ޕާކިސްތާނުގައި އަނެއްކާވެސް ރޭޕުގެ މަރެއް: މި ފަހަރު ހަތަރު އަހަރުގެ ކުއްޖެއް

ޕާކިސްތާނުގައި ހަތް އަހަރުގެ ކުއްޖަކު ރޭޕްކޮށް މަރާލާފައި ވަނިކޮށް އަނެއްކާވެސް ވަނީ ހަތަރު އަހަރުގެ ކުއްޖަކު ރޭޕްކޮށް މަރާލާފައި.

ހަސަން އާމިރު، މިހާރު

18 ޖެނުއަރީ 2018 - 13:36

2 comments

އިސްލާމްއާބާދު (ޖެނުއަރީ 18) - ޕާކިސްތާނުގައި ހަތް އަހަރުގެ އަންހެން ކުއްޖަކު ރޭޕްކޮށް މަރާލި މައްސަލަ ބޮޑުވެފައި ވަނިކޮށް އަނެއްކާވެސް ހަތަރު އަހަރުގެ އަންހެން ކުއްޖަކު ރޭޕްކޮށް މަރާލައިފި އެވެ.

އަސްމާ ނަމަކަށް ކިޔާ ކުޑަ އަންހެން ކުއްޖާގެ ހަށިގަނޑު ފެނިފައި ވަނީ އުއްދަނޑި ދަނޑަކުންނެވެ. އެ ކުއްޖާގެ ހަށިގަނޑު ފެނިފައި ވަނީ ގެއްލިގެން ހޯދާތާ އެއް ދުވަސް ފަހުންނެވެ.

މަރްދާން ސިޓީގެ ގުއްޖާރް ގަރްހީ ޑިސްޓްރިކްޓުގެ މޭޔަރު ހިމާޔަތުﷲ މައްޔާރު ވިދާޅުވީ އަސްމާގެ އޮޓޮޕްސީ ރިޕޯޓް ދައްކާ ގޮތުން އެ ކުއްޖާ މަރާލުމުގެ ކުރިން ވަނީ ރޭޕްކޮށްފައި ކަމަށެވެ.

"އަސްމާގެ އާއިލާ ވަރަށް ފަގީރު. އެ ކުއްޖާގެ ބައްޕަ ލޭބަރެއްގެ ގޮތުގައި މަސައްކަތް ކުރަނީ ސައުދީގައި. އަސްމާ ކިޑްނެޕް ކުރީ ގޭގެ ބޭރުގައި ކުޅެން އުޅެނިކޮށް،" ހިމާޔަތުﷲ ވިދާޅުވި އެވެ.

ޑޮކްޓަރުން ވެސް ބުނެފައި ވަނީ އަސްމާ ރޭޕްކޮށްފައިވާ ކަމަށެވެ. ފުލުހުން ބުނީ އަންހެން ކުއްޖާ މަރާލާފައި ވަނީ ނޭވާ ހާސްކޮށްލައިގެން ކަމަށެވެ.

އަސްމާ މަރާލާފައި ވަނީ ހަތް އަހަރުގެ ޒައިނަބް އަންސާރީ މަރާލި މައްސަލާގައި ޕާކިސްތާނުގައި ހަމަނުޖެހުންތައް އިތުރުވެފައި ވަނިކޮށެވެ. ޖެނުއަރީ 4 ވަނަ ދުވަހު ގެއްލުނު ޒައިނަބުގެ ހަށިގަނޑު ފެނިފައި ވަނީ ކުނިގޮނޑަކުންނެވެ. ޒައިނަބުގެ މަރުގައި ފުލުހުންގެ އިހުމާލް އޮތް ކަމަށް ބުނެ ފުލުހުންނަށް ވެސް ދަނީ ފާޑު ކިޔުންތައް އަމާޒުވަމުންނެވެ.