ރަޝިޔާގެ ބޯޓެއް ފެތިއްޖެ، ތުހުމަތުކުރަނީ ޓެރަރިސްޓް ހަމަލާއެއް ކަމަށް

މެޑިޓެރޭނިއަންގައި ބައިނަލްއަގުވާމީ ކަނޑުގެ ސަރަހައްދަށް، ރަޝިޔާގެ މުދާ އުފުލާ ބޯޓު އަޑިއަށް ދިޔައީ "ޓެރަރިޒަމްގެ އަމަލެއް" ގެ ސަބަބުން ކަމަށް އެ ބޯޓުގެ ހިއްސާ އޮންނަ ރަޝިއާގެ ސަރުކާރު ހިއްސާވާ ކުންފުނިން ބުދަ ދުވަހު ބުނެފި އެވެ.

އޮބޮރޮންލޮޖިސްޓިކާ ކުންފުނިން ބުނީ "އުރުސާ މޭޖާ" އަށް މި މަހުގެ 23 ވަނަ ދުވަހު ދިމާވި ހާދިސާ އަޚީ ޓެރަރިސްޓް ހަމަލާއެއް ކަމަށް ގަބޫލުކުރެވޭ ކަމަށެވެ. އެކަަމަކު ހަމަލާގެ ތުހުމަތު ވަކި ބަޔަކަށް ކޮށްފައެއް ނުވެ އެވެ.

ސްޕެއިންގެ ބައިނަލްއަގްވާމީ ކަނޑުގެ ސަރަހައްދުގައި ބޯޓު އަޑިއަށް ދިޔައީ މިދިޔަ ހޯމަ ދުވަހު، އެހީއަށް އެދި ޑިސްޓްރެސް ކޯލެއް ފޮނުވި ފަހުންނެވެ.

ބޯޓު ދިޔަވެ އަޑިއަށްދާން ފެށުމުގެ ކުރިން "ޖެހިޖެހިގެން ތިން ގޮވުމެއް" ގޮވި ކަމަށް ރަޝިޔާގެ ޑިފެންސް މިނިސްޓްރީގެ ކުންފުނިން ބުންޏެވެ.

އުރުސާ މޭޖާ އަށް ދިނީ ޓެރަރިސްޓް ހަމަލާއެއް ކަމަށް ނިންމީ ކޮން ކަމަކަށް ބަލާފައި ކަމެއް ބުނެފައެއް ނުވެ އެވެ.

ރަޝިއާގެ ފޮރިން މިނިސްޓްރީގެ ކްރައިސިސް ޔުނިޓުން އަންގާރަ ދުވަހު ޓެލެގްރާމްގައި ބުނެފައިވަނީ ބޯޓު އަޑިއަށް ދިޔައީ "އިންޖީނު ރޫމްގައި އެއްޗެއް ގޮވުމުން" ކަމަށެވެ.

ބޯޓުގައި ތިބި ރަޝިއާގެ 16 ފަޅުވެރިންގެ ތެރެއިން 14 ފަޅުވެރިން ސަލާމަތްކޮށް ސްޕެއިންގެ ކާޓަޖެނާ ބަނދަރަށް ގެންގޮސްފައިވާ ކަމަށާއި ދެ މީހަކު ގެއްލިފައިވާ ކަމަށް ވެސް އެ ބަޔާނުގައިވެ އެވެ.

ސްޕެއިންގެ ސީ ރެސްކިއު ސާވިސްއިން ނެރުނު ބަޔާނެއްގައި ބުނީ މޫސުން ގޯސްވުމުގެ ސަބަބުން އެ ބޯޓު ދެކުނުއިރުމަތީ ސްޕެއިންގެ އައްސޭރިފަށުން ހޯމަ ދުވަހުގެ ހެނދުނު ޑިސްޓްރެސް ކޯލެއް ފޮނުވާފައިވާ ކަމަށެވެ.

ސްޕެއިނުން ހެލިކޮޕްޓަރާއި ރެސްކިއު ބޯޓުތައް ފޮނުވައި ފަޅުވެރިން ބަނދަރަށް ގެންގޮސްފައިވާ ކަމަށް އެ ސާވިސް އިން ބުންޏެވެ.

އޭގެ ފަހުން ރަޝިއާގެ ހަނގުރާމަމަތީ އުޅަނދެއް ގޮސް ބޯޓު ސަލާމަތްކުރުމުގެ މަސައްކަތާ ހަވާލުވި ކަމަށާއި އޭރު ބޯޓު އޮތީ ސްޕެއިން އާއި އަލްޖީރިއާގެ ކަނޑުގެ ސަރަހައްދާ ދެމެދުގައި ކަމަށް ވެސް ސްޕެއިނުން ބުންޏެވެ. ބޯޓު އަޑިއަށް ދިޔައީ ރޭގަނޑު އެވެ.

ރަޝިއާގެ އޮބޮރޮންލޮޖިސްޓިކާގެ ސަބްސިޑަރީ ކުންފުންޏެއްގެ ހިއްސާ އޮންނަ އެ ކުންފުންޏަކީ ޑިފެނސް މިނިސްޓްރީއަށް ނިސްބަތްވާ އަދި މަދަނީ ދަތުރުފަތުރާއި ލޮޖިސްޓިކްސް ވެސް ފޯރުކޮށްދޭ ކުންފުންޏެއް ކަމަށް ރަޝިއާގެ ފޮރިން މިނިސްޓްރީން ބުނެފައިވެ އެވެ.

އެމެރިކާއިން 2022 ވަނަ އަހަރު އޮބޮރޮންލޮޖިސްޓިކާ އާއި އުރުސާ މޭޖާ ފަދަ އުޅަނދުތަކަށް ދަތިކުރުމުގެ ފިޔަވަޅު ވެސް ވަނީ އަޅައިފަ އެވެ. އެއީ ރަޝިޔާއިން ހިފާފައިވާ ކްރިމިއާއަށް ދަތުރުފަތުރުގެ ހިދުމަތް ދީ މުދާ އުފުލުމަށް ބޭނުންކުރާތީ އެވެ.

ޔޫކްރެއިންގެ ޖީޔޫއާރް މިލިޓަރީ އިންޓެލިޖެންސުން ބުނީ އުރުސާ މޭޖާ އަކީ ސީރިއާ އާއި ރަޝިޔާއާ ދެމެދު ސިފައިން އުފުލުމަށް ވެސް ބޭނުންކުރާ އުޅަނދެއް ކަމަށެވެ.