އަލީމް މިއަދު ކޯޓަށް ހާޒިރުވަނީ: ދެން އޮންނަ އަޑުއެހުމެއްގައި އޭނާ ޖަވާބުދާރީވާންޖެހޭނެ --މިހާރު ފޮޓޯ/ހުސައިން ވަހީދު
05 އެޕްރީލް 2017 - 15:20
ބައިބައި ވެފައިވާ ޕީޕީއެމްގައި ކުރީގެ ރައީސް މައުމޫން އަބްދުލްގައްޔޫމަށް ތާއީދުކުރާ ފެކްޝަނުން ޕީޕީއެމްގެ ނަމުގައި ވަކި ސުލޫކީ ކޮމެޓީއެއް ހަދައި، މެމްބަރުން ވަކިކުރާ މައްސަލާގައި މައުމޫން ފެކްޝަންގެ ސެކްރެޓަރީ ޖެނެރަލް އަބްދުލްއަލީމް ކޯޓަށް ހާޒިރުކޮށް، ފަނޑިޔާރުން އޭނާއާ ގިނަ ސުވާލުތަކެއް މިއަދު ކުރިމަތިކޮށްފި އެވެ.
އަލީމް ކޯޓަށް ހާޒިރުކޮށް ސުވާލުކުރީ ޕީޕީއެމް ބާރުތައް ޕީޕީއެމްގެ މުސްތަޝާރާ ލިބޭގޮތަށް ކުރި ހުކުމަށް ފަހު ވަކި ސުލޫކީ ކޮމެޓީއެއް ހަދައިގެން މެމްބަރުން ވަކިކޮށް، ހުކުމަށް ތަބާނުވާން ހިތްވަރު ލިބޭ ފަދަ ކަންކަން ކޮށް، ކޯޓުގެ ހުރުމަތް ކެނޑޭ ފަދަ އަމަލުތައް ހިންގި ކަމަށް ތުހުމަތުކޮށެވެ.
ކޯޓުގެ އިސް ނެގުމުގައި ބަލަން ފެށި އެ މައްސަލަ ބައްލަވަނީ އެ ކޯޓުގެ ފަސް ފަނޑިޔާރުންގެ ބެެންޗަކުނެވެ. އެ ބެންޗުގެ ރިޔާސަތު އެ ކޯޓުގެ އިސްގާޒީ އަބްދުﷲ އަލީ ބަލަހައްޓަވާއިރު ބެންޗުގައި ދެން ތިއްބަވަނީ ގާޒީ އަލީ ނަސީރާއި ގާޒީ އަލީ އަބްދުﷲ އާއި ގާޒީ މުހައްމަދު ހަލީމް އަދި ގާޒީ ހަސަން ފަހީމެވެ.
އަލީމްގެ މައްޗަށް ތުހުމަތު ކުރެވޭ ކަންކަމަށް އޭނާ އިންކާރު ކުރުމުން ފަނޑިޔާރުންގެ ބެންޗުން ވަނީ ގިނަ ސުވާލުތަކެއް އަލީމާ ކުރިމަތިކޮށްފަ އެވެ. އެގޮތުން ޕީޖީ ގްރޫޕުގެ ލީޑަރު އަހުމަދު ނިހާނާއި ދަނގެތި ދާއިރާގެ މެމްބަރު އިލްހާމް އަހްމަދު ޕާޓީން ވަކިކުރަން ނިންމި ކަމަށް ބުނެ ސުލޫކީ ކޮމެޓީން ނިންމި ނިންމުމުގައި އަލީމް ބައިވެރިވިންތޯ އާއި އެ ކޮމެޓީގައި ތިބެނީ ކޮން ބައެއްކަން އެނގޭތޯ ފަނޑިޔާރުން ސުވާލު ކުރެއްވި އެވެ.
