ބްރާންޗުތަކުގެ މުވައްޒަފުން ދެން ބަދަލުވާނީ "ފައިނޭންޝަލް އެޑްވައިޒަރުން" ނަށް: ޝަރީފް

މުޅި ރާއްުޖޭގައި އޭޓީއެމް ބެހެއްޓުމަކީ "ޑިޖިޓަލް ބޭންކު" ބޭނުންކުރުމަށް އެޅި ބިންގަލެއް ކަމަށާއި އެ ހިދުމަތާ އެކު، ރަށްރަށުގައި ހިންގާ ބީއެމްއެލްގެ ބްރާންޗުތަކުގެ މުވައްޒަފުން ދެން ބަދަލުވާނީ މާލީ މުއާމަލާތްތަކަށް އާންމުން ހޭލުންތެރިކުރާ "ފައިނޭންޝަލް އެޑްވައިޒަރުން" ނަށް ކަމަށް އެ ބޭންކުގެ ސީއީއޯ އަދި އެމްޑީ މުހައްމަދު ޝަރީފު ވިދާޅުވެއްޖެ އެވެ.

ޕީއެސްއެމްގެ ޕްރޮގްރާމެއްގައި ވާހަކަ ދައްކަވަމުން އޭނާ އިއްޔެ ވިދާޅުވީ ރަށްރަށުގައި ހުޅުވާފައިވާ ބީއެމްއެލްގެ ބްރާންޗުތަކުގެ މުވައްޒަފުން ކުރިމަގުގައި ބަދަލުވާނީ މާލީ އެހީތެރިކަން ފޯރުކޮށްދޭ "ފައިނޭންޝަލް އެޑްވައިޒަރުން" ނަށް ކަމަށެވެ. އަދި އެ މުވައްޒަފުންނަކީ ރަށްރަށުގައި ގޭގެ އަށް ގޮސް ޑިޖިޓަލް ބޭންކިންއާ ގުޅޭ މައުލޫމާތު ފޯރުކޮށްދީ، މޮބައިލް ބޭންކިން ބޭނުންކުރާނެ ގޮތް ކިޔައިދޭނެ ބަޔަކަށް ކުރިމަގުގައި ވާނެ ކަމަށް އޭނާ ވިދާޅުވި އެވެ.

"އަދި ފިހާރަތަކަށް ވެސް [އެ މުވައްޒަފުން] ވަޑައިގެން ފައިނޭންސް ވެސް ބަލަހައްޓާނެ ގޮތް، ލޯނެއް ނަންގަވަންޏާ ވާންޖެހޭ ގޮތާއި މި ކަހަލަ ކަންކަން ކިޔައިދޭނެ ބަޔަކަށް ފައިނޭންޝަލް އެޑްުވައިޒަރުން ވާނީ. ބްރާންޗުތަކުގައި ހުންނަ ޓެލާސްގެ ބަދަލުގައި އޮޓަމޭޓެޑް ޓެލާސް މި ބޭނުންކުރަނީ. ބްރާންޗުތަކުގެ ސްޓާފުން މާ މުހިންމު ކަމަކަށް އެ ބޭފުޅުންގެ ވަގުތު ހޭދަކުރައްވާނީ މުސްތަގުބަލުގައި،" ސީއީއޯ ވިދާޅުވި އެވެ.

އޭނާ ވިދާޅުވީ، އެ ބަދަލު އަންނަންޖެހޭ ސަބަބަކީ މުޅި ރާއްޖޭގައި މިހާރު އޭޓީއެމް ބަހައްޓާފައިވާއިރު، އެ ރަށެއްގައި ހުންނަ ބްރާންޗަށް ނުގޮސް ފައިސާ ޖަމާކުރުމާއި ފައިސާ ނެގުން ފަސޭހަވުން ކަމަށެވެ. ހާއްސަކޮށް، ބީއެމްއެލްގެ ކުރިމަގުގެ މޮޑެލްއަކީ "ޑިޖިޓަލް ބޭންކު" ކަމަށް ވުމުން ރަށްރަށުގެ ބްރާންޗުތަކުގެ މުވައްޒަފުން މެދުވެރިކޮށް، އެ ކަމަށް އާންމުން ހޭލުންތެރިކުރުން މާ ރަނގަޅަށް ހިންގޭނެ ކަމަށް ޝަރީފް ވިދާޅުވި އެވެ.

