ޝާހިދު، އިބްރާހިމް ވަހީދަށް ހަނދާން ކޮށްދެއްވީ ހޫނުވި ބައްދަލުވުމުގައި އަމަލުކުރި ގޮތް!

މިއީ އަންނަ އަހަރުގެ ލޯކަލް ކައުންސިލްތަކުގެ އިންތިހާބު ވަރަށް ކައިރިވެފައިވާ ދަނޑިވަޅަކަށް ވާތީއާ އެކު، އެ ޕާޓީގެ އެތެރޭގެ މަސްލަހަތު ގެއްލޭ ފަދަ އެއްވެސް ގޮތަކަށް އަމަލު ނުކުރަން އެދިވަޑައިގެން އެމްޑީޕީގެ ރައީސް އަބްދުﷲ ޝާހިދު، ޑެޕިއުޓީ ޗެއާޕާސަން އިބްރާހިމް ވަހީދަށް މިއަދު ސިޓީއެއް ފޮނުއްވައިފި އެވެ.

އޭނާ އެ ސިޓީ ފޮނުއްވީ ޗެއާޕާސަންގެ މަގާމުން ފައްޔާޒު އިސްމާއިލް މި މަހުގެ 23 ގައި އިސްތިއުފާ ދެއްވުމާ ގުޅިގެން ވަގުތީ ޗެއާޕާސަނެއް ކަނޑައެޅުމުގެ ކަންކަމުގައި އެމްޑީޕީގެ އެތެރޭގެ މަސްލަހަތު މިހާރު ވެސް ގޯސްވެފައި ވަނިކޮށެވެ.

ދުވަހުން ދުވަހަށް އެމްޑީޕީ ހިންގާނެ ޗެއާޕަސަނެއް ނެތުމުން އެ ޒިންމާއާ މަގާމުގެ ހައިސިއްޔަތުން ހަވާލުވެވަޑައިގެން ހުންނެވި އިބްރާހިމް ވަހީދަށް ޝާހިދު ފޮނުއްވި ސިޓީގައި އިލްތިމާސް ކުރެއްވީ އެ ޕާޓީގެ އެތެރޭގެ މަސްލަހަތު ގެއްލޭނެ ކަންކަން ކުރުމަށް އެއްވެސް ފަރާތަކަށް ފުރުސަތު ނުދެއްވުމަށެވެ.

އެެއާ އެކު، ދެން އެ ސިޓީގައި، އިބްރާހިމް ވަހީދަށް ޝާހިދު ހަނދާން ކޮށްދެއްވީ ވަގުތީ ޗެއާޕަސަނަކު ކަނޑައެޅުމާ ގުޅޭ ގޮތުން މިދިޔަ ހުކުރު ދުވަހުގެ ރޭ ބޭއްވި އެމްޑީޕީގެ ގައުމީ މަޖިލިހުގައި ކަންތައް ހިނގައި ދިޔަ ގޮތެވެ. އަދި ވަގުތީ ޗެއާޕަސަންގެ މަގާމަށް ރައްޔިތުންގެ މަޖިލިހުގެ ދިއްދޫ ދާއިރާގެ ކުރީގެ މެމްބަރު އަބްދުﷲ ވަހީދުގެ ނަން ފާސްކުރަން އެރޭ ވޯޓަށް އެހި ވަގުތު އުފެދުނު ހިޔާލު ތަފާތުވުންތަކާ ގުޅިގެން ގައުމީ މަޖިލިހުގެ ޖަލްސާ މެދުކަނޑާލެއްވިކަން ރިޔާސަތުން އިބްރާހިމް ވަހީދު އިއުލާން ކުރެއްވިކަން ޝާހިދު ފާހަގަކުރެއްވި އެވެ.

އެހެންވެ، ޝާހިދުގެ ސިޓީގައި އިބްރާހިމް ވަހީދުގެ އަރިހުގައި އެދިވަޑައިގަތީ އަނެއްކާ ވެސް ގައުމީ މަޖިލިހުގެ ޖަލްސާ ކުރިއަށް ގެންދިއުމުގެ އިންތިޒާމުތައް ފުރިހަމަ ކުރުމަށް ފަހު އަމަލީ ސިފައެއް ގެންނާށެވެ.

