ވެމްކޯ އިން މާލޭގެ ގޭގެއިން ކުނި އުކާލުމުގެ މަސައްކަތްކުރަނީ. ފޮޓޯ: މިހާރު
12 ޖުލައި 2017 - 13:06
މާލޭ ސަރަހައްދުން ކުނި އުކާލާ ނައްތާލަން ރަނގަޅު ނިޒާމެއް ރޭވިފައެއް ނުވެ އެވެ. ކޮންމެ ގެއަކުން ކުނި އުކާލަން ޖެހެނީ އެ ގެއެއްގައި ދިރިއުޅޭ ބަޔަކު އަމިއްލައަށެވެ. އެކަމުގެ ސަބަބުން މާލޭގެ ރައްޔިތުންނަަށް ވަނީ ވަރަށް ބޮޑެތި ދަތިތަކަކާ ކުރިމަތިވެފަ އެވެ. މި މައްސަލައަށް އެދެވޭ ހައްލެއް ހޯދައިދިނުމުގެ ގޮތުން ސަރުކާރުން ވަނީ ވޭސްޓް މެނޭޖްމަންޓް ކޯޕަރޭޝަން (ވެމްކޯ)ގެ ނަމުގައި ކުންފުންޏެއް އުފައްދައިފަ އެވެ.
ވެމްކޯ އުފެއްދުމަށްފަހު އެ ކުންފުނީގެ ހަރަކާތެއްނެތި އެތައް އަހަރެއް ވަންދެން އޮތެވެ. ނަމަވެސް މިހާރު އެ ކުންފުނިން ވަނީ ރާއްޖޭގައި ކުނި ނައްތާލުމަށް ބޮޑެތި ތައްޔާރީތަކެއް ވާން ފަށައިފަ އެވެ. އެގޮތުން ސަރުކާރުން އެކުލަވާލި ކުނިނައްތާލުމުގެ ގަވައިދުގައިވާ ގޮތަށް ކުނި މެނޭޖްކުރުމަށް އެ ކުންފުނިން އަންނަނީ ބޮޑެތި މަސައްކަތްތަކެއް ކުރަމުންނެވެ.
މާލޭ އާއި މި ސަރަހައްދުގެ ގިނަ ގެތަކުން ކޮންމެ ދުވަހަކު ކުނި އުކާލަނީ ބިދޭސީންނާ ހަވާލުކޮށްގެންނެވެ. އެހެން އެކަން ކުރަން ޖެހެނީ އިތުރު ގޮތެއް ނެތީމަ އެވެ. ނަމަވެސް ވެމްކޯ އިން މިހާރު އަންނަނީ މާލޭގެ ގޭގައި ކުޑަ އަގެއްގައި ކުނި އުކާލަދިނުމުގެ ހިދުމަތް ދިނުމަށް ފެށުމަށް ތައްޔާރުވަމުންނެވެ.
ގޭގެއިން ކުނި އުކާލުމުގައި ދެ ގޮތަކަށް ކުރިއަށް ގެންދަން ވަނީ ނިންމައިފަ އެވެ. އެއީ ރަޖިސްޓްރީކުރާ އެޕާޓްމެންޓްތަކަށް ވެމްކޯގެ މުވައްޒަފުން އަރައި ކުނި ކޮތަޅުތައް ނެގުން ނުވަތަ އެ އިމާރާތެއްގެ ތިރީގައި ބަހައްޓާ ޑަސްބިނުން ކުނި ނެގުމެވެ. ނަމަވެސް މީގެ މާނައަކީ އެ ކުންފުނިން ގޭގޭގައި ޑަސްބިން ބަހައްޓައިދޭ ވާހަކައެއް ނޫނެވެ.
