އީރާނުގައި ކާރު ވިއްކުމުގެ ނަމުގައި ޕިރަމިޑް ސްކީމެއް ހިންގި މީހަކު ދަންޖައްސައިފި

އީރާނުގައި ކާރު ވިއްކުމުގެ ނަމުގައި އެތައް ހާސް ބައެއްގެ އަތުން ފައިސާ ނަގައި ޕިރަމިޑް ސްކީމެއް ހިންގުމުގައި އިސްކޮށް ހުރި މީހެއްގެ މައްޗަށް އިއްވި މަރުގެ ހުކުމް މިއަދު ތަންފީޒުކޮށްފި އެވެ.

ރެޒާޔަތު ޚުދްރޯ ތަރަވަތު ނޮވިން ކުންފުނީގެ ވެރިޔާ މުހައްމަދު ރޭޒާ ޣައްފާރީގެ މައްޗަށް މަރުގެ ހުކުމް ތަންފީޒުކުރީ ގައުމުގެ އިގްތިސާދަށް ގޮންޖެހުން ކުރިމަތިވާނެ އަމަލުތައް ހިންގި ކަމުގެ ކުށުގައި އިއްވި މަރުގެ ހުކުމަށް ސުޕްރީމް ކޯޓުން ތާއީދުކުރުމުންނެވެ.

އީރާންގެ އުތުރުގެ ގަޒްވިން ޕްރޮވިންސްގައި 2013 ވަނަ އަހަރު މި ސްކީމް ފެށީ މާކެޓް ރޭޓަށް ވުރެ ހެޔޮ އަގުގައި ކާރު ވިއްކާ ކަމަށް ބުނެ އެވެ. އެކަމަކު ފަހުން ރިއަލް އެސްޓޭޓް އަދި އިންވެސްޓްމަންޓް ޕްލޭންތައް މީގެ ދަށުން ހިންގި އެވެ.

ޕްރޮސިކިއުޓަރުން ވިދާޅުވެފައިވާ ގޮތުގައި ޣައްފާރީ އާއި އޭނާގެ ބައިވެރިން އާންމުންގެ އަތުން ގިނަ އަދަދެއްގެ ފައިސާ ނަގަމުން، އިންވެސްޓްމަންޓުގެ ފައިދާ ކަމަށް ބުނެ، ފަހުން ބައިވެރިވާ މީހުންނަށް ފައިސާ ދެމުން ދިޔައީ ކުރިން ބައިވެރިވި މީހުންގެ ފައިސާއިން ކަމަށެވެ.

ޖުޑީޝަރީން ބުނި ގޮތުގައި މިހާރުގެ އެކްސްޗޭންޖް ރޭޓަށް ބަލާއިރު ޣައްފާރީ އާއި އޭނާގެ ގްރޫޕުން ވަނީ 350 މިލިއަން ޑޮލަރު މީހުންގެ އަތުން ނަގައިފަ އެވެ. ކާރު ވިއްކާނެ ކަމަށް ބުނެ އެތައް ހާސް ބައެއްގެ އަތުން ފައިސާ ނެގި ނަމަވެސް ކާރު ލިބިފައިވަނީ އެންމެ ހަތަރު ޕަސެންޓް މީހުންނަށް ކަމަށް ވެސް ބުނެފައިވެ އެވެ.

މި ސްކީމުން ގެއްލުމާ ކުރިމަތިވި 28،000 މީހަކު މައްސަލަ ހުށަހަޅާފައިވެ އެވެ. އަދި ކޯޓުގައި 28 މީހަކަށް ދައުވާ އުފުލި އެވެ.

ޖުޑީޝަރީން ބުނީ ގެއްލުންވި މީހުންނަށް ފައިސާ ހޯދައިދޭން ކޯޓުން މަސައްކަތްކުރި ކަމަށާއި ފައިސާ އަދާކޮށްފި ނަމަ ޣައްފާރީ މަރުގެ އަދަބު ސަލާމަތްވާނެ ފުރުސަތު ވެސް ދީފައިވާ ކަމަށެވެ. އެކަމަކު ފައިސާ އަދާކޮށްފައި ނުވާ ކަމަށާއި ގެއްލުންވި މީހުންނަށް މާލީ އަދި ނަފްސާނީ ބޮޑެތި މައްސަލަތަކާ ކުރިމަތިވި ކަމަށް ބުނެފައިވެ އެވެ.

އީރާނުގައި މަރުގެ އަދަބު ދެނީ ހަމައެކަނި މީހުން މެރުމާއި، ރޭޕް ކުރުން ފަދަ ކުށްތަކަށް އެކަންޏެއް ނޫނެވެ. އިގްތިސާދީ ބޮޑެތި ކުށްތަކާއި ޖާސޫސްކުރުން ފަދަ ކަންކަމަށް މަރުގެ އަދަބު ދެ އެވެ. -- އޭއެފްޕީ