ގާސިމް 3 އަހަރަށް ޖަލަށް ލާން ހުކުމް ކޮށްފި؛ މަޖިލީހުގެ ގޮނޑި ގެއްލިއްޖެ

ގާސިމްގެ މައްޗަށް ކްރިމިނަލް ކޯޓުން ކުރި ތިން އަހަރުގެ ޖަލު ހުކުމުގެ ގަޒިއްޔާ އެ ކޯޓުން މިހާރު ވަނީ އާންމުކޮށްފައި. އޭގައިވާ ގޮތުން ގާސިމްގެ ހުކުމް ތަންފީޒު ކުރަމުން ދިޔަ ނަމަވެސް ރާއްޖެ އިން ބޭރުން ހެދުމަށް ޑޮކްޓަރުން ލަފާދިން ޓެސްޓުތަކާއި ފަރުވާ ދިނުން ހުރަހަކަށް ވެގެން ނުވާނެ. އެހެންވެ އެ ޓެސްޓްތަކާއި ފަރުވާ ގާސިމަށް ރާއްޖެ އިން ބޭރުން ހޯދޭނެ އިންތިޒާމު ހަމަޖައްސައި ދިނުމަށް ދައުލަތުގެ ކަމާ ބެހޭ އިދާރާތަކަށް އެ ހުކުމުގައި ވަނީ އަމުރުކޮށްފައި.

ގާސިމްގެ ވަކީލުން ފާހަގަކުރެއްވި ގޮތުގައި ދައުވާ ލިބޭ މީހަކު ބަލިވެގެން، ޝަރީއަތަށް ހާޒިރުވެވެން ނެތް ކަމަށް އަންގައިފި ނަމަ، ޖިނާއީ އިޖުރާއަތުގެ ގާނޫނުގެ ދަށުން ވެސް ދެ ދުވަހުގެ ފުރުސަތު ދޭންޖެހޭ. އެކަމަކު ގާސިމްގެ ޝަރީއަތް މިރޭ ކުރިއަށް ގެންދިޔައީ އެ ފުރުސަތު ވެސް ގެއްލޭ ގޮތަށް ވަކީލުން ވިދާޅުވި.

ހިސާން ވިދާޅުވީ ގާސިމްގެ ބޭސްފަރުވާ އަށް ކޮންމެހެން ރާއްޖެ އިން ބޭރަށް ވަޑައިގަންނަވަންޖެހޭތީ، އެ ފުރުސަތު ދެއްވުމަށް ކޯޓުގައި ތަކުރާރުކޮށް އެދިވަޑައިގެންފައިވާ ކަމަށް. އަދި މިއަދުގެ މެންދުރުގެ ޝަރީއަތުގައި އިންނަވަނިކޮށް ގާސިމް އަނބުރައިގަނެގެން ވެއްޓުނީ ވެސް، ރާއްޖެ އިން ބޭރަށް ވަޑައިގަތުމުގެ ފުރުސަތު ކޯޓު އަމުރަކުން ހިފަހައްޓާފައިވާތީ ދިމާވި ކަމަކުން ކަމަށް ހިސާން ވިދާޅުވި.

ކުރީގެ ޑެޕިއުޓީ ޕްރޮސެކިއުޓަ ޖެނެރަލް ހުސެއިން ޝަމީމް ވިދާޅުވީ ޖިނާއީ އިޖުރާއަތުގެ ގާނޫގައި، ޝަރީއަތް ކުރިއަށް ގެންދަންޖެހޭނެ ގޮތުގެ ތާވަލެއް އޮންނަންޖެހޭއިރު، އެކަމަށް ވެސް ގާސިމްގެ ޝަރީއަތުގައި ރިއާޔަތް ކޮށްފައި ނުވާ ކަމަށް.

