ފަލަސްތީނުގެ ޣައްޒާގައި ދެމުން ގެންދާ ހަމަލާތައް ހުއްޓާލުމަށާއި ހަމާސް އިން ރަހީނުކޮށްފައިވާ އިޒްރޭލު މީހުން މިނިވަންކުރުމަށް ދެ ފަރާތުން އެއްބަސްވެއްޖެ އެވެ.
އެއްބަސްވުމާ ބެހޭ މައުލޫމާތު އެނގިވަޑައިގަންނަވާ އޮފިޝަލަކު މިކަން އޭއެފްޕީ އަށް ވަނީ ކަށަވަރުކޮށްދެއްވައިފަ އެވެ.
"ޣައްޒާގެ ހަމަލާތައް ހުއްޓާލުމަށް އެއްބަސްވީ ގަތަރުގެ ބޮޑުވަޒީރު ހަމާސްގެ މަންދޫބުންނާއި އިޒްރޭލުގެ މަންދޫބުންނާ ވަކިވަކިން ބޭއްވެވި ބައްދަލުވުންތަކަށް ފަހު،" ނަން ހާމަ ނުކުރަން ޝަރުތުކޮށް އޭއެފްޕީއާ ވާހަކަ ދެއްކެވި އޮފިޝަލް ވިދާޅުވި އެވެ.
އޭގެ ފަހުން އެމެރިކާގެ އިންތިހާބީ ރައީސް ޑޮނަލްޑް ޓްރަމްޕް ވެސް ވަނީ އެއްބަސްވުމަކަށް އާދެވިއްޖެ ކަމަށް ވިދާޅުވެ މަރުހަބާ ވިދާޅުވެފަ އެވެ.
ހަމަލާތައް ހުއްޓާލުމަށް އެއްބަސްވެއްޖެ ކަމުގެ ޚަބަރާ އެކު ޣައްޒާގައި އާންމުން ދަނީ އުފާ ފާޅުކުރަމުންނެވެ.
އެއްބަސްވުމުގައި އޮތީ ކޮންކަމެއް؟
އެއްބަސްވުން ތަންފީޒުކުރުމުގެ ފުރަތަމަ މަރުހަލާގައި ހަމާސް އިން އިޒްރޭލުގެ 33 ރަހީނަކު މިނިވަންކުރާނެ ކަމަށް ވަނީ ބެލެވިފަ އެވެ. އަދި އޭގެ ބަދަލުގައި ފަލަސްތީނުގެ އެތައް ސަތޭކަ ބަޔަކު އިޒްރޭލުގެ ޖަލުތަކުން މިނިވަންކުރާނެ އެވެ.
ގައިދީން މިނިވަންކުރުމަކީ ހަމަލާތައް ހުއްޓާލުމުގެ އެއްބަސްވުމުގެ ފުރަތަމަ މަރުހަލާ އެވެ. ހަމަލާތައް ހުއްޓާލުމުގެ މަޝްވަރާތައް ފަށާނީ ދެ ފަރާތުން ގައިދީން މިނިވަންކޮށް ނިންމުމަށް ފަހު، އެއްބަސްވުން ތަންފީޒުކުރަން ފަށާތާ 16 ވަނަ ދުވަހު އެވެ.
ޣައްޒާގެ އުތުރު ސަރަހައްދުން ނެރެލާފައިވާ ފަލަސްތީނުގެ އާންމުން އެނބުރި އެ ސަރަހައްދަށް ދިއުމުގެ ހުއްދަ ވެސް އެއްބަސްވުމުގެ ދަށުން ލިބޭނެ އެވެ. އިޒްރޭލުގެ ހިސާރުކުރުމާ ހެދި ކާބޯތަކެއްޗާއި އަސާސީ އެހެނިގެން ސާމާނު ވެސް ހުސްވެފައިވާ ޣައްޒާއަށް މި އެއްބަސްވުމުގެ ދަށުން އިންސާނީ އެހީ ވެސް ގިނަ އަދަދަކަށް ފޯރުކޮށްދޭން ޖެހޭނެ އެވެ.
އެއްބަސްވުމުގެ ފުރަތަމަ މަރުހަލާގައި އިޒްރޭލު ސިފައިން ފަލަސްތީނުގެ އާންމުންގެ ސަރަހައްދުތަކުން ފައިބަން ފަށާނެ އެވެ. އެކަމަކު ޣައްޒާ-މިސްރު ބޯޑަރު ކައިރީ އަދި ތިބޭނެ އެވެ. މީގެ އިތުރުން އިޒްރޭލުން ޣައްޒާ ތެރޭގައި ބަފަ ޒޯނެއް ވެސް ގާއިމުކުރާނެ އެވެ. މިއީ އެއްބަސްވުމަކަށް އައުމުގައި އެންމެ ބޮޑު މައްސަލައަކަށްވި ކަންތަކެވެ.
