ހަމަލާތައް ހުއްޓާލުމުގެ ހިތްހަމަޖެހުމާ އެކު ރައީސް އެދިވަޑައިގަތީ ލިބުނު ގެއްލުމުގެ ބަދަލު އިޒްލޭރުން ދޭން

ފަލަސްތީނުގެ ޣައްޒާގައި ދެމުން ގެންދާ ހަމަލާތައް ހުއްޓާލުމަށް އެއްބަސްވާން މެދުވެރިވި ފަރާތްތަކުގެ އަގު ވަޒަން ކުރައްވާ ކަމަށާއި އެކަމަކު ފަލަސްތީނުގެ ރައްޔިތުންނަށް ލިބުނު ގެއްލުމުގެ ބަދަލު އިޒްރޭލުން ދޭން ޖެހޭ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.

ޣައްޒާގައި ދެމުން ގެންދާ ހަމަލާތައް ހުއްޓާލުމަށާއި ހަމާސް އިން ރަހީނު ކޮށްފައިވާ އިޒްރޭލު މީހުން މިނިވަންކުރުމަށް ދެ ފަރާތުން އެއްބަސްވުމާ ގުޅިގެން ރޭ "އެކްސް" ގައި ރައީސް މުއިއްޒު އެކަމުގެ ހިތްހަމަޖެހުން ފާޅުކުރެއްވި އެވެ. ރައީސް ވިދާޅުވި ގޮތުގައި، 15 މަސް ވަންދެން މެދުކެނޑުމެއް ނެތި އިޒްރޭލުން ފަލަސްތީނުގެ ރައްޔިތުންނާ ދެކޮޅަށް ހިންގަމުންދިޔަ ޖަރީމާތައް ހުއްޓާލަން އެއްބަސްވުމަކީ އެ މަނިކުފާނުގެ ހިތްޕުޅަށް ހަމަޖެހުން ލިބިވަޑައިގެންނެވި ކަމެއް ކަމަށެވެ.

"އެ ކަމަށް މެދުވެރިވި ހުރިހާ ފަރާތްތަކުގެ އަގު ރާއްޖެ އިން ވަޒަންކޮށް އެ ކަން ފާހަަގަކުރަން،" ރައީސް ވިދާޅުވި އެވެ.

އެކަމަކު، ރައީސް މުއިއްޒު އެންމެ ބޮޑަށް ބާރު އެޅުއްވީ، ހަމަލާތައް ހުއްޓާލުމަށް ނިންމި ނިންމުން ދެމެހެއްޓުމަށާއި ގެދޮރު ގެއްލިފައިވާ މީހުންނަށް އެ މީހުންގެ ވަޒަނަށް އަނބުރާ ދެވޭނެ ފުރުސަތު ފަހިކޮށްދިނުމަށެވެ. އެކަން ކަމާ ބެހޭ ފަރާތްތަކުން ކަށަވަރު ކުރުމަށް އެ މަނިކުފާނު އެދިވަޑައިގަތެވެ.

އިންސާނީ އެހީ އަށް ފުރުސުތު ދިނުމަށް، ބައިނަލްއަގުވާމީ މުޖުތަމައުގެ ކިބައިން އެ ރައީސް އެދިވަޑައިގަތެވެ. އަދި އިޒްރޭލުން ފަލަސްތީނަށް ދިން ހަމަލާތަކާ ގުޅިގެން ފަލަސްތީނުގެ ރައްޔިތުންނަށް ލިބުނު ގެއްލުމުގެ ބަދަލުދޭން ޖެހޭނޭ ކަމަށް ރައީސް މުއިއްޒު ވިދާޅުވި އެވެ.

"ފަލަސްތީނަށް ލިބުނު ގެއްލުމުގެ ބަދަލު ދޭން އިޒްރޭލަށް އަޅުގަނޑުމެން ގޮވާލަން. އަދި އިޒްރޭލުން ދިން ހަމަލާތަކުގައި ސުންނާފަތިވެފައިވާ އިމާރާތްތަކާއި ބިންތައް، އަލުން އާރާސްތުކުރުމަށް ބޭނުންވާ އަވަސް އެހީ ފަލަސްތީނަށް ފޯރުކޮށްދޭން ބައިނަލްއަގްވާމީ ފަރާތްތަކުގެ ކިބައިން އެދެން،" ރައީސް ވިދާޅުވި އެވެ.

ފަލަސްތީނުގެ ރައްޔިތުންގެ ދިފާއުގައި މި ސަރުކާރުން އަދި ރައީސް މުއިއްޒު އެކިއެކި ޕްލެޓްފޯމްތަކުގައި ވަރަށް ގިނަ ވާހަކަފުޅުތައް ވަނީ ދައްކަވައިފަ އެވެ. އދ ގެ ސަލާމަތީ މަޖިލީހުގެ 79 ވަނަ ސެޝަންގައި ރައީސް ވަނީ ގައުމަކުން އިންސާނީ ހައްގުތަކަށް އަރައިގަންނަ އިރު، އެކަން ތަހައްމަލުކޮށްގެން ތިބެގެން ނުވާނެ ކަމަށް ވިދާޅުވެފަ އެވެ. އެފަދަ ހާލަތެއްގައި، އެ ގައުމެއްގެ ކުޑަބޮޑު މިނަކީ ނުވަތަ އެ ގައުމެއްގެ މުއްސަނދިކަމަކީ ބަހަނާއަކަށް ވެގެން ނުވާނެ ކަމަށް ވެސް އެ މަނިކުފާނު ވިދާޅުވެފައި ވެ އެވެ.

Gaza ge hamalaathah huttaalan ebbas vejje

The most trusted news source in the Maldives

Mihaaru

ފަލަސްތީނަށް ދެމުން ގެންދާ ހަމަލާތައް ހުއްޓާލުމުގެ އެއްބަސްވުން ތަންފީޒު ކުރުމުގެ ފުރަތަމަ މަރުހަލާގައި ހަމާސް އިން އިޒްރޭލުގެ 33 ރަހީނަކު މިނިވަންކުރާނެ ކަމަށް ވަނީ ބެލެވިފަ އެވެ. އޭގެ ބަދަލުގައި ފަލަސްތީނުގެ އެތައް ސަތޭކަ ބަޔަކު އިޒްރޭލުގެ ޖަލުތަކުން މިނިވަން ކުރާނެ އެވެ.

ގައިދީން މިނިވަންކުރުމަކީ ހަމަލާތައް ހުއްޓާލުމުގެ އެއްބަސްވުމުގެ ފުރަތަމަ މަރުހަލާ އެވެ. ހަމަލާތައް ހުއްޓާލުމުގެ މަޝްވަރާތައް ފަށާނީ ދެ ފަރާތުން ގައިދީން މިނިވަންކޮށް ނިންމުމަށް ފަހު، އެއްބަސްވުން ތަންފީޒުކުރަން ފަށާތާ 16 ވަނަ ދުވަހު އެވެ.