ޖަވާބުގައި އަލީމް ވިދާޅުވީ އެ ކޮމެޓީގެ މެމްބަރުންގެ މައުލޫމާތު މިވަގުތު ހަނދާން ނެތް ކަމަށާއި ކޮމެޓީގެ އެއްވެސް ކަމެއްގައި އޭނާ ބައިވެެރިވެ ވަޑައިނުގަންނަވާ ކަމަށެވެ. އެ ކޮމެޓީން އެފަދަ ނިންމުމެއް ނިންމިކަން އޭނާ އަށް އެނގިވަޑައިގަތީ މީޑިއާއިން ކަމަށް އަލީމް ބުންޏެވެ.
ނިހާނާއި އިލްހާމް ވަކިކުރަން ނިންމި ކަމަށް ބުނެ، އަލީމް މީޑިއާއެއްގައި ވިދާޅުވެފައިވާތީ އެކަމާ ބެހޭގޮތުން ފަނޑިޔާރުން ސުވާލު ކުރެއްވުމުން އަލީމް ވަނީ އެފަދަ ވާހަކައެއް އެ މީޑިއާގައި ވިދާޅުނުވާ ކަމަށް ބުނެ، އެކަމަށް އިންކާރު ކުރައްވައިފަ އެވެ. އެފަދަ ހަބަރެއް ލިޔުނުކަން އޭނާ އަށް އެނގިވަޑައިނުގަންނަވާ ކަމަށާއި އެކަން ޖެހޭނީ ސާފުކުރަން ކަމަށް އަލީމް ވިދާޅުވި އެވެ.
މީގެ ދުވަސްތަކެއް ކުރިން ލިޔުނު އެ ޚަބަރަށް ކުރިން އިންކާރު ނުކުރެއްވީ ކީއްވެގެންތޯ ފަނޑިޔާރުން ސުވާލު ކުރެއްވުމުން، އަލީމް ވިދާޅުވީ އޭނާއާ ހަވާލާދީ އެ ޚަބަރު ލިޔުނުކަން ކުރިން އެނގިވަޑައިނުގަންނަވާ ކަމަށާއި ފެނުނީ ޚަބަރުތަކުގެ ސުރުހީތައް ކަމަށެވެ.
އެކަމާ ބެހޭގޮތުން ފަނޑިޔާރުން ތަކުރާރުކޮށް، ސުވާލު ކުރެއްވުމުން ވެސް އަލީމް ވިދާޅުވީ އެ ޚަބަރުގެ މައުލޫމާތު ކުރިން އެނގިވަޑައިނުގަންނަވާ ކަމަށެވެ. ފަނޑިޔާރުންގެ ބެންޗުން ވިދާޅުވީ އަލީމް ދައްކަވާ ވާހަކަތަކުގެ ތެދުކަން ކޯޓުން ކަށަވަރު ކުރާނެ ކަމަށާއި އެހެންވެ، މިހާރު ތެދުބަހުން ވާހަކަ ދައްކަން ނަސޭހަތްތެރިވާ ކަމަށެވެ. އެކިފަހަރު އެކި ގޮތަށް ވާހަކަ ދައްކާ ނަމަ، ދައްކާ ވާހަކަތައް ގަބޫލުކުރަން ދަތިވާނެ ކަމަށް ވެސް ފަނޑިޔާރުން ވިދާޅުވި އެވެ.
ހުކުމަށް ފަހު، ޕީޕީއެމްގެ ނަމުގައި އެއްވެސް ލިޔުމެއްގައި ސޮއިކޮށް، އެއްވެސް ބަޔަކަށް ދައުވަތު ދީ އަދި އެއްވެސް ނިންމުމެއް ނިންމުމުގައި ބައިވެރިވިންތޯ ފަނޑިޔާރުން ސުވާލު ކުރެއްވުމުން އަލީމް ވިދާޅުވީ އެފަދަ ކަމެއް ކުރައްވާފައި ނުވާނެ ކަމަށެވެ.
