އިންޑިއާގެ ކުންފުންޏެއް ކަމަށް ލެބެން ލެބްރެޓޮރީސް ޕްރައިވެޓް ލިމިޓެޑުން އުފައްދާ ހުރިހާ ބޭހެއް ރާއްޖެ އެތެރެކުރުމާއި ވިއްކުމާއި ބޭނުން ކުރުން މިއަދުން ފެށިގެން މަނާކޮށްފި އެވެ.
މޯލްޑިވްސް ފުޑް އެންޑް ޑްރަގް އޮތޯރިޓީ(އެމްއެފްޑީއޭ) އިން ބުނީ ލެބެން ކުންފުނީގެ ހުރިހާ ބޭހެއް ރާއްޖޭގައި މަނާކުރީ އެ ކުންފުނީގެ ބޭސްތަކުން އެކި މައްސަލަތައް ފާހަގަވަމުންދާތީ ކަމަށެވެ. މިދިޔަ ދޮޅު އަހަރުގެ ތެރޭގައި އެ ކުންފުނީގެ އެކި ބޭސްތަކުން މައްސަލަތައް ފާހަގަވެ، އެތަކެތި އެތެރެ ކުރުން މަނާ ކުރަން ޖެހުނު ކަމަށް އެމްއެފްޑީއޭ އިން ބުންޏެވެ.
އެގޮތަށް އެކަން ދިމާވަނީ ލެބެން ކުންފުނީގެ ބޭސް އުފެއްދުމުގެ ފެންވަރު ބަލާ ނިޒާމުގައި މައްސަލަތަކެއް ހުރުމުން ކަމަށް އެމްއެފްޑީއޭ އިން ބުންޏެވެ. އެހެންވެ އެ ކުންފުނީގެ ބޭސް އެތެރެކުރުމާއި ވިއްކުމާއި ބޭނުން ކުރުން މަނާކުރަން ނޭޝަނަލް ފާމަސޫޓިކަލް ބޯޑުގެ ލަފާގެ މަތިން ނިންމީ ކަމަށް އެމްއެފްޑީއޭ އިން ބުންޏެވެ.