އަމާޒަކީ ރާއްޖޭގެ ހުރިހާ ނަރުހުންނަކީ ދިވެހިން ކަމުގައި ހެދުން: ނާޒިމް

ސަރުކާރުގެ އަމާޒަކީ ރާއްޖޭގައި މަސައްކަތް ކުރާ ހުރިހާ ނަރުހުންނަކީ ދިވެހިން ކަމުގައި ހެދުން ކަމަށް ހެލްތު މިނިސްޓަރު އަބްދުﷲ ނާޒިމް މިރޭ ވިދާޅުވެއްޖެ އެވެ.

މިއަދު ފާހަގަ ކުރަމުންދާ ބައިނަލްއަގްވާމީ ނަރުހުންގެ ދުވަހުގެ މުނާސަބަތުގައި މިރޭ ބޭއްވި ހަފުލާގައި ވާހަކަ ދައްކަވަމުން ނާޒިމް ވިދާޅުވީ ރާއްޖޭގައި މިވަގުތު 2،000 އެއްހާ ނަރުހުން ތިބި އޭގެ ތެރެއިން 45 ޕަސެންޓަކީ ބިދޭސީ ނަރުހުން ކަމަށެވެ. ސިއްހީ ދާއިރާއަށް ބޮޑެތި ކުރިއެރުންތަކެއް ލިބެމުންދާއިރު ސަރުކާރުން މަސައްކަތް ކުރަމުން ދަނީ ރާއްޖޭގައި މަސައްކަތް ކުރާ ހުރިހާ ނަރުހުންނަކީ ދިވެހިން ކަމުގައި ހެދުމަށް ކަމަށާއި ކުރު މުއްދަތެއްގެ ތެރޭގައި އެކަން ހާސިލް ކުރަން ސަރުކާރުން ވަރަށް އިސްކަންދޭ ކަމަށް ނާޒިމް ވިދާޅުވި އެވެ.

"އެހެންވެ، ނަރުހުން ތަމްރީނު ކުރުމާއި ތަމްރީނު ޕްރޮގްރާމްތައް އިތުރު ކުރުމަކީ ސަރުކާރުން ވަރަށް ބޮޑު އިސްކަމެއް ދީގެން ކުރިއަށް ގެންދާ ކަމެއް،" ނާޒިމް ވިދާޅުވި އެވެ.

ނަރުހުންގެ ޚިދުމަތުގައި 40 އަހަރު ހޭދަކުރި ނަރުހަކަށް ހަނދާނީ ފިލާ ހަވާލުކޮށް ދެއްވަނީ--މިހާރު ފޮޓޯ/ހުސައިން ވަހީދު

ނަރުހުންގެ ޚިދުމަތް ފުޅާވަމުން ގޮސް، ސްކޫލްތަކާއި ގޭގެއަށް ނަރުހުންގެ ޚިދުމަތް މިހާރު ލިބެމުންދާ ކަމަށާއި ސިއްހީ ސިޔާސަތު ކަނޑައެޅުމުގައި ވެސް ނަރުހުންގެ އެހީތެރިކަން ލިބޭ ކަމަށް ނާޒިމް ވިދާޅުވި އެވެ. ނާޒިމް ވިދާޅުވި ގޮތުގައި ނަރުހުންގެ ކުރިއެރުމަށްޓަކައި މަސައްކަތްތަކެއް ދަނީ ކުރެވުމުންނެވެ. އެގޮތުން ނަރުހުންގެ ފަންނީ އޮނިގަނޑު ވުޖޫދަށް ގެނައުމުގެ މަސައްކަތް ކުރަމުންދާ ކަމަށާއި އެކަމަކު އެކަމުގައި ދަތިތަކެއް ހުރި ކަމަށް ނާޒިމް ވިދާޅުވި އެވެ.

"މިކަމަކީ އެހެނިހެން ފަންނީ ދާއިރާތަކުގައި މަސައްކަތް ކުރާ މީހުންގެ އޮނިގަނޑާ ވެސް ރިއާޔަތް ކުރެވޭ ކަމަކަށް ވާތީ މިކަމުގައި ގޮންޖެހުންތަކެއް ހުރި އަދި މިކަމުގައި ދުވަސްތަކެއް ވެއްޖެ ކަން އަޅުގަނޑު ހިތާމައާ އެކު ފާހަގަ ކުރަން. އެހެން ނަމަވެސް އަޅުގަނޑުމެން ހުއްޓައެއް ނުލާނަން،" ނާޒިމް ވިދާޅުވި އެވެ.

ނަރުހުންނަކީ ދުނިޔޭގެ ތަރައްގީގައި އެ މީހުންގެ ހިއްސާ ވަރަށް ބޮޑު ބައެއް ކަން ފާހަގަ ކުރައްވައި، ނާޒިމް ވިދާޅުވީ ރާއްޖޭގައި މިހާރު އުފަންވާ 99 ޕަސެންޓް ކުދިންނަކީ ނަރުހުންގެ ހާޒިރުގައި އުފަންވާ ކުދިން ކަމަށެވެ. އަދި ރާއްޖޭގައި މަރުވާ މީހުންގެ 90 ޕަސެންޓް މީހުން މަރުވަނީ ވެސް ނަރުހުންގެ ހާޒިރުގައި ކަމަށާއި މިކަންކަމަކީ ނަރުހުން އެ މީހުންގެ މަސައްކަތާ މެދު ފަޚުރުވެރިވާން ޖެހޭ ފަދަ ކަމެއް ކަމަށް ނާޒިމް ވިދާޅުވި އެވެ.

"މާނައަކީ މިކަންކަން މި ދިމާވަނީ ތިބޭފުޅުން ޚިދުމަތުގައި ތިއްބަވަނިކޮށޭ، ތިިބޭފުޅުންގެ ޚިދުމަތުގެ ތެރެއިންނޭ. އެހެންވީމަ ތިބޭފުޅުންގެ މަސައްކަތާ މެދު ތިބޭފުޅުން ފަޚުރުވެރި ނުވާންވީ އެއްވެސް ސަބަބެއް ނެތް،" ނާޒިމް ވިދާޅުވި އެވެ.

އެ ހަފުލާގައި އައިޖީއެމްއެޗްގެ ސީއީއޯ ފަރުހަތު ޝަހީރު ވިދާޅުވީ ބަލި މީހުންނަށް ކޮންމެ ދުވަހަކު ނަރުހުން ފޯރުކޮށް ދެނީ ވަރަށް މުހިންމު އިންސާނީ ޚިދުމަތެއް ކަމަށާއި އެ މަސައްކަތުގައި އެގޮތުގައި ދެމި ތިބުމަށް އިލްތިމާސް ކުރައްވާ ކަމަށެވެ. ސިއްހީ ޚިދުމަތް ފުރިހަމަ އަށް ފޯރުކޮށް ދިނުމުގައި ނަރުހުންގެ ދައުރު ވަރަށް ބޮޑު ކަމަށް އޭނާ ވިދާޅުވި އެވެ.

މިރޭގެ ހަފުލާގައިވަނީ ނަރުހުންގެ ޚިދުމަތުގައި 40 އަހަރު ހޭދަކޮށްފައިވާ ދެ ނަރުހަކަށް އެކަމުގެ ހަނދާނީ ފިލާ އާއި އިނާމު ހަވާލުކޮށްފަ އެވެ.