މީގެ އިތުރުން ވެސް ފަނޑިޔާރުން ވަނީ ޕީޕީއެމްގެ ބާރުތައް މުސްތަޝާރާ ހަވާލުކޮށް ކުރި ހުކުމުގެ ކުރިންނާއި އޭގެފަހުން ޕާޓީގެ ސުލޫކީ ކޮމެޓީ އޮތްގޮތާއި މިހާރު އޮތްގޮތާ ބެހޭގޮތުން ސުވާލުކުރައްވައިފަ އެވެ. ގިނަ ސުވާލުތަކުގެ ޖަވާބުގައި އަލީމް ވިދާޅުވީ އެ މައުލޫމާތު ޖެހޭނީ ސާފުކުރަން ކަމަށެވެ.
ފަނޑިޔާރުންގެ ބެންޗުން ވިދާޅުވީ ސިޔާސީ ފަރާތްތަކަކީ އާންމު ރައްޔިތުންނަށް ނަމޫނާއަކަށް ވާންޖެހޭ ބައެއް ކަމަށާއި ކޯޓުތަކުގެ ނިންމުންތަކަށް ތަބާނުވާން ހިތްވަރު ދިނުމަކީ ކޮށްގެންވާނެ ކަމެއް ނޫން ކަމަށެވެ. އަލީމް އަމަލުކުރައްވާފައި ވަނީ ހުކުމަށް ތަބާނުވާން ހިތްވަރު ލިބޭ ގޮތަށް ކަމަށާއި އެފަދަ ކަންކަމަކީ ގާނޫނީ ގޮތުން މަނާ ކަންކަން ކަމަށް ފަނޑިޔާރުން ވިދާޅުވި އެވެ.
އެ މައްސަލައިގެ އިތުރު އަޑުއެހުމެއް އާދިއްތަ ދުވަހު ބާއްވާއިރު އެދުވަހު އޮންނާނީ މިއަދު ފަނޑިޔާރުން ކުރެއްވި ސުުވާލުތަކާ ގުޅިގެން އަލީމްގެ ފަރާތުން ޖަވާބުދާރީވުމެވެ.
Copyright © 2025 Mihaaru · Terms and Conditions · Privacy Policy
ކޮމެންޓްތައް
ހަލީމް
06 April 2017
އަލީމް އެ ކޮމެތިން ވަކިކުށްފަތަ؟
މުސްތޮ
06 April 2017
އަޅެ ތިޔަބުނުއްވާ ޕާޓީއެއް އުފެއްދެވީ ކޮންބޭފުޅެއްތޯ ބަލަން އެބަޖެހެއެއްނު
ޢަބްދުﷲނާފިޒު
06 April 2017
މީ ހާދަ ފިނޑި ބައެކޭ އުތަ، ކުރިންވެސް އަދި މިހާރުވެސް، ތިމަންނާއަކީ ޕޕމގެ ރައީސް ކަމަށް ބުނެ، އެމަޤާމުން ވަކި ނުކުރެވޭނެ ކަމަށް ބުނާ މީހާ ތިޔަތަނަށް ހާޒިރުކުރަން ނުކެރިގެން ތިޔަ ފޫކަހަނީ ކީއްވެގެންތޯ، ނުކެރޭނެ ހަމަ ބިރުދެއްކުން ނޫން ދެން ކޮންކަމެއް، ތަނުގަ ތިބި ސެކެޓަރީއާ މެސެންޖަރާ ހާޒިރުކޮށް ބިރުދެއްކުމަށް ތިހިންގާ އަމަލުތައް ހަރުކަށި އިބާރާތުން ކުށްވެރިކުރަން، ﷲގެ އިރާދަފުޅުން ތިބާރުތައް ކެނޑި ރައްޔިތުންގެ އަތްމައްޗަށް ބާރުތައް އަންނާނެ ދުވަހެއްގެ އިންތިޒާރުގަ ތިބި ވާހަކަ ބުނެ އަންގަމެވެ، އޭރުން ދެން ކަންތައްވާނެ ގޮތް މާކަށް ސަހަލެއް ނުވާނެއެވެ.
