ޖާހު ފްލެޓުތަކުގެ ބާކީ މަސައްކަތްތައް މި މަހުގެ ނިޔަލަށް ނިންމައި އެޗްޑީސީއާ ހަވާލު ކުރާނެ: އާރުސީސީ

ޖާހު އިންވެސްޓްމަންޓު ކުންފުނިން ހުޅުމާލޭގައި ހަދަމުން އަންނަ އެޕާޓްމަންޓުތަކުގެ ބާކީ މަސައްކަތްތައް މި މަހަށް ނިންމާލެވޭނެ ކަމަށް އެޗްޑީސީން އެ މަސައްކަތް ހަވާލުކުރި އާރުސީސީން މިއަދު ބުނެފި އެވެ.

ހުޅުމާލޭ 1 ގައި ހަދާ "ދަ ގާޑަންސް" ޕްރޮޖެކްޓުގެ ބައިތައް ނިންމަން 20 މިލިއަން ރުފިޔާ އަށް އާރުސީސީއާ ހަވާލުކުރީ މިދިޔަ ޖޫން 2 ގަ އެވެ. ހަތަރު މަސް ދުވަހަށް ހަވާލުކުރި ޕްރޮޖެކްޓުގެ މުއްދަތު މި މަހުގެ 2 ގައި ހަމަވި ނަމަވެސް އެ މަސައްކަތުން އަދި އެއްކޮށް ނިންމައި ނުލެވެ އެވެ.

"އަޅުގަނޑުމެންނާ މަސައްކަތް ހަވާލުވިއިރު 30 ޕަސެންޓު މަސައްކަތް ހުރީ ނުނިމި. އެ ހުރިހާ ކަމެއް ނިންމަން އަޅުގަނޑުމެންނަށް ޖެހުނު. އެއީ ވަރަށް ބޮޑެތި މަސައްކަތްތަކެއް،" އާރުސީސީގެ ޗެއާމަން މުހައްމަދު ނާޒިމް "މިހާރު" އަށް މިއަދު ވިދާޅުވި އެވެ.

އެޗްޑީސީގެ އިސް އޮފިޝަލަކު "މިހާރު" އަށް ވިދާޅުވެފައި ވަނީ ޖާހު ފްލެޓުތައް ނިންމުމުގެ އަމަލީ މަސައްކަތް ވެސް ފެށުނީ އިދާރީ ކަންކަން ފުރިހަމަ ކުރުމަށް ފަހު ތަންކޮޅެއް ލަހުން ކަމަށެވެ.

"ބައެއް މަސައްކަތްތަކަށް ބޮޑެތި ބަދަލުތަކެއް ވެސް ގެންނަން ޖެހުނު ކަމަށް އަޅުގަނޑުމެންނަށް އެނގިފައި އޮތީ. އެތައް އަހަރެއް ކުރިން ފުރިހަމަ ކުރަންޖެހޭ މަސައްކަތްތަކެއް ކަމަށް ވާތީ ބަދަލުތަކެއް ގެންނަން ޖެހުނީ،" އެޗްޑީސީގެ އޮފިޝަލް ވިދާޅުވި އެވެ.

އާރުސީސީގެ ޗެއާމަން ނާޒިމް ވިދާޅުވީ، މި މަހުގެ ނިޔަލަށް ހުރިހާ މަސައްކަތެއް ނިމޭނެ ކަމުގެ ޔަގީންކަން އެބައޮތް ކަމަށެވެ.

ޖާހުގެ އެޕާޓްމަންޓުގެ މަސައްކަތްތައް 2017 ވަނަ އަހަރު ފެށީ ދެ އަހަރުގެ ތެރޭގައި ނިންމާ ގޮތަށެވެ. އެކަމަކު، 8 އަހަރު ވެގެން ދިޔައިރު ވެސް މަސައްކަތް ނުނިމޭތީ، އެ ތަނުން އެޕާޓްމަންޓް ގަތް މީހުން މުޒާހަރާ ވެސް ކުރި އެވެ

އެހެންވެ، އެ މައްސަލަ ބެލުމަށް ފަހު، ފްލެޓުތައް ނިންމުމަށާއި ބިމުގެ އަގު ދެއްކުމަށް އެޗްޑީސީން ޖާހު އިންވެސްޓްމަންޓަށް 30 ދުވަހުގެ ނޯޓިސްއެއް މީގެ ދެ އަހަރު ކުރިން ފޮނުވި އެވެ. އެކަމަކު، އެ ނޯޓިސް ހަމަވިއިރު އެއްވެސް ކަމެއް ނުވެ އެވެ.

އޭގެ ފަހުން އެޕާޓްމަންޓުތައް ނިންމަން 45 ދުވަހުގެ މުއްދަތެއް ދިނެވެ. އެ މުއްދަތުގައި އެ މަސައްކަތްތައް ނުނިމުމުން އެޗްޑީސީން ވަނީ އެންމެ ފަހުން އެއްބަސްވުން ބާތިލް ކޮށްފަ އެވެ. އެ ބިމާ އެޗްޑީސީން ހަވާލުވުން ހުއްޓުވައި ދިނުމަށް އެދި ޖާހުން ކޯޓަށް ވެސް ދިޔަ އެވެ. ނަމަވެސް، ކޯޓުން ނިންމީ އެ ފަދަ އަމުރެއް ނުނެރެވޭނެ ކަމަށެވެ.

އެޗްޑީސީން އޮކްޓޯބަރު 2023 ގައި ބުނެފައިވަނީ ޖާހު ކުންފުނީގެ ފްލެޓްތަކުގެ 10 ވަނަ ފްލޯއިން ތިރީގެ ހުރިހާ ފްލޯތަކުގެ ފިނިޝިން މަސައްކަތް ފަށާފައިވާ ކަމަށެވެ. އޭގެ ތެރޭގައި ހިމެނެނީ ޕްލާސްޓަރިން އާއި ޕުޓީގެ މަސައްކަތާއި މުށި އަދި ސީލިންގުގެ މަސައްކަތްތަކެވެ. އެ އިމާރާތުގައި ނުނިމި ހުރި ހުރިހާ މަސައްކަތްތަކެއް ވެސް ހަ މަސް ދުވަހުގެ ތެރޭގައި ނިންމާލެވޭނެ ކަމަށް އެޗްޑީސީން އޭރު ބުނެފައިވެ އެވެ.

ޖާހުގެ "ދަ ގާޑަން" ގައި 2+1 އާއި 3 އަދި 3+1 ގެ ޖުމްލަ 83 އެޕާޓްމަންޓް ހުންނާނެ އެވެ. އޭގެ ގިނަ ތަންތަން ވަނީ ވިކި ހުސްވެފަ އެވެ.