ވޭސްޓް ކަލެކްޝަން ސާވިސް ނުވަތަ ގޭބިސީތަކުން ކުނި އުކާލުމުގެ ހިދުމަތް ދޭން ނިންމާފައި ވަނީ މާލެ 10 ޒޯނަކަށް ބަހާލައިގެން، ބޭނުންވާ ބަޔަކު ރަޖިސްޓްރީކޮށްގެންނެވެ. އެޕާޓްމެންޓަށް އަރައި ކުނި ނަގާ ނަމަ، ވެމްކޯ އަށް 150ރ. ދައްކަން ޖެހެ އެވެ. އިމާރާތުގެ ތިރީގައި ބަހައްޓާ ޑަސްބިނުން ކުނި ނަގާ ނަމަ ވެމްކޯ އަށް ދައްކަން ޖެހެނީ 100ރ. އެވެ. އަދި ކޮންމެ ގެއަކުން ދުވާލަކު އެއްފަހަރު ކުނި ނަގަންދާ ގޮތަށް ވެމްކޯ އިން ވަނީ ހަމަޖައްސައިފަ އެވެ.
މާލޭގެ ގޭގެއިން ކުނި އުކާލަން ވެމްކޯއިން ބޭނުންކުރާ ވެހިކަލެއް ދައްކާލަނީ. ފޮޓޯ: މިހާރު
ގިނަ އެޕާޓްމަންޓްތަކެއް ހިމެނޭ ގޭގެއިން ކުނި އުކާލާ ނަމަ ކޮންމެ ގެއެއްގެ ކޮންމެ އެޕާޓްމަންޓުން ވެސް ކުނި އުކާލުމުގެ ހިދުމަތްދެ އެވެ. އެކަން ކުރަނީ މިހާރު ވެސް ގޭގެއިން ބިދޭސީންނާ ހަވާލުކޮށްގެން އެކަން ކުރިޔަށް ގެންދާ ގޮތަށެވެ.
އެ ކުންފުނިން ގޭގެ އިތުރުން ހޮޓާ، ކެފޭ، ރެސްޓޯރަންޓް އަދި އޮފީސް ބިލްޑިން ފަދަ ތަންތަނުގެ ކުނި ވެސް ކޮންމެ ދުވަހަކު އުކާލަދިނުމުގެ ހިދުމަތްދޭ ގޮތަށް ވެސް ހަމަޖެހިފައިވެ އެވެ.
ކުނި އުކާލުން މުޅި މާލެ އަށް ފުޅާކުރަން ނިންމާފައިވާއިރު އެ ކުންފުނިން ވަނީ މިދިޔަ ޑިސެމްބަރު ފުރަތަމަ ބުރު ފަށައިފަ އެވެ. އެއީ، ޒޯން އެކެއްގެ ގޮތުގައި ކަނޑައަޅާފައިވާ ހެންވޭރު އަޑިޕާކު ސަރަހައްދުން ފެށިގެން ކަލާފާނު ސްކޫލް ސަރަހައްދުގައި ހިމެނޭ ގެތަކެވެ. އޭގެ ފަހުން މުޅި މާލެ ސަރަހައްދަށް ފުޅާކުރުމުގެ މަސައްކަތް އަންނަނީ ކުރަމުންނެވެ.
މާލެ ސަރަހައްދުގައި ހިމެނޭ ގެތަކުން ވެމްކޯ މެދުވެރިކޮށް ކުނި އުކާލުމަށް ރަޖިސްޓްރީކުރުމުގެ ފުރުސަތު މިހާރު ވެސް އެބައޮތެވެ. އަދި ސަރުކާރުން ހަމަޖައްސާފައި ވަނީ އެ ކުންފުންޏާ ހަވާލުނުކޮށް ގޭގެއިން އަމިއްލައަށް ކުނި އުކާލާނަމަ ރަޖިސްޓްރީކުރާ ގޮތަށެވެ.
ކުނި އުކާލަން ރަޖިސްޓްރީކުރަން ބޭނުންވާ ފަރާތްތަކަށް އީ މެއިލް އަދި ހެޑް އޮފީހުން ވެސް ރަޖިސްޓްރީކުރުމުގެ ފުރުސަތު ވަނީ ހުޅުވާލައިފަ އެވެ. އެގޮތުން ރަޖިސްޓްރީކުރަން ހުށަހަޅާތާ ފަސް ދުވަސްތެރޭގައި އެ ހިދުމަތް ކުރިޔަށް ގެންދާނެ ގޮތް އޮޅުން ފިލުވައި މައުލޫމާތު ދިނުމަށް އެ ކުންފުނިން ގުޅާނެ އެވެ. އަދި އެތަންތަނުން ކުނި ނަގަން ފަށާނީ އޭގެ ފަހުންނެވެ.