ހަންބެ
06 April 2017
ވިކިއްޖެ
އަބްދުއްލާ އަލީ
06 April 2017
ޕީޕީއެމް މައްސަލާގައި ލިޔެވޭ ލިއުންތަކުގެ ކޮމަންޓް ތަކާ އެކޮމަންޓް ތަކުގެ ލައިކް އަށް ބައްލަވާ ލެއްވި ނަމަވެސް އެގިވަޑައިގަންނަވަންވާނެ ޕީޕީއެމް ވެސް އަދި ދިވެހިރާއްޖޭގެ ވެސް ސަޕޯޓް އޮތީ މައުމޫނަށް ކަން.
ދުންމާރި
06 April 2017
ނޫހުގަ ކޮމެންޓް ކުރަނީ ކިތަށް ޕަސެންޓް މީހުންތޯ
އަބްދުއްލާ އަލީ
06 April 2017
ގާނޫނުއަސާސީގެ 64 ވަނަ މާއްދާގަ ބުނަނީ ގާނޫނުއަސާސީއާ ހިލާފުވާގޮތަށް ނެރޭ އަމުރަކަށް އެއްވެސް ފަރާތަކުން ތަބާވާން ނުޖެހޭނެ ކަމަށް އަދި ގާނޫނުއަސސީން ބުނަނީ ގާނޫނާ ގާނޫނުއަސާސީއާ ތައާރަޒް ވާ މިންވަރެއް އަކުރަކަށް ވިޔަސް ފިއްޔަކަށް ވިޔަސް ލަފްޒަކަށް ވިޔަސް އެއީ ބާތިލް ކަމުގާ
އަފިހުން ގޮއްޔެ
06 April 2017
ކަން ތިހެން އޮތް އިރުވެސް ދަލު ބޭރުން ޖެހިގެން މިބައިގަނޑު މިތެޅެނީ ކީއްވެގެންބާ!
ސޯސް
06 April 2017
އެހެންދޯ
އަބްދުއްލާ އަލީ
06 April 2017
މިމައްސަލަ އިން އެގެނީ ހަގީގީ ޕީޕީއެމް އަކީ މައުމޫން ފެކްސަން ކަން ޔާމީން ފެކްސަން އުފެދިގެން އުޅެނީ އައިރު ގާނޫނީ ކޮށް ކަން ، އެހެން ނޫންނަމަ އިލްހާމާ ނިހާނު ވަކި ކޮށްގެން މިހާ ފޯރި ނަގަންޖެހޭނެތަ ؟
އއލ
05 April 2017
ފުރަތަމަ ބައްލަވަންވީ އެ ޕާޓީގެ އަސާސީ ޤަވާއިދަށްތޯ. މިހާރު ތިޔަމައްސަލާގެ ޚަސްމުންނަކީ ކޮންބައެއް.
ޖަންގަލީގެ ގާނޫނޫ
05 April 2017
ޕީޕީއެމް ހިންގުން މުޝްތަޝާރު އާ ހަވާލު ކުރީ ޕީޕީއެމްގެ އަސާސީގަވާއިދު އޮވެގެންބާ ނުވަތަ ގާނޫނޫ އަސާސީސަ އޮވެގެންބާ..... އަނބިމީހާވެސް ކޯޓުން ވަރިކޮށްދޭ އެކަމަކު އެހެންމީހަކަށް ހިބަކޮށް ލިބޭގޮތެއް ނޯވެ.... ކޮންމެ ކަމެއްވެސް ހިންގަން ޖެހޭނީ އުސޫލަކުން.
ހުސެން އާދަމް
05 April 2017
މިވަރުގެ ކުދިންޏާވެސް ބެހެނީ. ކޮންމެ ކަމެއް ކޯޓުން. ނިމުން ކައިރިވަނީ. ކޮންމެ މީހަކަށް ވެސް އޮތީ ނަރަކަ ނޫނީ ސުވަރުގެ، ޤާޒީން މީން ކޮން ތަނެއް ތިޔަ އިޚްތިޔާރުކުރެއްވީ.