ކ. ގުރައިދޫ ބޭރުގައި އަޅާފައި އޮތް ސަފާރީއަކުން ފީނަން ފައިބައިގެން އުޅެނިކޮ މަރުވި ސްރީ ލަންކާގެ ޓޫރިސްޓް މީހާގެ މައްސަލަ އެ ގައުމުގެ ފުލުހުން ބަލަން ފަށައިފި އެވެ.
ގުރައިދޫ ސިއްހީ މަރުކަޒުން ކުރިން ބުނެފައި ވަނީ، އެ މީހާ މަރުވީ ގެނބިގެން ކަމަށް ނުބެލެވޭ ކަމަށާއި ބޮޑަށް ބެލެވޭ ގޮތުން އެއީ ގުދުރަތީ މަރެއް ކަމަށެވެ. ޑޮކްޓަރުން އޭރު ލަފާ ކުރީ އުމުރުން 33 އަހަރުގެ އެ މީހާ މަރުވީ ހާޓް އެޓޭކެއް ޖެހިގެން ކަމަށެވެ.
ދަސުން ތަރަނގަ ކިޔާ އެ މީހާ ސަފާރީއަށް ދިޔައީ އޭނާގެ ލޯބިވެރިޔާއާ އެކު އެވެ.
މީގެ ހަފުތާއެއްހާ ދުވަސް ކުރިން ހިނގި މި މަރުގެ މައްސަލަ ލަންކާ ފުލުހުން ބަލަން ފެށީ، އޭގެ ސަބަބު ދެނެގަތުމަށް މަސައްކަތް ކުރި އިސް ފަރާތް ޑރ. ސިރީ ޖަޔަންތަ ވިކްރެމަރަތުނެ، ދަސުންގެ ލޯބިވެރިޔާއާ ސުވާލު ކުރަން ފުލުހުންނަށް އެންގުމުންނެވެ. އެއީ ދަސުންގެ މަރުގެ ސަބަބު ޑޮކްޓަރަށް ދެނެނުގަނެވުމުން، އަންހެންމީހާގެ ބަޔާން ނެގުން މުހިއްމު ކަމަށް ދެކޭތީ ކަމަށް ލަންކާގެ ނޫސްތަކުގައި ވެ އެވެ.
ދަސުންގެ މަރުގެ މައްސަލައިގައި ލޯބިވެރިޔާގެ އަތެއް ވާކަމަށް އޭނާގެ އާއިލާއިން ވެސް ޝައްކު ކުރެ އެވެ.
ލަންކާގެ ޑެއިލީ މިރާ ނޫހާ ވާހަކަ ދައްކަމުން ދަސުންގެ ކޮއްކޮ ބުނެފައިވަނީ އިންޝުއަރެންސް ކުންފުންޏެއްގައި މަސައްކަތް ކުރާ އޭނާގެ ބޭބެއަކީ ލޭގެ ކޮލެސްޓްރޯލް މަތިވާތީ އެކަމަށް ފަރުވާ ކުރަމުން ދިޔަ މީހެއް ކަމަށާއި އެކަމަކު ބޭބެގެ އެ ކުއްލި މަރާ މެދު އޭނާ ވެސް ޝައްކު ކުރާ ކަމަށެވެ. އަދި އެކަމުގައި ދަސުންގެ ލޯބިވެރިޔާގެ އަތެއް ވެދާނެ ކަމަށް ވެސް އޭނާ ބުނެފައި ވެ އެވެ.
ގުރައިދޫ ސިއްހީ މަރުކަޒުން ބުނެފައިވަނީ އެ ޒުވާނާއަށް ލޮނުބޮވިފައި ނުވާތީ ގެނބުނީ ކަމަށް ނުބެލެވޭ ކަމަށެވެ.