ރިޔާސަތުން ދެ ފަހަރު ދެ ގޮތަށް އަމަލު ކުރެއްވުމުގެ ސަބަބުން އެރޭގެ ޖަލްސާގެ ނިޒާމު ގެއްލި ހަމަނުޖެހުމަކަށް ދިޔަކަން ފާހަގަކުރެވެ އެވެ،"--- ޝާހިދު

ވަގުތީ ޗެއާޕާސަނަކު ކަނޑައެޅުމާ ގުޅޭ ކަންކަން ނިންމަން ހުކުރު ދުވަހުގެ ރޭ ބޭއްވި ގައުމީ މަޖިލިހުގެ ޖަލްސާގެ ރިޕޯޓަށް ޖަވާބު ދެއްވުމުގެ ބޭނުމުގައި ޑެޕިއުޓީ ޗެއާ އިބްރާހިމް ވަހީދަށް ފޮނުއްވި ސިޓީގައި ޝާހިދު ވިދާޅުވީ، އެ ޖަލްސާގައި ފުރަތަމަ ވޯޓު ނަގައި ނިމުމުން، އެ ވަގުތު އެ ތަނުގައި ތިއްބެވި ވޯޓުލެވޭ މެމްބަރުންގެ އަދަދަކީ 96 ކަމަށް ރިޔާސަތުން އިބްރާހިމް ވަހީދު އިއުލާން ކުރެއްވި ކަމަށެވެ. އަދި ރިޔާސަތު ނުހިމަނައި ވޯޓުލެވޭ މެމްބަރުންގެ އަދަދަކީ 95 ކަމަށް ވެސް ފަހުން އިއުލާން ކުރެއްވި ކަން ޝާހިދު ފާހަގަކުރެއްވި އެވެ.

އެ އަދަދުތައް އިއުލާން ކުރެއްވުމަށް ފަހުު، ވަގުތީ ޗެއާޕާސަންގެ މަގާމަށް ފުރަތަމަ ނަން ހުށަހެޅުއްވި އަބްދުﷲ ވަހީދަށް ވޯޓުގައި ލިބިވަޑައިގަތީ 47 ވޯޓު ކަމަށާއި އެ ނަން ފާސްވިކަން ވެސް އިބްރާހިމް ވަހީީދު ފުރަތަމަ އިއުލާން ކުރެއްވި ކަމަށް ޝާހިދު ވިދާޅުވި އެވެ.

"ނަމަވެސް 95 ގެ ދެބައިކުޅަ އެއްބަޔަކީ 47 ނޫން ކަމަށް ބުނެ އެ ތަނުގައި ބައެއް މެމްބަރުން އިހުތިޖާޖު ކުރެއްވުމުން ރިޔާސަތުން ހިސާބު ހެއްދެވުމަށް ފަހު އިއުލާން ކުރެއްވީ އަބްދުﷲ ވަހީދުގެ ނަން ފާސްނުވާ ކަމަށެވެ. ރިޔާސަތުން ދެ ފަހަރު ދެ ގޮތަށް އަމަލު ކުރެއްވުމުގެ ސަބަބުން އެރޭގެ ޖަލްސާގެ ނިޒާމު ގެއްލި ހަމަނުޖެހުމަކަށް ދިޔަކަން ފާހަގަކުރެވެ އެވެ،" އެމްޑީޕީގެ އެތެރޭގެ ދެ ފެކްޝަންގެ ބޮޑު އަރައިރުމަކަށް ބަދަލުވި ގައުމީ މަޖިލިހުގެ ޖަލްސާގައި އިންނެވި ޝާހިދު ވިދާޅުވި އެވެ.

"އަދި އެރޭގެ ޖަލްސާ ހަލަބޮލިވެ، ޖަލްސާ އިތުރަށް ކުރިއަށް ނުގެންދެވުމުން އެ ޖަލްސާ މެދުކަނޑާލެއްވި ކަމަށް ރިޔާސަތުން އިއުލާން ކުރެއްވި އެވެ."

