ކްރިމިނަލް ކޯޓުގައި އޮތް ޝަރީއަތަކަށް ފަހު އަދީބު ވަޑައިގަންނަވަނީ: ނާޒިމްގެ ކޮޓަރިން ފެނުނު ހަތިޔާރުތަކުން އަދީބުގެ ޑީއެންއޭ ވަނީ ފެނިފައި ކަމަށް ފުލުހުން ބުނޭ.---ފޮޓޯ: މިހާރު
21 ޖޫން 2016 - 23:42
66 comments
ކުރީގެ ޑިފެންސް މިނިސްޓަރު މުހައްމަދު ނާޒިމްގެ ކޮޓަރިން ފެނުނު ފިސްތޯލައިން ކުރީގެ ނައިބު ރައީސް އަހުމަދު އަދީބުގެ ޑީއެންއޭ ފެނިފައިވާ ކަމަށާއި އެކަމަކު ނާޒިމް ފްރޭމްކޮށްފައިވާ ކަމަށް ބުނަން އަދި އަވަސް ކަމަށް ފުލުހުން މިރޭ ބުނެފި އެވެ.
މިދިޔަ އަހަރުގެ ޖެނުއަރީ މަހުގެ ތެރޭގައި ގ. އެނިފްގޭގައި ނާޒިމް ދިރިއުޅޭ އެޕާޓްމެންޓްގައި ހުރި އޭނާގެ ކޮޓަރިން ފިސްތޯލައެއް ފެނުނު މައްސަލާގައި ނާޒިމް 11 އަހަރަށް ޖަލަށްލާން ހުކުމްކޮށްފައިވާއިރު، އެ މައްސަލަ މިހާރު ދަނީ ސުޕްރީމް ކޯޓުގައި ހިނގަމުންނެވެ. ނާޒިމްގެ ފަރާތުން އަބަދުވެސް ބުނަމުން ދިޔައީ އެއީ ބަޔަކު އެތަނުގައި ބޭއްވި ފިސްތޯލައެއް ކަމަށާއި އެކަމުގެ ތުހުމަތު އެންމެ ބޮޑަށް ކުރެވެނީ އަދީބަށް ކަމަށެވެ.
ފިސްތޯލައިން އަދީބުގެ ޑީއެންއޭ ފެނިފައިވާ ކަމަށް ނާޒިމްގެ ވަކީލުން މިރޭ ބުނެފައި ވަނިކޮށް، ފުލުހުން މިރޭ ބޭއްވި ޕްރެސް ކޮންފަރެންސެއްގައި އެެސިސްޓެންޓް ކޮމިޝަނާ އޮފް ޕޮލިސް އަބްދުﷲ ނަވާޒު ވިދާޅުވީ ފިސްތޯލައިން އަދީބުގެ ޑީއެންއޭ ފެނިފައިވާ ކަމަށާއި އެކަމަކު އެ ފިސްތޯލައާ އަދީބާ ގުޅުން އޮތް ކަމަށް މިވަގުތު ބުނެވެން ނެތް ކަމަށެވެ. ނަވާޒް ވިދާޅުވީ ތަހުގީގު ދަނީ އަދިވެސް ކުރިއަށް ކަމަށެވެ.
"ހަމައެކަނި ޑީއެންއޭ ޕްރޮފައިލެއް ފެނުމުން ކޮންކްލޫސިވްކޮށް ނުބުނެވޭ އެ އެއްޗެއް ނިސްބަތްވަނީ އެ މީހަކަށޭ. އަދިވެސް ނަތީޖާ ނުލިބޭ ޕްރޮފައިލް ހުރި ވާހަކަ ދަންނަވާލަން. އެއީ ސީދާ މިވެނި މީހަކާ ގުޅުނީއޭ މި ހިސާބުން ނިމުނީއޭ އެގޮތަށް ނުނަންގަވާތި. އަދި ކުރިއަށް ހުރި ތަހުގީގުތަކުގައި އިތުރު މައުލޫމާތު ލިބޭނެ ކަމަށް ގަބޫލުކުރަނީ،" ނަވާޒު ވިދާޅުވި އެވެ.
ފުލުހުން ބޭއްވި ނިއުސް ބްރީފިންގައި އެސިސްޓެންޓް ކޮމިޝަނަ އޮފް ޕޮލިސް ނަވާޒް ވާހަކަ ދައްކަވަނީ.---ފޮޓޯ: މުހައްމަދު ޝަރުހާން/މިހާރު
އޭނާ ވިދާޅުވި ގޮތުގައި އަދީބުގެ ޑީއެންއޭ ފިސްތޯލައިން ފެނުނު ކަން މާދަމާ ޕްރޮސެކިއުޓާ ޖެނެރަލްގެ އޮފީހަށް ވެސް އަންގާނެ އެވެ.