ވެމްކޯ އިން މާލެ ސަރަހައްދުން ކުނި އުކާލަން ބޭނުންކުރަނީ އެންމެ ޒަމާނީ ވަސީލަތްތަކެވެ. އެގޮތުން މަތި ބަންދުކުރެވި، ރައްކާތެރިކަމާއެކު ކުނި އުފުލަން ބޭނުންކުރާ އުޅަނދުތަކެއް ގެނެސް ދަނީ ބޭނުންކުރަމުންނެވެ. އެގޮތުން ކުނި އުފުލުމަށް އިތުރު 30 އުޅަނދު މިދިޔަ ފެބްރުއަރީ މަހު ގެނެސްފައިވެ އެވެ. ކުނީގެ މައްސަލަ ހައްލުކުރުމަށް އަލަށް ގެނެސްފައިވަނީ 20 ޓްރައިސައިކަލާއި 10 ކޮމްޕެކްޓާ ޓްރަކްސް އެވެ.
މާލޭގައި ކުނި އުފުލަން ވެމްކޯއިން ގެނެސްފައިވާ ވެހިކަލްތަކެއް: ކުނި އުފުލަން ވެމްކޯއިން ވަނީ ގިނަ އަދަދެއްގެ ވެހިކަލް ރާއްޖެ ގެނެސްފައި.
ކުނި އުކާލުމުގެ މައްސަލަ ބޮޑު މާލޭގައި ފަސޭހަ ކަމާ އެކު އެކަން ކުރެވޭނެ އިންތިޒާމް ހަމަޖައްސަން ވެމްކޯއިން ވަނީ ކޮމްޕެކްޓަ ޓްރަކް، ޑަމްޕް ޓްރަކް އަދި ޓްރައިސިކަލް ފަދަ އުނޅަދުތައް ހޯދާފަ އެވެ. މިއީ ތިމާވެއްޓާ ރަށްޓެހި އަދި އީޕީއޭގެ މިންގަނޑުތަކަށް ފެތޭ އުނޅަދުތަކެއް ކަމަށް ވެސް ވެމްކޯ އިން ބުންޏެވެ.
ވެމްކޯއިން ކުނި އުކާލަން ބޭނުންކުރާ ވެހިކަލްތަކަކީ މާލެ ކަހަލަ ހަނި މަގުތައް ގިނަ ރަށެއްގައި ދުއްވަން އެންމެ އެކަށީގެންވާ ވެހިކަލްތަކެކެވެ.
Copyright © 2025 Mihaaru · Terms and Conditions · Privacy Policy
ކޮމެންޓްތައް
100ރ
13 July 2017
ކުރިން ކުނި ފީ 100ރ. މިހާރު 150ރ ދައްކަަން މިޖެހެނީ. މަޖުބޫރު ހިދުމަތް.
