މަޖިލީހުގެ ޖަލްސާއެއްގައި މެމްބަރުން ބައިވެރިވަޑައިގަންނަވަނީ.--ފޮޓޯ: މަޖލިސް
22 ޑިސެމްބަރ 2024 - 14:40
39 comments
ރައްޔިތުންގެ މަޖިލީހުގެ ކުރީގެ މެމްބަރުންނަށް މީގެ 10 އަހަރު ކުރިން އިނާޔަތް ދޭން ފެށި ފަހުން މިހާތަނަށް މިހާތަނަށް 33.8 މިލިއަން ރުފިޔާ ހަރަދުކޮށްފައިވާ ކަމަށާއި އެ އަދަދު އިތުރުވަމުންދާ އިރު މި އަހަރު އެކަނި ވެސް 6.4 މިލިއަން ރުފިޔާ ހޭދަވާނެ ކަމަށް ޕެންޝަން އޮފީހުގެ ހިސާބުތަކުން ދައްކައިފި އެވެ.
މައުލޫމާތު ހޯދައި ލިބިގަތުމުގެ ގާނޫނުގެ ދަށުން "މިހާރު"ން ފޮނުވި ސުވާލުތަކަށް މިދިޔަ ބުރާސްފަތި ދުވަހު ދިން ޖަވާބުގައި ބުނީ، ރައްޔިތުންގެ މަޖިލީހުގެ އިމްތިޔާޒްތަކާއި ބާރުތަކުގެ ގާނޫނުގެ ދަށުން މަޖިލީހުގެ މެމްބަރުންނަށް ހިދުމަތުގެ އިނާޔަތުގެ ފައިސާ ދޫކުރަން ފެށީ ޖޫން، 2014 އިން ފެށިގެން ކަމަށެވެ.
ޕެންޝަން އޮފީސް މެދުވެރިކޮށް މިހާތަނަށް 43 ބޭފުޅަކަށް 33.8 މިލިއަން ރުފިޔާ ހަރަދުކޮށްފައިވާ ކަމަށް އެ އޮފީހުން ބުންޏެވެ.
އެ ގާނޫނުގައިވާ ގޮތުން، މެމްބަރުންނަށް މާލީ އިނާޔަތް ދެނީ މަޖިލީހުން ވަކިވުމަށް ފަހު އަދި އެ މެމްބަރަކަށް 55 އަހަރު ފުރުމުންނެވެ. އޭގެ ތެރެއިން، އެއް ދައުރު އަދާކުރައްވާފައިވާ ނަމަ މުސާރައިގެ 30 ޕަސެންޓް އަދި ދެ ދައުރު ފުރިހަމަކުރެއްވި ބޭފުޅުންނަށް، މަޖިލިސް މެމްބަރެއްގެ މުސާރައިގެ 45 ޕަސެންޓް ހިދުމަތުގެ އިނާޔަތުގެ ގޮތުގައި ދެ އެވެ.
ނަމަވެސް، ދައުލަތުގެ އެއްވެސް ވަޒީފާއެއް އަދާކުރާ ނަމަ، އެ ވަޒީފާ އަދާކުރާ މުއްދަތުގައި ހިދުމަތުގެ އިނާޔަތެއް ނުލިބޭނެ އެވެ.
މެމްބަރުންނަށް މުސާރަ އާއި އިނާޔަތުގެ ގޮތުގައި ދައުލަތުން ދެނީ 82،500ރ. އެވެ. އެއީ އަސާސީ މުސާރައިގެ ގޮތުގައި 42،500ރ. އާއި ލިވިން އެލަވަންސްގެ ގޮތުގައި 20،000ރ. އަދި ވަކި އަދަދަކަށް ކޮމިޓީތަކަށް ހާޒިރުވާ ނަމަ އިތުރަށް ލިބޭ 20،000ރ. އެވެ. އެގޮތަށް ބަލާ ނަމަ، އެއް ދައުރު ފުރިހަމަކުރެއްވި މެމްބަރަކަށް ނަމަ މަހަކު 12،750ރ. އަދި ދެ ދައުރަށް ވުރެ އިތުރަށް ފުރިހަމަކުރައްވާފައިވާ ނަމަ 19،125ރ. ދޭނެ އެވެ.
