ޕީޕީއެމަށް މަޖިލީހުން ލިބުނު ވޯޓުތައް ރެކޯޑު އަދަދަކަށް ދަށްވެއްޖެ

ޕީޕީއެމްގެ ޕާލަމެންޓްރީ ގުރޫޕުގެ ލީޑަރު އަހުމަދު ނިހާން ވިދާޅުވީ މިހާރު އުޅެނީ ސިޔާސީ މައްސަލައެއް ކަމަށާއި، ކަންކަން ހައްލުކޮށްގެން ޖަލްސާ ކުރިއަށް ގެންދެވޭނެ ގޮތެއް ހޯދަންވެއްޖެ ކަމަށް. އޭނާ ވިދާޅުވީ އިދިކޮޅު ފަރާތްތަކަށް ވެސް މަޖިލިހުގައި ހިޔާލު ފާޅުކުރުމުގެ ފުރިހަމަ ފުރުސަތު ލިބެންޖެހޭނެ ކަމަށް. އަދި މައިނޯރިޓީ ލީޑަރު އިބްރާހިމް މުހައްމަދު ސޯލިހް (އިބޫ) އާ ވެސް މިއަދު ވާހަކަ ދެއްކެވި ކަމަށް ނިހާން ވިދާޅުވި.

ޕީޕީއެމްގެ ނައިބު ރައީސް އަބްދުއްރަހީމް ވިދާޅުވީ މަޖިލިހުގެ އަޣުލަބިއްޔަތު އަދިވެސް އޮތީ ސަރުކާރަށް ކަމަށް. އަދި މިއަދުގެ ވޯޓުން އެކަން ސާފުވެއްޖެ ކަމަށް އޭނާ ވިދާޅުވި.

މަހްލޫފު ވިދާޅުވީ ސިއްރު ވޯޓަކަށް ގޮސްފި ނަމަ، މިއަދަށް ވުރެ ބޮޑު ތަފާތެއް މަޖިލީހުގައި އިދިކޮޅު މީހުން ދައްކާނެ ކަމަށް.

ޔާމީން ވިދާޅުވީ ދިވެހި ސިފައިން ތަޅާފޮޅަން ފުރުސަތު ނުދޭނެ ކަމަށާއި މަޖިލިހުގެ ތެރޭގައި އަނިޔާކުރަން ވެސް ސިފައިން ފުރުސަތު ނުދޭނެ ކަމަށް.

ސަރުކާރުގެ މެމްބަރު ޔާމީން ރަޝީދު ވިދާޅުވީ ރައްޔިތުންނަށް ބޭނުންވާ ކަންކަމުގައި އިދިކޮޅު މެމްބަރުންގެ އެއްބާރުލުން ނުލިބޭ ކަމަށް. މިއަދުގެ ޖަލްސާ އާއި އިއްޔެ ބޭއްވި ގަވައިދު ކޮމެޓީގެ ބައްދަލުވުމުގައި ވެސް ފެނުނީ އެ މަންޒަރު ކަމަށް ޔާމީން ވިދާޅުވި.

މެމްބަރު ރޮޒެއިނާ އާދަމް ރާއްޖެ ޓީވީގައި ވިދާޅުވީ ގައުމު ހަމަ މަގަށް އެޅުވުމަށްޓަކައި ސުޕްރީމް ކޯޓުން ވެސް ނިންމަންޖެހޭ ކަންކަން ނިންމަން ވެއްޖެ ކަމަށް. އޭނާ ވިދާޅުވީ ޕީޕީއެމްގެ ސައިޒަކީ 28 މެމްބަރުންކަން މިހާރު އެނގިއްޖެ ކަމަށާއި އެއިން އެނގެނީ ސަރުކާރަށާއި މަސީހަށް ތާއީދު ނެތުން ކަމަށް.

ލަންކާގެ ސަފީރަކަށް މުންދު އައްޔަން ކުރުމަށް 28 ވޯޓު ލިބުނުއިރު، އިންޑިއަން އޯޝަން ރިމް އެސޯސިއޭޝަން (އަޔޯރާ) ގައި ރާއްޖެ ބައިވެރި ވުމުގެ މައްސަލަ ފާސްވީ އެންމެ 27 ވޯޓުން.

މަސީހް ޖަލްސާ ނިންމާލެއްވުމަށް ފަހު ވަޑައިގެންފި. މާދަމާ ވެސް ޖަލްސާ އޮންނާނެ ކަމަށް އިއުލާން ކުރެއްވި.

މިއީ ފަހުގެ ތާރީޚެއްގައި މިފަދަ ދަށް އަދަދަކުން، ސަރުކާރުގެ ކޯލިޝަނުން ކަމެއް ފާސްކުރި ފުރަތަމަ ފަހަރު. އެކަމަށް ހަޖޫ ޖަހައި އިދިކޮޅު މެމްބަރުން ގެންދަނީ ސަރުކާރުގެ މެމްބަރުންނަށް މަލާމާތް ކުރަމުން.

ލަންކާގެ ސަފީރަކަށް މުންދު ހަމަޖެއްސުމަށް 28 މެމްބަރުންގެ ވޯޓާއެކު ފާސްކޮށްފި.

މަޖިލިސް ހަލަބޮލިވެ، ނިޒާމު ގެއްލިފައިވާއިރު ވެސް މަސީހް ޖަލްސާ ކުރިއަށް އެބަގެންދަވާ.

މަސީހް ރިޔާސަތުގައި އިންނަވައިގެން ޖަލްސާ ކުރިއަށް ގެންދަވާއިރު ސަރުކާރުގެ މެމްބަރުންނާއި އިދިކޮޅު މެމްބަރުން ގެންދަނީ އަޑުގަދަ ކުރަމުން. އަދި އެއް އަޑަކަށް ޗެމްބަރުގައި އޮތީ އިދިކޮޅު މެމްބަރުން މަސީހަށް އަމާޒުކޮށް "ފޭރޭ" ގޮވުން.

މަސީހް ޖަލްސާ ފައްޓަވައިފި. އެކަމަކު މަސީހް ވިދާޅުވާ އެއްޗެއް ސާފެއް ނުވޭ. މެމްބަރުންގެ މެދުގައި ހޫނު ޒުވާބުތައް ދަނީ ހިންގަމުން.

މަޖިލިހުގެ ރިޔާސަތުގެ ކުރިމަތީގައި ސިފައިންގެ އިތުރުން ސަރުކާރުގެ ބައެއް މެމްބަރުން މިހާރު އެތުރިގެން އެބަތިބި.

ގަލޮޅު ދެކުނު ދާއިރާގެ މެމްބަރު އަހުމަދު މަހްލޫފު ވިދާޅުވީ ސިފައިންގެ ބައެއް މީހުން، ބައެއް މެމްބަރުންނަށް އަނިޔާކޮށްފައިވާ ކަމަށް. އޭގެ ތެރެއިން މެމްބަރު ނިޒާރުގެ ގައިގައި "ތަޅާލާފައިވާ" ކަމަށް މަހްލޫފު ވިދާޅުވި.

ސިފައިންގެ އެހީތެރިކަމާ އެކު މަސީހް ކޮޓަރިކޮޅުން ނުކުމެވަޑައިގެން ޗެމްބަރަށް ވަޑައިގަންނަވަނީ. އިދިކޮޅު މެމްބަރުން ގެންދަނީ މަސީހްގެ ފަހަތުން "ފޭރޭ" އަށް ގޮވައި ހިނގަމުން.