނަ ރަށެއްކަން ފާހަގަކުރެއްވި އެވެ. އެހެންވެ އެ ރަށުގައި ޑޮލަރު އޭޓީއެމް އެއް ބެހެއްޓުން މުހިއްމު ކަމަށް ވިދާޅުވި އެވެ. އެހެންވެ އަންނަ އަހަރުގެ ތެރޭގައި އެކަން ކޮށް ދެއްވާނެ ކަމަށް ރައީސް ވިދާޅުވި އެވެ.
"ޑޮލަރުގެ ވިޔަފާރި ތޮއްޑޫގައި ވަރަށް ބޮޑަށް އެބަ ހިނގާ. އެހެންވީމާ އަޅުގަނޑު ގަސްތުކުރަނީ ރައްޔިތުންނަށް ހަމަހަމަ ގޮތެއްގައި ހިދުމަތް ކުރުމުގެ ސިޔާސަތުގެ ތެރެއިން މި ރަށުގައި ތިބެގެން ޑޮލަރު އިތުރުކުރެވޭނެ ގޮތެއް ހަދައިދިނުން. އިރާދަކުރެއްވިއްޔާ ޑޮލަރުގެ އޭޓީއެމްއެއް ގާއިމުކޮށް ދޭނަން،" ރައީސް ވިދާޅުވި އެވެ.
މާލެ ފިޔަވައި އަތޮޅުތެރޭގައި ބެހެއްޓި ފުރަތަމަ ޑޮލަރު އޭޓީއެމް ރައީސްގެ ވައުދުފުޅާ އެއްގޮތަށް ބީއެމްއެލް އިން މިހާރު ވަނީ ކ. މާފުށީގައި ބަހައްޓައި މިދިޔަ ޖޫން މަހު ހިދުމަތް ފަށައިފަ އެވެ.