އެ އިނާޔަތް ފުރަތަމަ ދޭން ފެށި، ޖޫން 1، 2014 ގައި އެ ފައިސާ ޖަމާކޮށްފައިވަނީ ހަތަރު މެމްބަރަކަށެވެ. އެއީ 63،750ރ. އެވެ. އެކަމަކު، ކޮންމެ ފަސް އަހަރަކުން އެ އަދަދު އިތުރުވަމުން ގޮސް، ޖުލައި 1، 2019 ގައި ހިދުމަތުގެ އިނާޔަތް ކުރީގެ 15 މެމްބަރަކަށް ދޭން ފެށި އެވެ. އެ އަހަރު ނިމުނުއިރު އެ އަދަދު 21 އަށް އެރި އެވެ.
މިދިޔަ މަސް ނިމުނުއިރު 43 މެމްބަރަކަށް ހިދުމަތުގެ އިނާޔަތް ދިނުމަށް 647،062ރ. ހަރަދުކުރި އެވެ. މިދިޔަ ޖެނުއަރީން ފެށިގެން މިދިޔަ މަހުގެ ނިޔަލަށް 6.4 މިލިއަން ރުފިޔާ ވަނީ ހަރަދުކޮށްފަ އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ބާބް
23 December 2024
ސިވިލްސާވިސްގެ ޓީޗަރަކަށް އުޅެ 42 އަހަރުވެ އުމުރުން 65 ހަމަވުމުން ވަޒީފާއިން ވަކިވަން މިނިންމީ. ޕެންޝަނަށް ލިބޭ ގޮތަށް އޮތީ ކުރީގެ މުސާރައިގެ ނިސްބަތުން ލިބެން އޮތް ހަހާސް ރުފިޔާ. މި 6 ހާސްވެސް ލިބޭނީ މި އަންނަ ޖެނުއަރީގެ ކުރިން ވަކިވެއްޖިއްޔާ. އެހެންނޫނީ ލިބޭނީ ކޮންމެ މީހަކަސް 65 އަހަރުވުމުން ލިބޭ 5 ހާސް ރުފިޔާ. މަޖުލީހުގެ 5 އަހަރުގެ ދައުރެއް ފުރިހަމަ ކޮށްލުމުން މުސާރައިގެ 30 ޕަސެންޓް މުޅި އުމުރަށް. ވާ ސަރީ ވާ!
ލަމްމާނު
23 December 2024
ގައުމު ދަވާލަނީ އެމީހަކަށް ކެވުނު ގޮތަކަށް.
ރާވެރިބެ
23 December 2024
މަޖިލސްގެ މެމްބަރުން ނިންމި މިކަމުން އެކަނި ވެސް އެގޭ މަޖިލިސް މެމްބަރުންގެ މުސާރައާ އިނާޔަތްތަށް ކަޑަ އެޅުމުގެ ބާރު އެމީހުންނަށް ދީގެން ނުވާނެ ކަން. އިޚުލާސްތެރި ކަމެއް ނުފެނޭ. ރައީސްގެ އަތުގަ މަޖިލިސްގެ ފުލް ކޮންޓްރޯލް މިހާރު އެބަ އޮތް. އެހެން ވީމަ ރައްޔިތުންގެ ހައްގުގަ މިކަން ބަދަލު ކޮށްދެއްވާ.
މަހާ
23 December 2024
ސަރުކާރަށް އިޚްލާސްތެރިކަމާއެކު 32 އަހަރު ޚިދުމަތްކޮށްފިން. މުސާރައަށް ލިބެނީ 7000 ވަރަކަށް ރުފިޔާ. އެކަމަކު މިމީހުން އެއްދައުރު އެތާ ހަޅޭއްލަވަން އުޅުމުން 19000ރ އެވެ.
