މޫދުގައި އުޅެނިކޮށް ޒުވާނެއްގެ ކަރަށް ތޮޅިއެއް ހެރި އަނިޔާވެއްޖެ އެވެ.
ރ. މީދޫ އެ މީހާގެ އާއިލާއިން މިއަދު ވާހަކަދެއްކި މީހަކު ބުނީ، އެ އަތޮޅު މަޑުއްވަރީ ދޯންޏެއްގައި މަހަށްދާ ޒުވާނާގެ ކަރަށް މީގެ ދެ ދުވަސް ކުރިން ތޮޅިއެއް ހެރުނީ ފ. އަތޮޅު ހިސާބުގައި ރޭގަނޑު ސްނޯކަލްކުރަން އުޅެނިކޮށް ކަމަށެވެ. އެ ތޮޅި ހެރުނު ގޮތުން ކަރުގެ ނާރަށް ގެއްލުންވެފައިވާ ކަމަށް ބުންޏެވެ.
އޭނާއަށް މިހާރު އަންނަނީ އައިޖީއެމްއެޗްގައި ފަރުވާ ދެމުންނެވެ. އިމަޖެންސީގައި ފަރުވާ ދިނުމަށްފަހު މިހާރު ވަނީ ވޯޑަށް ބަދަލުކޮށްފަ އެވެ.
އެ އަނިޔާއާ ގުޅިގެން އޮޕަރޭޝަން ކުރަންޖެހެނީ އޮބްޒާވްކޮށްގެންނެވެ. ނަމަވެސް، ރާއްޖޭގައި އެގޮތަށް އޮބްޒާވްކޮށްގެން އޮޕަރޭޝަން ކުރެވެން ނެތުމުން އާއިލާއިން މިހާރު އަންނަނީ އިންޑިއާއަށް ދިއުމަށް ތައްޔާރުވަމުންނެވެ.
މޫދުގައި އުޅެނިކޮށް ތޮޅީގެ ހަމަލާ އަމާޒުވުމަކީ ރާއްޖޭގައި ހިނގާ ކަމެކެވެ.