އެމްޑީޕީގެ ރައީސް ޝާހިދާއި މި މަހުގެ 23 ގައި ޗެއާޕާސަންގެ މަގާމުން އިސްތިއުފާ ދެއްވި ފައްޔާޒު މަޝްވަރާއެއްގައި.--- ފޮޓޯ: އެމްޑީޕީ

ޝާހިދުގެ ސިޓީގައި އިބްރާހިމް ވަހީދަށް ހަނދާން ކޮށްދެއްވީ އެ ޖަލްސާގައި ހިނގި ހުރިހާ ކަމެއްގެ އޯޑިއޯ އާއި ވީޑިއޯ ރެކޯޑުކޮށްފައިވާ ކަމެވެ. އަދި އެ ކަންކަން ހިނގީ "އެންމެންގެ ކުރިމަތީގައި" ކަމަށް ވިދާޅުވި އެވެ.

ޝާހިދުގެ މި ސިޓީ އިބްރާހިމް ވަހީދަށް ފޮނުއްވިއިރު، ވަގުތީ ޗެއާޕާސަންގެ މަގާމަށް ކުރިމަތިލެއްވި އަބްދުﷲ ވަހީދު ވެސް ވަނީ އޭނާ އަށް އެ ވޯޓު ކާމިޔާބުވި ކަން ޑެޕިއުޓީ ޗެއާ އިބްރާހިމް ވަހީދަށް މިއަދު ފޮނުއްވި ސިޓީއެއްގައި ވިދާޅުވެފަ އެވެ. ނަމަވެސް އެމްޑީޕީގެ އެޑްވައިޒަރު ކުރީގެ ރައީސް އިބްރާހިމް މުހައްމަދު ސޯލިހު (އިބޫ) އާއި ޕާޓީގެ ރައީސް ޝާހިދާއި ޕާލަމެންޓްރީ ގުރޫޕުގެ މެމްބަރުންގެ ހުރަސްތަކާ ހެދި މަގާމުގައި ކުރިއަށް ވަޑައިނުގެންނެވޭކަން މިހާރު އެނގިވަޑައިގަންނަވާތީ ވާދަކުރެއްވުން އަނބުރާ ގެނައީ ކަަމަށް އަބްދުﷲ ވަހީދު ވިދާޅުވި އެވެ.

Iboo aai Shahid ge hurasthakaa hedhi kamah vidhaalhuve Waheed fahathah jehi vadaigenfi

The most trusted news source in the Maldives

Mihaaru

ޑެޕިއުޓީ ޗެއާ އިބްރާހިމް ވަހީދާއި ވަގުތީ ޗެއާޕާސަން ކަމަށް ހުށަހެޅުއްވި އަބްދުﷲ ވަހީދަކީ ވެސް ކުރީގެ ރައީސް މުހައްމަދު ނަޝީދުގެ ފެކްޝަންގެ ދެބޭފުޅުންނެވެ. އަދި ކުރީގެ ޗެއާޕާސަން ފައްޔާޒު ވެސް މަސައްކަތް ކުރައްވަނީ އެ ޓީމުގަ އެވެ.

ވަގުތީ ޗެއާޕާސަނަކަށް ހިތަދޫ އުތުރު ދާއިރާގެ ކުރީގެ މެމްބަރު މުހައްމަދު އަސްލަމާއި ހަނިމާދޫ ދާއިރާގެ މެމްބަރު އަބްދުލްޣަފޫރު މޫސާ (ގަޕޯ) ގެ ނަން ހުށަހަޅަން ކުރީގެ ރައީސް އިބޫގެ ފެކްޝަނުން ހުކުރު ދުވަހުގެ ރޭގެ ގައުމީ މަޖިލިހުގެ ބައްދަލުވުމުގައި މަސައްކަތް ކުރި އެވެ. ނަމަވެސް އަސްލަމަކީ ގައުމީ މަޖިލިހުގެ މެމްބަރަކަށް ނުވުމުން ވަގުތީ ޗެއާޕާސަންގެ މަގާމު އަދާކުރެވިދާނެ ކަމަށް ސުވާލު އުފެދި ކުރިއަށް ދެވޭ ގޮތެއް ނުވި އެވެ. އަދި އަބްދުﷲ ވަހީދުގެ ވޯޓާ ހިސާބުން އުފެދުނު އަރައިރުންތަކުގައި ޖަލްސާ މެދުކަނޑާލީ އެވެ.

އޭގެ ފަހުން އަދިވެސް އެ ކޯޅުންގަނޑު މައިތިރިއެއް ނުވެ އެވެ.