ވިނަރެސްގެ ޓަވަރެއްގައި އެޗްޑީސީގެ އޮފީހެއް ހުޅުވައިފި

ހުޅުމާލެ ފޭސް 2 ގައި ހުންނަ ވިނަރެސްގެ ޓަވަރެއްގައި ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) ގެ އޮފީހެއް މިއަދު ހުޅުވައިފި އެވެ.

އެ އޮފީސް ހުޅުވީ ވިނަރެސްގެ ހަވަނަ ޓަވަރުގެ ފުރަތަމަ ފުލޯގަ އެވެ.

އެޗްޑީސީން ބުނީ އެ ކުންފުނިން ދެމުންދާ ހިދުމަތްތަކުގެ ފެންވަރު ރަނގަޅު ކުރުމަށް ކުރަމުން އަންނަ މަސައްކަތްތަކުގެ ދަށުން ވިނަރެސްގެ ހަވަނަ ޓަވަރުގައި އެޗްޑީސީގެ ކަސްޓަމާ ކެއާ އޮފީހެއް ހުޅުވާފައިވާ ކަމަށެވެ.

އެއީ ހުޅުމާލޭގެ ދެވަނަ ފިޔަވަހީގައި ދިރިއުޅޭ ރައްޔިތުންނަށް ލުއިފަސޭހަކޮށްދީ، އެ ކުންފުނީގެ ކަސްޓަމާ ކެއާ މެދުވެރިކޮށް މައުލޫމާތު ސާފުކުރެވޭނެ މަގު ފަހިކުރުމަށް ހުޅުވި އޮފީހެއް ކަމަށް އެޗްޑީސީން ބުންޏެވެ.

އެޗްޑީސީން ބުނި ގޮތުގައި، ކަސްޓަމަރުންނަށް މައުލޫމާތު ސާފުކޮށްދިނުމާއި އެކި ބާވަތުގެ ފޯމު އެޕްލިކޭޝަންތަކާއި ފައިސާ ބަލައިގަތުމުގެ ހިދުމަތްތައް ވެސް އެ އޮފީހުން ލިބޭނެ އެވެ. ރަސްމީ ބަންދު ނޫން ކޮންމެ ދުވަހެއްގެ ހެނދުނު 09:00 އިން މެންދުރު ފަހު 02:00 އަށް އެ އޮފީސް ހުޅުވާފައި ހުންނާނެ ކަމަށް އެ ކުންފުނިން ބުންޏެވެ.

އެޗްޑީސީން ބުނީ އެ އޮފިސް ހުޅުވުމާ އެކު، ހިޔާ ޓަވަރެއްގައި ކުރިން ހުރި އެޗްޑީސީގެ އޮފީސް ދާއިމީކޮށް ބަންދުކޮށް، އެ އޮފީހުން ދެމުންދިޔަ ހުރިހާ ހިދުމަތެއް އާ އޮފީހަށް ބަދަލުކޮށްފައިވާ ކަމަށެވެ.

އެ ކުންފުނިން އަބަދުވެސް މަސައްކަތް ކުރަނީ އެ ކުންފުނިން ދެމުންދާ ހިދުމަތްތަކުގެ ފެންވަރު ރަނގަޅުކޮށް، ރައްޔިތުންނަށް ލުއިފަސޭހަ ގޮތްތައް މަގުފަހިކޮށްދިނުމަށް ކަމަށް އެޗްޑީސީން ބުންޏެވެ.