ގާސިމްގެ ވަކީލުން ވިދާޅުވީ ރޭގަނޑު 11 ޖަހާއިރު އޮތް ޝަރީއަތަކަށް 10:30 ގައި ޗިޓް ފޮނުވުމުން ހެޔޮހާލުގައި ހުރި މީހަކަށް ވެސް ކޯޓަށް ވަޑައިގަންނަވަން ދަތިވާނެ ކަމެއް ކަމަށް. އަދި ވިދާޅުވީ ޑޮކްޓަރުގެ ލިޔުން މިރޭ ކޯޓަށް ހުށަހަޅާފައި އޮއްވައި ވެސް މިރޭ ޝަރީއަތް ބޭއްވީމާ އެކަމާ ހިތާމަ ކުރައްވާ ކަމަށް. ވަކީލުން ފާހަގަކުރެއްވި ގޮތުގައި ގާސިމްގެ ސިއްހީ ހާލުގެ ކަންކަން މިވަގުތު އެންމެ ރަނގަޅަށް އެނގޭނެ އެއްބަޔަކީ ކްރިމިނަލް ކޯޓުގެ މުވައްޒަފުން ކަމަށް. އަދި މިއަދުގެ މެންދުރުގެ އަޑުއެހުމުގައި އިންވަނިކޮށް އަނބުރައިގަނެގެން ގާސިމް ވެއްޓުނީ ކޯޓުގެ ގިނަ އަދަދެއްގެ މުވައްޒަފުންތަކެއްގެ ކުރިމަތީގައި ކަމަށް ވަކީލުން ވިދާޅުވި.

ގާނޫނީ ވަކީލު ހިސާން ހުސެއިން ނޫސްވެރިންނަށް ވިދާޅުވީ ގާސިމަށް ހުކުމް ކޮށްފައިވާ ކަމަށް ނުރަސްމީކޮށް އެނގިވަޑައިގެންފައިވާ ކަމަށް. އޭނާ ވިދާޅުވީ ދައުވާ ލިބޭ ފަރާތުގެ ޣައިރު ހާޒިރުގައި މިރޭ ކްރިމިނަލް ކޯޓުގައި ޝަރީއަތް ހިންގުމަކީ ގާނޫނީ ވަކީލެއްގެ ހައިސިއްޔަތުން ކަންބޮޑުވާ ކަމެއް ކަމަށް. ހިސާން ވިދާޅުވީ ގާނޫނުއަސާސީ އަށް އަމަލުކުރަން ފެށި ފަހުން މިވީ ނުވަ އަހަރުގެ ތެރޭގައި މީހެއްގެ ޣައިރު ހާޒިރުގައި ޖިނާއީ މައްސަލައެއްގެ ޝަރީއަތެއް ހިންގާފައި ނެތް ކަމަށް. އަދި ގާސިމްގެ ޝަރީއަތް ކުރިއަށް ގެންދިޔަ ގޮތަށް ބަލާއިރު، ޖިނާއީ އަދުލުގެ ނިޒާމަށް ނޭދެވޭ އަސަރުތަކެއް ކުރާނެ ކަމަށް ހިސާން ވިދާޅުވި. އޭނާ ވިދާޅުވީ މި މައްސަލައިގެ ލިޔުންތައް ލިބުނުހާ އަވަހަކަށް އެ މައްސަލަ އިސްތިއުނާފު ކުރާނެ ކަމަށް.