އިނގޭތީ ބުނެލީ
13 July 2017
މިހާުރު ގުޅަންޖެހެނީ 1666 އަށޯ...ފޯނު ނަގާ
ވެމްކޯ ފޭން
13 July 2017
ޚިދުމަތް ވަރަށް ސަކަރާތް. ކުނި އުކަން ރެޖިސްޓްރީކުރީ ކުރަންޖެހޭ ކަމެކޭ ބުނީމަ. ދެންވެސް ހަބަރެއް ނުވެގެން ގުޅާ ގުޅާ ފޯނެއް އެއްވެސް ގޮތަކަށް ނުނަގާ. އެފްބީ އިން މެސެޖް ކޮއްލީމަ ހަބަރެއްވާނަމޭ ކިޔާފަ ދިޔަ މީހާ ހަބަރެއްވެސް ނުވޭ. ދެން އޭގެ ދެދުވަހެއްގެ ފަހުން ފޯނަށް ޕްރައިވެޓް ނަމްބަރ އަކުން ގުޅާފަ ބުުނީ ކުނި ބަލާ އައިސްފައޭ މިހުރީ. ތިތަނުން ހަބަރެއްނުވެ އެގޮތަށް މީހަކު ބުނީމަ ކިހިނެއްތޯ ޔަގީންވާނީ ތިތަނުން މީހެއްކަމެއް އެއީވެސް. އެކަމު އެގޮތައްވެސް އައީ ދެތިނން ދުވަހު. އޭގެ ފަހުން އަންނަނީ އެއްނޫން. ހަބަރެއް ވީއެއްނޫން. ގުޅޭނެ ގޮތެއް އޮތީއެއްނޫން. ކުނިބަލާ އަންނަމީހާ ނާންނާތީ ގޭތެރޭ ކުނި ގިނަވެފަ. ދެން ހަދަންވީގޮތެއް ވެމްކޯއިން ބުނެދެއްވަންވީނުންތޯ. ނޫނީ ގުޅޭނެ ގޮތެއްވިޔަސް ހައްދަވައި ދެއްވީމަ ދެއްތޯ ރަނގަޅުކުރަން ޖެހޭ ކަންކަންވެސް ތިކޮޅަށް އެގިލައްވާނީ. އުސޫލެއްގެ މަތިން އޮފިޝަލް ކޮއް ތިކަން ކުރީމަ އިތުބާރު ތި ކުންފުންޔަށްވއސް ލިބޭނީ.
ހައިއްޓެ3
13 July 2017
ވެމްކޯ އޮފީހައް މައުލޫމާތެއް ސާފުކުރަން ގުޅާތާ މިއަދައް 14 ދުވަސް. އަދި ފޯނެއް ނުނަގާ
މަރީ
13 July 2017
ކުނި އުކަން މިއަންނަ ގަޑިތައް އެބަޖެހޭ ހަމަޔަކަށް އަޅުވަން. ގޭބޭރުގަ ކުނި ބެހެއްޓޭނެ ވަކި އިންތިޒާމުތަކެއް ނުހުންނަ އިރު، އެކިއެކި ގަޑީގަ އައިމަ ކިހިނެއްބާ ހުރިހާކަމެއް ހުއްޓާފަ ކުނި އުކަން އަންނަ މީހާގެ އިންތިޒާރުގަ އިންނާނީ؟ ދެން އެދުވަހު ދިމާނުވީމަ ގޭގަ ކުނި ކޮތަޅު ބަހައްޓައިގެން އަނެއްދުވަސް ވަންދެން؟
އަރީ
13 July 2017
"ވެމްކޯ އުފެއްދުމަށްފަހު އެ ކުންފުނީގެ ހަރަކާތެއްނެތި އެތައް އަހަރެއް ވަންދެން އޮތެވެ." ވެމްކޯ އުފެއްދީ 2016 ޖެނުއަރީގަ!
އުދުހޭ
13 July 2017
ބެޓެރި ސައިކަލްގެ ކުނިއަޅާބައި ތަންކޮޅެއް އުސްކުރިނަމަ ގިނަ ކުނި އެޅޭނެދޯ؟ މިހާރު ހައެއްކަ ގެއިން ކޮތަޅު ނެރޭއިރަށް އެބައި އިންނާނީ ފުރިފަ. އަދި އެތަނުގެ އަރިމަތިން އުސްކޮށް ދަގަނޑެއް ހުންނަނަމަ ހުސް ޕްލާސްޓިކް ފުޅިތަށް އޭގަ އައްސާލެވޭނެ.
ކުޑޭ
12 July 2017
ހިދުމަތް އަދި ވަރަށް ރަގަޅު
ވަގުތު
12 July 2017
ޢެކި އެކި ވަގުތުގައި ކުނި އުކާލަން އަައުން ކަޑަ. މި އުޅެނީ ކުއްޔަށް. ކުނި އެޕާރޓްމަންޓް ދޮރުމަތީ ބެހެއްޓޭކަށް ނެތް.
ގްރޭޓް
12 July 2017
ވެމްކޯގެ ކުނިއުކުމުގެ މަސައްކަތް ތަޖްރިބާކުރި އިރު ރަގަޅު. އެކަމު އޮފީހުން ފޯނުނުނަގާ މައްސަލަ ރަގަޅުކުރަން ފެނޭ.