ޑީއެންއޭ ތަހުލީލުތައް ނުކޮށް ނާޒިމަށް ދައުވާކޮށްފައިވާތީ، އެކަމާ މެދު ނޫސްވެރިއަކު ސުވާލު ކުރުމުން ނަވާޒު ވިދާޅުވީ އެއީ އަބަދުވެސް ފުލުހުން އަމަލުކުރާ އުސޫލެއް ކަމަށެވެ. ހެކި ލިބޭ މިންވަރަކުން ދައުވާކުރަން ފޮނުވުމަކީ އެހެން ބައެއް މައްސަލަތަކުގައި ވެސް އަމަލުކުރާ އުސޫލެއް ކަމަށް އޭނާ ވިދާޅުވި އެވެ.
ސުޕްރީމް ކޯޓުގައި މިއަދު އޮތް ޝަރީއަތަށް ނާޒިމް ވަޑައިގަންނަވަނީ.---ފޮޓޯ: މިހާރު
"ދައުވާކުރަން ފޮނުވި ނަމަވެސް ނަތީޖާ ލިބޭ މިންވަރަކުން ކުރިން ވެސް ވާނީ ޕްރޮސެކިއުޓާ ޖެނެރަލްގެ އޮފީހާ އެ މައުލޫމާތު ހިއްސާކޮށްފައި. ކޯޓުގައި މައްސަލަ ކުރިއަށް ގެންދިއުމަކީ ޕްރޮސެކިއުޓާ ޖެނެރަލް ކުރާ ކަމެއް. ހުކުމް ކުރުމަކީ ޖުޑިޝަރީން ކުރާ ކަމެއް. އަޅުގަނޑުމެން ކުރާ ކަމަކީ ތަހުގީގުކޮށް، އެ ހިސާބަށް ފެންނަ އެއްޗެއް ޕްރޮސެކިއުޓާ ޖެނެރަލާ ހިއްސާ ކުރުން. އެކަން މި މައްސަލާގައި ވެސް ކޮށްފައިވާނީ،" ނަވާޒު ވިދާޅވި އެވެ.
ނާޒިމްގެ ވަކީލުން ބުނާގޮތުން އެ ހަތިޔާރު އެތަނުގައި ބޭއްވީ އާސިފް ނަމަކަށް ކިޔާ ފުލުހެކެވެ. އޭނާ އެކަން ކުރި ކަމުގެ ހެކިން އެބަތިބި ކަމަށް ވެސް ނާޒިމްގެ ވަކީލުން ބުނެއެވެ. އެކަމަކު ދައުލަތުން ބުނަމުންދަނީ އެއީ ދޮގު ވާހަކަތަކެއް ކަމަށާއި އެ ހެކިން ކޯޓަށް ގެންނަންޖެހޭ ކަމަށް ގަބޫލު ނުކުރާ ކަމަށެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
އަދީބު
24 June 2016
އަނެއްކާ ފުލުހުން އަދީބު ފުރޭމުކުރާނީ ނޫންބާ؟ ހަމަހިތައްއަރާ، ނާޒިމް ނޫނީ ފުލުހުން އަދީބު ފުރޭމުކުރަން ކުރާކަމަކަށް، ނާޒިމްގެ ގެއިން ފެނުނު ފިސްތޯލައިން އަދީބުގެ ޑީއެންއޭ ފެނުމަކުން އެއްވެސް ކަމެއްސާބިތެއްނުވޭ، އޭގެން އެގޭ އެއްކަމަކީ އެފިސްތޯލައިގަ އަދީބު އަތްލިކަން ނުވަތަ އަދީބުގެ ހަށިގަނޑުގެ ކޮންމެވެސް ނިޝާނެށް އެފިސްތޯލައަށް ލީ ނޫނީ ހުރީކަން އެވެދާނެ ނާޒިމުގެ ރޭވުމަކަށްވެސް ނޫނީ ފުލުހުންގެ ރޭވުމަކަށްވެސް ދެން
އަލީ
22 June 2016
ޑީއެންއޭ ފެނުނުލެއް ވަރަށްލަސް. އަނެއްކާ އަދީބު ކޮޓަރިން ހޯދި ފިސްތޯލައާ ނާޒިމްކޮޓަރިން ފެނުނު ފިސްތޯލަ އޮޅުމަކުން ބަދަލު ވީއެއްނޫންތަ.؟؟؟ މިކަންވެސް އެބަޖެހޭ ބަލަން. އަދީބު ކޮޓަރިން ހޯދިފިސްތޯލައިގަ އަދީބު ޑީއެންއޭ އެބަހުރިތޯ. އިންސާފު ލިބޭނީ އޭރުން ދެއްތޮ.
އިސްލާހް
22 June 2016
މިފަދަ ގައުމެއްގައިތަ މަރުގެ އަދަބުދޭން މީހުން މިގޮވަނީ؟
މާހިރު
22 June 2016
ތިކަމެއް ހިނގީ ނާޒިމާއި އަދީބު މައްސަލަ ޖެހުނު ހިސާބުންކަން އެއީ އެންމެންދަންނަ ބޮޑު ސިއްރެކެވެ. އަދި ޚިޔާނާތުގެ މައްސަލަ ހަމައެކަނި އަދީބުގެ ބޮލަށް ކަނޑާލައިގެން ތިއްބަސް އެއީވެސް ހަޤީޤަތެއްކަމަކަށް ގިނަބަޔަކު ޤަބޫލެއް ނުކުރާނެއެވެ.