ގާސިމަށް ތިން އަހަރުގެ ޖަލު ހުކުމެއް އައީ ރައްޔިތުންގެ މަޖިލީހުގެ ރައީސް މަސީހުގެ އިތުބާރު ނެތްކަމުގެ ވޯޓްގައި މަސީހާ ދެކޮޅަށް ވޯޓު ދެއްވާ މެމްބަރުން އިތުރު ދައުރަކަށް ހޮވައިދިނުމަށް މަސައްކަތްކޮށް ދެއްވާނެ ކަމަށް މިދިޔަ މާޗް 26 ވަނަ ދުވަހުގެ ރޭ އިދިކޮޅު ފަރާތްތަކުން ކުނޫޒްގައި ބޭއްވި ޖަލްސާގައި ވިދާޅުވުމާ ގުޅިގެން. އެ ޖަލްސާގައި ގާސިމް ވިދާޅުވީ މަސީހާ ދެކޮޅަށް ވޯޓު ދެއްވާ މެމްބަރުންނަށް ޓިކެޓް ދީ އެ މެންބަރުން ހޮވުމަށް ގުޅިފައިވާ ސިޔާސީ ހަތަރު ޕާޓީން ކޮށްދެވެން ހުރި މަސައްކަތެއް ކޮށްދެއްވާނެ ކަމަށް. އޭނާ ވިދާޅުވި ގޮތުގައި އެ ޕާޓީތަކަކީ ޖުމްހޫރީ ޕާޓީގެ އިތުރުން، ޕީޕީއެމް، އެމްޑީޕީ އާއި އަދާލަތު ޕާޓީ. ގާސިމް އެހެން ވިދާޅުވި މައްސަލައިގެ ތަހުގީގު ފުލުހުން މާޗް 30 ވަނަ ދުވަހުގެ ރޭ ފެށި.

ގާސިމް ޖަލަށް ލާން ހުކުމް ކޮށްފައި ވަނީ ޣައިރު ހާޒިރުގައި. ގާސިމް އޮންނެވި ހިތުގެ އާލާސްކަންފުޅެއްގައި އައިޖީއެމްއެޗްގައި އެޑްމިޓްކޮށްފައި.

ރައްޔިތުންގެ މަޖިލީހުގެ މެންބަރެއްގެ މައްޗަށް 12 މަސް ދުވަހަށް ވުރެ ދިގު މުއްދަތެއްގެ ޖިނާއީ ހުކުމެއް އަތުވެއްޖެ ނަމަ ގޮނޑި ގެއްލޭނެ. އެހެންވެ މި ހުކުމާ އެކު ގާސިމްގެ ގޮނޑި ގެއްލޭނެ

3 އަހަރާއި ދެ މަހާއި 12 ދުވަހަށް ގާސިމް ޖަލަށް ލާން ހުކުމް ކޮށްފި

ކްރިމިނަލް ކޯޓާ ދިމާލުން ބޮޑުތަކުރުފާނު މަގުގައި މިހާރުވެސް މީހުން ޖަމާވެފައި އެބަތިބި. ކޯޓުގައި ގާސިމްގެ މައްސަލަ ކުރިއަށްދާ ގޮތުގެ މައުލޫމާތެއް ނުލިބޭ.

އެއްވެފައި ތިބި މީހުން އެމްޕީއެލްއާ ހިސާބަށް ވަނީ ފަހަތަށް ޖައްސާފައި

މެންބަރު މަހްލޫފާއި ބައެއް މީހުން ފުލުހުންގެ ބެލުމުގެ ދަށަށް ގެންގޮސްފި. މަހްލޫފު ވަނީ ފުލުހުންގެ ވެހިކަލަކަށް އަރުވައިގެން ގެންގޮސްފައި

ގާސިމްގެ މައްސަލާގައި ކޯޓުން އަދި ގޮތެއް ނިންމި ކަމެއް ނޭނގެ. ގަލޮޅު ދެކުނު ދާއިރާގެ މެންބަރު އަހްމަދު މަހުލޫފާ އެކު ގިނަ އަދަދެއްގެ މީހުން ކޯޓު ސަރަހައްދުގައި ތިބެ ސަރުކާރާ ދެކޮޅަށް ދަނީ އަޑު އުފުލަމުން

ކޯޓަށް ހާޒިރުވުމަށް އަންގާފައިވާ ގަޑި ޖެހިގެން ދިޔައިރު، ގާސިމް ވެސް އަދި ގާސިމްގެ ވަކީލުން ވެސް ހާޒިރުވެ ވަޑައެއް ނުގަންނަވާ.