ބޭންކް އޮފް މޯލްޑިވްސް (ބީއެމްއެލް)ގެ ސްޕޯޓްސް ސްކޮލާޝިޕަށް މިއަހަރު ހޮވުނު އެތުލީޓް އިއުލާނުކޮށްފި އެވެ.
ބީއެމްއެލްއިން ދޭ ސްކޮލަޝިޕް މި އަހަރު ލިބުނީ އެތްލެޓިކްސްގައި މިހާރު ރާއްޖޭގައި ފާހަގަ ކޮށްލެވޭ އާއިޝަތު ހިމްނާ ހަސަންއަށެވެ. އޭނާއަށް މި ސްކޮލަޝިޕްގެ ދަށުން އެއް އަހަރު ޖެމެއިކާގައި ހުންނަ ސްޕްރިންޓެކް ޓްރެކް ކްލަބުން ޓްރެއިނިން ހޯދުމުގެ ފުރުސަތު ލިބޭނެ އެވެ.
މި ސްކޮލަޝިޕްގައި މިދިޔަ އަހަރު ހަތް އެތުލީޓަކަށް ފުރުސަތު ދިނެވެ.
ބީއެމްއެލްއިން ބުނި ގޮތުގައި އެ ސްކޮލާޝިޕަކީ އެތުލީޓުންގެ ހުނަރު ތަރައްގީކޮށް، ކުޅިވަރުގައި ފުރިހަމަ ކާމިޔާބީއެއް ހޯދުމުގައި އެހީތެރިވުމުގެ ގޮތުން ދޭން ފެށި ސްކޮލާޝިޕެކެވެ. އެ ޕްރޮގްރާމުގެ ދަށުން ރާއްޖޭގެ މޮޅު އެތުލީޓުންނަށް ހުރިހާ ހަރަދަކާއެކު ރާއްޖެއިން ބޭރުގެ ހައި ޕާފޯމަންސް ޓްރެއިނިން ސެންޓަރުތަކުގައި ތަމްރީން ހޯދުމުގެ ފުރުސަތު ހޯދައިދޭނެ ކަމަށް ބީއެމްއެލްއިން ބުނެ އެވެ.
މޯލްޑިވްސް އޮލިމްޕިކް ކޮމިޓީ (އެމްއޯސީ) އާ ގުޅިގެން ހިންގާ މި ސްކޮލަރޝިޕަށް އެތުލީޓުން ހޮވާފައިވަނީ އެމްއޯސީންނެވެ.