ޚަބަރު / މިނިސްޓްރީ އޮފް ހަޔާ އެޑިއުކޭޝަން

ހައި އެޗީވާސް ސްކޮލާޝިޕްގައި ކިޔަވާ ކޯސް ބަދަލުކުރެވޭ ގޮތް ހަދައިފި

ގައުމީ ޔުނިވަސިޓީން ސްކޮލަޝިޕް ލިބުނު ދަރިވަރަކަށް އެކަމުގެ ލިޔުން ހަވާލުކުރަނީ. -- ފޮޓޯ: މިހާރު

ފާތިމަތު އަޖްފާން، މިހާރު

19 ޑިސެމްބަރ 2024 - 14:49

ހައި އެޗީވާސް ސްކޮލާޝިޕް ލިބޭ ދަރިވަރުން ކިޔަވަން ފަށާ ކޯސް ބަދަލު ކުރެވޭ ގޮތަށް އުސޫލު ބަދަލުކޮށްފި އެވެ.

ހަޔާ އެޑިޔުކޭޝަން މިނިސްޓްރީގެ ސްޓޭޓް މިނިސްޓަރު ޑރ. އަބްދުއްރަޙީމް ހަސަން ވިދާޅުވީ 2019 ވަނަ އަހަރު އެކުލަވާލާފައިވާ އުސޫލުގައިވާ ގޮތުން ފައިސާގެ އެއްވެސް މުއާމަލާތެއް ހިންގުމަށް ފަހު ކޯސް ބަދަލު ނުކުރެވޭނެ ކަމަށެވެ.

ނަމަވެސް އަލަށް މި އެކުލަވާލި އުސޫލުގައި ޕްލޭސްމަންޓް ލިބުނުކަމުގެ ލިޔުން ސްކޮލާޝިޕް ލިބޭ ދަރިވަރު މިނިސްޓްރީއަށް ހުށަހެޅުމަށް ފަހު، ފުރިހަމަކުރަން އެދޭ ޕްރޮގުރާމް ބަދަލުކުރެވޭނެ ހާލަތްތަކެއް ކަނޑައަޅާފައިވެ އެވެ.

މަތީ އަރުތަވެރިންގެ އިނާމު ދިނުމަށް ދަރުބާރުގޭގައި ބޭއްވި ރަސްމިއްޔާތުގައި، ހައުސިން މިނިސްޓަރު އަލީ ހައިދަރު ދަރިވަރަކަށް އެވޯޑު ހަވާލު ކުރައްވަނީ.-- ފޮޓޯ: ނިޝާން އަލީ | މިހާރު

▪️ ކޯސް ބަދަލުކުރަން އެދޭއިރު، ކުރިން ހުށަހެޅި ޕްލޭސްމަންޓް ލިބުނުކަމުގެ ލިޔުމުގައި ބަޔާން ކޮށްފައިވާ، މަތީ ތައުލީމު ދޭ މުއައްސަސާއަށް އެއްވެސް ޕޭމަންޓެއް ހަދާފައި ނެތުން

▪️ މަތީ ތައުލީމު ދޭ މުއައްސަސާއަށް އެއްވެސް ޕޭމަންޓެއް ހަދާފައި ވަނިކޮށް ކޯސް ބަދަލުކުރަން ބޭނުން ވެއްޖެ ނަމަ ކަންތައް ކުރާނެ ގޮތްތަކެއް

▪️ ކިޔަވަން ފެށި ކޯހުގެ ފުރަތަމަ ސެމެސްޓާ ނިމުމުގެ ކުރިން ބަދަލުކުރުން

▪️ ދޫކޮށްލާ ކޯސް ފުރިހަމަކުރުމަށް ދަރިވަރުގެ ނަމުގައި ކޮށްފައިވާ ހަރަދުތަކަކ،ީ ބަދަލުވާ ކޯހަށް ހިނގާ ޖުމުލަ ހަރަދުން އުނިކުރެވޭނެ އެއްޗެއްކަމަށް އެއްބަސްވުން

