ކުއްޖާއަށް އަނިޔާކުރި މުވައްޒަފުން ވަޒީފާއިން ވަކިކޮށް، ކްލިނިކް ވަގުތީ ގޮތުން ބަންދުކޮށްފި

ހުޅުމާލޭގައި ހުންނަ "ފިޒިއޯ ކްލިނިކް" އަށް ތެރަޕީ ނަގަން ދިޔަ ކުޑަކުއްޖަކަށް އަނިޔާކުރުމުގައި ޝާމިލްވި ދެ މުވައްޒަފަކު ވަޒީފާއިން ވަކިކޮށް، އެ ކްލިނިކް ވަގުތީ ގޮތުން މިއަދު ބަންދުކޮށްފި އެވެ.

އެ ދެ މުވައްޒަފުންގެ މައްސަލައާ ގުޅިގެން ފިޒިއޯ ކްލިނިކުން ނެރުނު ނޫސްބަޔާނެއްގައި ބުނީ، އެ ކްލިނިކުގައި މުވައްޒަފަކާއި އެތަނުގެ ބެލުމުގެ ދަށުގައި ހުރި ކުއްޖަކާ ދެމެދުގައި ހިނގި މި ހާދިސާގެ ސަބަބުން ވަރަށް ބޮޑަށް ކަންބޮޑުވެ، ހިތާމަކުރާ ކަމަށެވެ. މިފަދަ އަމަލުތަކަކީ އެއްގޮތަކަށް ވެސް ގަބޫލު ކުރެވޭނެ ކަމެއް ނޫން ކަމަށާއި އެއީ އެ ކްލިނިކުން ގެންގުޅޭ އަހުލާގީ މިންގަނޑުތަކާއި އުސޫލުތަކާ ވެސް ހިލާފަށް ހިންގާފައިވާ ކަމެއް ކަމަށް އެ ބަޔާނުގައި ބުންޏެވެ.

އެ ކްލިނިކުން ބުނީ މިކަން ސަމާލުކަމަށް އައުމާ އެކު، ވަގުތުން ފިޔަވަޅު އެޅި ކަމަށާއި އެ މައްސަލާގައި ޝާމިލުވި ދެ މުވައްޒަފުން ވަޒީފާއިން ވަކިކޮށްފައިވާ ކަމަށެވެ. އެ މައްސަލަ ވަގުތުން ފުލުހުންނަށް ރިޕޯޓްކޮށް، ކަމާ ގުޅޭ ހުރިހާ ވީޑިއޯ ފުޓޭޖެއް ވެސް ފުލުހުންގެ ތަހުގީގާ ހިއްސާކޮށްފައިވާ ކަމަށް ބުންޏެވެ.

"މިކަމުގެ ސީރިއަސް ކަމަށް ބަލައި، ފިޒިއޯ ކްލިނިކް ވަގުތީ ގޮތުން ބަންދުކުރުމަށް ވަނީ ނިންމައިފައި،" އިނގިރޭސި ބަހުން ނެރުނު އެ ބަޔާނުގައި ބުންޏެވެ.

އެ ކްލިނިކުން ބުނި ގޮތުގައި، އެތަނުގެ އެންމެ މުހިންމު ޒިންމާއަކީ ހިދުމަތް ހޯދާ ކުދިންނާއި އާއިލާތަކަށް ރައްކާތެރި، އިހުތިރާމް ލިބޭ އަދި އެހީތެރިކަން ލިބޭ މާހާއުލެއް ގާއިމްކޮށްދިނުމެވެ. ތެރަޕީ ދޭ ކޮޓަރިތައް ލައިވްކޮށް މޮނިޓާ ކުރުމަކީ އެ ކްލިނިކުގެ އާންމު ހިންގުމުގެ އުސޫލުތަކުގެ ބައެކެވެ. މޮނިޓާކުރުމުގެ ފުރުސަތު ބެލެނިވެރިންނަށް ވެސް ދެ އެވެ. އެއީ އެ ތަނުން ދޭ ހިދުމަތް ދެފުށް ފެންނަ އަދި ޖަވާބުދާރީ ވެވޭނެ ގޮތެއްގައި ދިނުމަށް ކުރާ ކަމެއް ކަން ފާހަގަކުރި އެވެ.

"އަޅުގަނޑުމެން މި މައްސަލަ ވަރަށް ސީރިއަސްކޮށް ނަގަން. އަދި ކުރިއަށް އޮތް ތަނުގައި އެންމެ މަތީ ފެންވަރުގެ ހިދުމަތް ދީ، ރައްކާތެރިކަމާއި ޒިންމާދާރުކަން ދެމެހެއްޓުމަށް ފުރިހަމައަށް މަސައްކަތްކުރާނެ ކަމުގެ ޔަގީންކަން ދެން. ކަމާބެހޭ ފަރާތްތަކަށް ފުރިހަމަ އަށް އެއްބާރުލުން ދީ، މިކަމާ ގުޅިގެން އަޅަން ޖެހޭ ހުރިހާ ފިޔަވަޅެއް އަޅާނަން،" ފިޒިއޯ ކްލިނިކުގެ ބަޔާނުގައި ބުންޏެވެ.

Therapy nagan dhiya kujjakah jismaanee aniyaa kuri massala balanee

The most trusted news source in the Maldives

Mihaaru

ފުލުހުން މިއަދު ބުނީ އެކަން ހިނގާފައި ވަނީ މި މަހުގެ ފަސް ވަނަ ދުވަހު ކަމަށެވެ. ތެރަޕީ ނަގަން ދިޔަ ކުއްޖަކަށް ޖިސްމާނީ ގޮތުން އަނިޔާ ވެދާނެ ގޮތަކަށް އަމަލު ކޮށްފައިވާ ކަމަށް ތުހުމަތުކުރެވޭ އެ މައްސަލަ އެ އިދާރާއަށް ރިޕޯޓްކުރީ އިއްޔެ ކަމަށް ވެސް ފުލުހުން ބުންޏެވެ.

އެ ކުއްޖާއަށް އަނިޔާކުރާ މަންޒަރު ފެންނަ ވީޑިއޯއެއް ސޯޝަލް މީޑިއާގައި މިހާރު ވަނީ އާންމުވެފަ އެވެ.

އެ ވީޑިއޯ އިން ފެންނަނީ ކްލިނިކުގެ މުވައްޒަފަކު އެ ކުއްޖާގެ ފަހަތުން ކަތުރެއް ހިފައިގެން ދުވާ މަންޒަރެވެ. އޭނާގެ ކިބައިން ސަލާމަތްވާ އެ ކުއްޖާ އުޅޭތަން ވެސް ފެނެ އެވެ. އެކަން ހިނގިއިރު އެ ތަނުގައި އިތުރު މުވައްޒަފަކު ވެސް އުޅޭއިރު، އިތުރު ކުއްޖަކު އެތަނުގައި ހުރި މޭޒު ކައިރީގައި އިނެވެ.

އެ ކުއްޖާގެ އަތަށް ކަތުރު ހަރާފައި ހުރި ކަމަށް ބުނާ ފޮޓޯތަކެއް ވެސް ސޯޝަލް މީޑިއާގައި ދަނީ ދައުރުކުރަމުންނެވެ.