ހަމާސް އިން އިޒްރޭލު އަންހެން ސިފައިންގެ ފަސް މީހަކު މިނިވަންކުރަން ނިންމާފައި ވާއިރު އެ މީހުންގެ ބަދަލުގައި އިޒްރޭލުގެ ޖަލުތަކުން ފަލަސްތީނުގެ 50 މީހަކު ދޫކޮށްލަންޖެހޭނެ އެވެ. މީގެ ތެރޭގައި އިޒްރޭލުގެ ކޯޓުތަކުން ކުށްވެރިން ކަމަށް ކަނޑައަޅައި އުމުރަށް ޖަލަށް ލާފައިވާ 30 މީހަކު ވެސް ހިމެނެ އެވެ.
އެއްބަސްވުމުގެ ފުރަތަމަ މަރުހަލާއިން ބޭރުން ހަނގުރާމަ ހުއްޓާލުމުގެ މަސައްކަތް ކުރިއަށް ގެންދާނެ ކަމުގެ ޔަގީންކަމެއް ނެތެވެ. ނަމަވެސް އޮފިޝަލުން ވިދާޅުވެފައިވަނީ އިޒްރޭލުން ބޭނުންވަނީ ހުރިހާ ރަހީނުން ސަލާމަތްކުރަން ކަމަށާއި އެހެންވެ ހެޔޮ ނިޔަތުގައި އެއްބަސްވުމުގެ ދެ ވަނަ މަރުހަލާ ކަމަށްވާ ހަމަލާތައް ހުއްޓާލުމާ ހަމަޔަށް ދާނެ ކަމަށެވެ. މިކަމުގެ ނަތީޖާ އަކީ ޣައްޒާއިން އިޒްރޭލުގެ ހުރިހާ ސިފައިންނެއް ފޭބުން ކަމުގައި ވެސް ވެދާނެ ކަމަށް ބައެއް އޮފިޝަލުން ވިދާޅުވި އެވެ.
އިޒްރޭލުން އެއްވެސް އަމުރަކަށް ތަބައެއްނުވޭ
އިޒްރޭލުން ޣައްޒާއަށް ހަމަލާދޭން ފެށީ އޮކްޓޫބަރު 7، 2023 ގައި އިޒްރޭލަށް ހަމާސް އިން ދިން ކުއްލި ހަމަލާތަކަށް ފަހުގަ އެވެ. އިޒްރޭލުގެ ހާހަކަށްވުރެ ގިނަ މީހުން މަރާލައި 250 އަށް ވުރެ ގިނަ މީހުން އެ ހަމަލާތަކުގައި ރަހީނުކުރި އެވެ.
ބަދަލު ހިފުމަށް އިޒްރޭލުން ދޭން ފެށި ހަމަލާތަކުގައި ފަލަސްތީނުން މިހާތަނަށް 46،645 މީހަކު ވަނީ ޝަހީދުކޮށްލައިފަ އެވެ. އަދި 110،000 އަށް ވުރެ ގިނަ މީހުންނަށް ބޮޑެތި ޒަހަމްތައް ލިބިފައިވާ ކަމަށް ވެސް ޣައްޒާގެ ހެލްތު މިނިސްޓްރީން ވަނީ ބުނެފަ އެވެ.
އިޒްރޭލުން ފަލަސްތީނުގެ ޣައްޒާއަށް ދެމުން ގެންދާ ހަމަލާތަކުގައި ޖެނޮސައިޑް ކޮންވެންޝަނާ ހިލާފް އަމަލުތައް ހިންގާ ކަމަށް ބެލެވޭ ކަންކަން ހުރުމުން އެފަދަ އަމަލުތައް ވަގުތުން ހުއްޓާލައި އިންސާނީ އެހީ ފޯރުކޮށްދެވޭނެ މަގު ތަނަވަސްކޮށްދޭން އިންޓަނޭޝަނަލް ކޯޓް އޮފް ޖަސްޓިސް (އައިސީޖޭ) އިން ވެސް ވަނީ މިދިޔަ އަހަރުގެ ޖެނުއަރީ މަހު އަމުރު ނެރެފަ އެވެ. އަދި އޭގެ ފަހުން ވެސް މިފަދަ އަމުރެއް ނެރެފައި ވާއިރު މިއިން އެއްވެސް ކަމަކަށް އިޒްރޭލު ތަބައެއް ނުވެ އެވެ. މި އަމުރުތަކަށް ބޯ ނުލަނބާ އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ އާއި އޭނާގެ ކުރީގެ ޑިފެންސް މިނިސްޓަރު ޔޯވް ގަލަންޓް ހައްޔަރުކުރަން ވެސް އިންޓަނޭޝަނަލް ކްރިމިނަލް ކޯޓުން ވަނީ އަމުރު ނެރެފަ އެވެ.