ރ. އަތޮޅުގެ 11 ރަށަކަށް ކުރައްވާ ރަސްމީ ދަތުރުފުޅެއް ރައީސް ޑރ. މުހައްމަދު މުއިއްޒު މިއަދު ފުރާވަޑައިގެންފި އެވެ.
ތިން ދުވަހުގެ މި ދަތުރުފުޅުގައި އެ މަނިކުފާނު މިއަދު ވަޑައިގަންނަވާނީ ވާދު އާއި ރަސްގެތީމާއި އަނގޮޅެތީމާއި ހުޅުދުއްފާރާއި އުނގޫފާރަށެވެ.
މާދަމާ ވަޑައިގަންނަވާނީ މާކުރަތާއި މަޑުއްވަރި އާއި ރަސްމާދޫ އަދި އިންނަމާދޫ އަށެވެ.
ދަތުރުފުޅުގެ އެންމެ ފަހު މަންޒިލަކަށް ބުރާސްފަތި ދުވަހު ވަޑައިގަންނަވާނީ ފައިނާއި ކިނޮޅަހަށެވެ.
ރައީސް މުއިއްޒު ރ. އަތޮޅަށް ކުރައްވާ މި ދަތުރުފުޅަކީ ވެސް ރާއްޖޭގެ ހުރިހާ އަތޮޅަކަށް ޒިޔާރަތް ކުރެއްވުމަށާއި އަތޮޅުތަކާއި ރަށްތަކާއި ސިޓީތަކުގެ ލޯކަލް ކައުންސިލްތަކާ ބައްދަލުކުރެއްވުމަށް މިދިޔަ އަހަރު ފައްޓަވައިގެން ކުރިއަށް ގެންދަވާ ސިލްސިލާ ދަތުރުފުޅުތަކުގެ ތެރޭގައި ހިމެނޭ ދަތުރުފުޅެކެވެ. މި ސިލްސިލާގެ ދަތުރުފުޅުތަކުގައި ރައީސް މި މަހުގެ ކުރީކޮޅު އެންމެ ފަހުން ވަޑައިގަތީ ގއ. އާއި ގދ އަތޮޅުގެ ބައެއް ރަށްރަށަށެވެ.