ޝަރީފު ވިދާޅުވީ، 2000 ވަނަ އަހަރުން ފެށިގެން މިދިޔަ އަހަރުގެ ނިޔަލަށް 82 ރަށުގައި ބީއެމްއެލް އިން އޭޓީއެމް ބަހައްޓާފައިވާއިރު މުޅި ރާއްޖެ އަށް އޭޓީއެމްގެ ހިދުމަތް ދިނުމުގެ ޕްރޮޖެކްޓް މިދިޔަ އަހަރުގެ ނޮވެމްބަރު މަހު ފަހުން މިދިޔަ 8 މަސް ތެރޭގައި އެކަނިވެސް އަލަށް 105 ރަށުގައި އޭޓީއެމް ބަހައްޓާފައިވާ ކަމަށެވެ.

"އެހެންވީމާ މި ވޭތުވެދިޔަ 25 ވަރަކަށް އަހަރުގެ ތެރޭގައި އޭޓީއެމް ނުބެހެއްޓޭ ވަރަށް ރަށްތަކުގައި އޭޓީއެމް މި ބެހެއްޓީ. އެހެންވީމާ މުޅި ރާއްޖެ އެއްކޮށް މި އޮތީ ކަވަރު ކުރެވިފައި. އެހެންވީމާ އަޅުގަނޑު ގަބޫލު ކުރާނީ މިއީ ވަރަށް ބޮޑު ފަސޭހައެކޭ ދިވެހިރާއްޖޭގެ ރައްޔިތުންނަށް ވެސް ލިބިގެންދިޔަ ބޭންކިންގެ ހިދުމަތް ހޯދުމުގައި،" ރާއްޖޭގެ އެންމެ ބޮޑު ބޭންކުގެ ސީއީއޯ ވިދާޅުވި އެވެ.

އޭނާ ވިދާޅުވީ، ރަށްރަށުގައި ދިރިއުޅޭ އުމުރުން ދުވަސްވީ މީހުންނަށް ކޮންމެ މަހަކު ސަރުކާރުން 5،000ރ. ޖަމާކޮށްދެމުން އަންނައިރު މިހާތަނަށް އެ ފައިސާ ވެސް ނަގަން ޖެހެނީ އެހެން މީހެއްގެ އަތަށް ކާޑު ދީގެން ވަރަށް އުނދަގޫ މަރުހަލާތައް ކަޑައްތު ކުރުމަށް ފަހު ކަމަށެވެ. އެ އުނދަގޫތައް ކުރިމަތިވެ، އޭޓީއެމްގެ ހިދުމަތަށް ރަށްރަށުން އެދޭތީ، ކުޑަ ރަށެއް ނުވަތަ ބޮޑު ރަށެއް ތަފާތު ކުރުމެއް ނެތި ކޮންމެ ރަށެއްގައި އޭޓީއެމް ބަހައްޓަން މިދިޔަ އަހަރުގެ ނޮވެމްބަރު މަހު ރައީސް ޑރ. މުހައްމަދު މުއިއްޒު ނިންމެވި ކަން ޝަރީފް ފާހަގަކުރެއްވި އެވެ.

"ކުރީގައި މިވާ ގޮތަކީ އެއްފަހަރާ ފައިސާ ނަގައިގެން އައިސް އަތުގައި ބަހައްޓަނީ. އެހެން ނޫނިއްޔާ ފިހާރައަކަށް ލިބޭ ފައިސާ ވެސް ޖަމާނުކޮށް ބެހެއްޓެނީ. އެއީ [ބޭންކަށް ޖަމާކުރަން] ފަސޭހަ ނުވީމާ،" ސީއީއޯ ވިދާޅުވި އެވެ.

އެކަމަކު، ޝަރީފް ވިދާޅުވި ގޮތުގައި އޭޓީއެމްތައް ބަހައްޓަން ފެށުމާ އެކު ފެނުނީ ބޭންކިން ނިޒާމުގެ ތެރެއަށް ފުދޭވަރަކަށް ފައިސާ ޖަމާކުރުން އިތުރުވި ތަނެވެ. އެއީ ބީއެމްއެލް އިން ބޭނުންވި ގޮތް ކަމަށާއި ކުރިމަގުގައި އޭގެ ސަބަބުން ރަށްރަށުގެ ބީއެމްއެލްގެ ބްރާންޗުތަކުން "ޑިޖިޓަލް ބޭންކު" ފުޅާކުރަން މަގުފަހިވާނެ ކަމަށް އޭނާ ވިދާޅުވި އެވެ.