▪️ ކޯސް ބަދަލުކުރަންޖެހޭ ސަބަބު އެކަން ކުރުން މުހިންމުކަމަށް ބާރުދޭ، ކަމާ ގުޅުންހުރި ރަސްމީ ފަރާތްތަކުގެ ލިޔުންތައް ހުށަހެޅުން

▪️ ކޯސް ބަދަލުވިޔަސް، ސްކޮލަޝިޕްގެ އުސޫލުގެ އެހެން އެއްވެސް މާއްދާއަކާ ތައާރުޒުވުމެއް ނެތުން

▪️ ޕްރޮގްރާމް ބަދަލުކުރާ ފުރަތަމަ ފަހަރު ކަމުގައިވުން

▪️ ދޫކޮށްލާ ޕްރޮގްރާމް ފުރިހަމަކުރުމަށް ހިނގާނެ ހަރަދަށްވުރެ ޖުމުލަ ހަރަދު ބޮޑުނުވާނެ ކޯހަކަށް ބަދަލުވާން އެދުން

މަތީ އަރުތަވެރިންގެ އިނާމު ދިނުމަށް ދަރުބާރުގޭގައި ބޭއްވި ރަސްމިއްޔާތުގައި ބައިވެރިވި ބައެއް ދަރިވަރުން.-- ފޮޓޯ: ނިޝާން އަލީ | މިހާރު

▪️ ބަދަލުވާން އެދޭ ކޯހަކީ ފުރަތަމަ ޑިގްރީއާ ނުލައި ސީދާ އެންޓްރީ ލިބޭ 4 އަހަރަށްވުރެ ދިގުނޫން މާސްޓާސް ޑިގްރީ ކޯހަކަށް ވުން

▪️ ކޯސް ބަދަލު ކުރުމަށް ސްކޮލާޝިޕުން ދެން ހަރަދު ކުރާނީ ބަދަލުވިއިރު އެ މުއްދަތުގައި ބާކީ އޮންނަ ދުވަސްތަކަށް ކަމަށް އެއްބަސްވުން

▪️ ބަދަލު ކުރަން އެދޭ ދަރިވަރަކީ އުސޫލަށް އަމަލުކުރަން ފެށިއިރު ކިޔަވަމުންދާ ދަރިވަރެއް ކަމުގައިވުން

▪️ ކޯސް ބަދަލުކުރާ ފުރަތަމަ ފަހަރު ކަމުގައިވުން

▪️ ކޯސް ބަދަލުވާ ނަމަ ވެސް، އެސްކޮލާޝިޕްގެ އުސޫލުގެ އެހެން އެއްވެސް މާއްދާއަކާ ތައާރުޒުވުމެއް ނެތުން

ހައި އެޗީވާސް ސްކޮލާޝިޕް ލިބެނީ ދިވެހި އަދި އިސްލާމް މާއްދާ ހިމެނޭގޮތަށް ފަސް މާއްދާއިން އެންމެ ދަށްވެގެން "އޭ" ފާހެއް ލިބިފައި އޮންނަ ދަރިވަރުންނަށެވެ.

އެ ސްކޮލާޝިޕްގައި މި ސަރަހައްދުގެ ގައުމުތަކާއި މެލޭޝިޔާ އާއި ޗައިނާ އާއި ފިލިޕީންސްގެ އިތުރުން އޯއައިސީޑީގެ ގައުމުތަކަށް ކިޔަވަން ދިޔުމުގެ ފުރުސަތު ލިބޭނެ އެވެ.

ހައި އެޗީވާސް ސްކޮލާޝިޕަކީ ރާއްޖެއަށް ބޭނުންވާ ދާއިރާތަކަށް ކިޔެވުމަށް ހާއްސަކޮށް ދޭ ސްކޮލަޝިޕެކެވެ.