ބުރޯ
22 June 2016
ދެން ކޮންމެހެން ޓާޓާ ކިޔާނެކަމެއްނެތް
ސާބަސް
22 June 2016
މަށަށް މޮޅީ ނަވާޒުމެން. ވޯލްޑް ނަމްބަރ ވަން ޕޮލިސް ގެނެރަލް. ދެން މާދަން ބުނެފާނެ އުހުން އެފިސްތޯލައެއް ނޫން މި ފިސްތޯލަ، ދެން އަދި ބުނާކަށްނޭނގޭ އެަީ ކޮންފިސްތޯލައެއްކަމެއް، މިވަގުތު ބުނަން ދަތި... ގައުމު ހަލަބޮލި ވުމާ ނާންމާންކަމެއްގެތެރެއަށް ވެއްޓުމުގެ އަސްލު ޕޮލިސް ސިޔާސީ ވުން.
ފަސް ހިއްސު
22 June 2016
ފުލުހުން ތީ މިޤައުމުގެ ހަލާކް..
ބޯގޯސް
22 June 2016
ނަވާޒް ވެސް ވަރަށް އަވަހަށް ދާނެ ރޯދަމަހުގައިވެސް ބިރެއްނެތް ދޮގުމައްޗަށް ދޮގުހަދާއިރު. ސަވާޒު 1 ފުރަތަމަ ނިއުސް ކޮންފްރެންސްގައި ބުނީ ފިސްތޯލަ ފޮލޯ ކުރަމުން ގޮސްކަމަށް އެގެޔައް ވަނީ 1- ނާޒި އެގެޔައް ވަނީ އެވަގުތުހޭ؟ 2- އޭރު އެގެޔަކީ ނާޒު އެޅޭ ގެކަމައް ފުލުހުންނަށް ނޭނގޭ ކަމަށް ބުނާ ބުނުން އެއީ ބޮޑު ދޮގެއް. މިދައްކަނީ އާދައިގެ މީހެއްގެ ވާހަކައެއް ނޫން ނަވާޒް. ނަވާޒްޖެހޭ އުޅެން ބޭނުމީޔާ އަދި މަޤާމް ބޭނުމިއްޔާ ދޮގުހަދަން. އެކަމަކު ހަދާންކޮއްލާތި މާތް މަހެއްގައި ދުވާލު ނުކައި ހުރީމަ ނިމުނީއެއްނޫން. ނުކައި ހުރުމަކުން ނަވާޒް ނުވެސް ހިކެއްނުން. ދޯ
ހަސަނު
22 June 2016
ކުރިން ބުނި ކާކުކަން ނޭގޭ މީހެއްގެ އެއްޗެއް އެބަ ހުއްޓޭ. އޭރު އަދީބު ހުރީ އޭނާގެ ފުރި ހަމަ ބާރުގަ. އެހެންވީމާ އެއީ އަދީބުގެ އެއްޗެއްކަން ބުނާކަށް ނުކެރުނު.. އޭގެ އަހަރެއް ފަހުން އަދީބު ނުބައިވެ ޖަލަށް ލިމާ މިއަދު ބުނެވިއްޖެ އައީ އަދީބުގެ ޑިއެންއޭއޭ.. މިއަދު އަދި އެބަ ބުނޭ އަދި އެހެން މީހެއްގެ އެއްޗެއްވެސް އެބަ ހުއްޓޭ... މަހިތަށް އަރަނީ އެއީ ކާކުގެ ޑިއެންއޭކަން ޕޮލިހުންނަށް ބުނެވޭނީ މިހާރުގެ ސަރުކާރު ވެއްޓި ޔާމީން ޖަލަށް ލީ ދުވަހަކުން ބާވައޭ.....
ޒަބީބު
22 June 2016
ކޮމެންޓް ކުރާ ކުދިން ފުލުހުންނޭ ބުނީމަ މުޅި މުއައްސަސާ އަށް ނިސްބަތްވެއެވެ. ފުލުހުންގެ ތެރޭ ވެސް ރަނގަޅަށް މަސައްކަތްކުރާ މީހުން މަދެއް ނޫނެވެ. އަދި މަޖްބޫރުން ކަންތައްކުރާ މީހުންވެސް އުޅެއެވެ. އަދި ރަނގަޅަށްކަމެއް ކުރީމަ ސިޔާސީ ކަންތައް ވަދެގެން އެކަމާގެން ކުރިއަށް ނުދެވިގެން ހިތްމަރުވާ މީހުންވެސް ތިބެއެވެ. މިކަހަލަ އެތައް ސަބަބެއް ވެއެވެ. އެހެންވީމާ އެންމެ ރަނގަޅީ ފުލުހުންގެ ބައެކޭ ބުނުމެވެ.