ނަޒާހަތް
23 December 2024
ނަޒާހަތްތެރި މެންބަރު އަލީ ހުސައިން މި މައްސަލަ ސްޕްރީމް ކޯޓަށް ހުށަހަޅުއްވައިގެން ރައްޔިތުންގެ ހައްގުގައި ވަކާލާތު ނުކުރަނީ ކީއްވެބާ!
އަހަންމާ343
23 December 2024
މިއީ ރައްޔިތުންގެ އެއްވެސް ބަހެއްނެތި މެންބަރުން އިމިއްލަޔަށް ނަގާފައިސާ. މިހާރުވެސް ރައްޔިތުންގެ ވޯޓެއް ނަގައިފިނަމަ މިއީ ގިނަ ބަޔަކު ނުކުރާށޭ ބުނޭނެކަމެއް. ރައްޔިތުންގެ ބަހެއްނެތި މިހާބޮޑެތި ދާއިމީ ހަރަދުތައް ރައްޔިތުންގެ ފައިސާއިން އެއްވެސް ނިޒާމެއްނެތި ކުރިމަކީ ވަރަށް ދެރަކަމެއް.
ވޯލް
23 December 2024
ތިޔަ ވަރުގެ އިނާޔަތެއް ރިޓަޔަރ ކުޜާ އުމުރަށް (55) ދިޔައީމަ ދިނުމަކުން މައްސަލައެއް ނެތް. މައްސަލައަކށް މިވަނީ، މެމްބަރުންކަމުގައި ހުންނަ އިރު މީހާގެ ކިބައިން ނަޒާހަތްތެރިން ނުފެންނާތީ އަދި ރައްޔިތުންގެ މަސްލަހަތުގައި ކަންކަން ކުރުމުގެ ބަދަލުގައި ވަކި މީހަކު ނޫނީ ޕާޓީ ބުނާގޮތައް ވޯޓުލާ ފާސްކުރާ ޤާނޫނުތަކުން ރައްޔިތުންނަށް ގެއްލުންވާތީ.
ކުލަ
23 December 2024
ކުރީގެ ރައީސުންނަށާއި، ފަނޑިޔާރުންނަށް 10 އަހަރުން ތިޔަށްވުރެން އެތައް ގުނައެއް ޮޑުކޮށް ޚަރަދުކޮށްފައި ނުވޭތޯ؟. ފުލުހުންނާ ސިފައިންގެ އިފިސަރުން ނަށް ވެސް ދޭ ބޮޑު އެއްޗެއް ރަނގަޅު ގޮތަކީ މުޅި އެތި ވަށާޖެހޭ ގޮތަށް ރިޕޯޓެއް ހެދުން. އޭރުން މަންޒަރު ސާފުވާނީ
ފައިސާ
23 December 2024
ތިހުރިހާ ކަމެއް އަދި ހިސާބު ކުރާނެ ދުވަސް އޮތީ، މިބައިމީހުން ހިތަށްނާރާ މިއީ އާންމު ރައްޔިތުންގެ ހަޒާނާ ކަމެއް.
މުސްފިރު
23 December 2024
އަހަރެން ހީކުރީ 40ހާސް 50ހާސްވަރު މީހަކަށް ލިބޭކަމަށް. 12ހާސް ރުފިޔާ ދޯ މިލިބެނީ އަސްލު. ތިޔައީ އެލަވަންސެއްގެ ގޮތުގައި ނަގާ ވަރު އެއްޗެއްވެސް ނޫންތާ، ތިޔަ ބަދުނާމު ބޮލުގަ އަޅެން.
ޗަރުކަސީ
23 December 2024
ބަލަ މީގައި މައްސަލަޔަކަށްވަނީ 40 އަހަރު ޚިދުމަތްކުރާ ސިވިލްސާވިސް މީހާޔަށް އުމުރުން 55 އަހަރުވުމުން އެކައްޗެއްވެސް ނުލިބޭގޮތަށް ގަވައިދު ހަދާތީ. އެމީހުންނަށް ދެން ލިބޭނީ 65 އަހަރުވުމުން ކޮންމެ މީހަކަށް ލިބޭ 5 ހާސްރުފިޔާ ކަމަށް ވާތީ.