އެންޓި ކޮރަޕްޝަން ކޮމިޝަން (އޭސީސީ) އިން ބެލި މައްސަލަތަކުގައި 1.3 ބިލިއަނަށް ވުރެ ގިނަ ރުފިޔާ ދައުލަތަށް އަނބުރާ ހޯދަން އަންގާފައިވާ އޭސީސީން ބުނެފި އެވެ.
އޭސީސީން އާންމުކުރި މިދިޔަ އަހަރުގެ ތަފާސްހިސާބުތައް ދައްކާ ގޮތުން ދައުލަތަށް އަނބުރާ ހޯދަން އަންގާފައިވާ 1.3 ބިލިއަން ރުފިޔާއަކީ މިދިޔަ އަހަރު އެ ކޮމިޝަނުން ބެލި މައްސަލަތަކުގައި ހިމެނޭ ފައިސާގެ އަދަދެވެ.
މިދިޔަ އަހަރުގެ ފަހު ހަތަރު މަހު ބެލި މައްސަލަތަކުގައި އެކަނި ވެސް 45 މިލިއަނަށް ވުރެ ގިނަ ރުފިޔާ އަނބުރާ ހޯދަން އަންގާފައިވާ ކަމަށް އޭސީސީގެ އެ ހިސާބުތަކުން ދައްކަ އެވެ. އެއީ އެ މުއްދަތުގައި ބެލި ހަ މައްސަލައެއްގައި ހިމެނޭ ފައިސާ އެވެ.
ދައުލަތަށް ހޯދަން އެންގި ފައިސާގެ އަދަދު އެހާ ބޮޑުވީ މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) ގެ ބޮޑު ޚިޔާނާތުގެ ފައިސާ ހިމެނޭ ގޮތުން ކަމަށް ބެލެވެ އެވެ. އެ ޚިޔާނާތުގައި 1.22 ބިލިއަން ރުފިޔާ ދައުލަތަށް ގެއްލުނެވެ. އެ މައްސަލަ އޭސީސީން ބަލައި ނިންމުމަށް ފަހު ޕްރޮސެކިއުޓާ ޖެނެރަލްގެ އޮފީހަށް ފޮނުވީ މިދިޔަ އަހަރު އެވެ.
އެމްއެމްޕީއާރުސީގެ ޚިޔާނާތާ ގުޅިގެން ގިނަ އަދަދެއްގެ ޖިނާއީ ދައުވާ އުފުލައި، ޝަރީއަތް ދަނީ ހިނގަމުންނެވެ. އެކަމަކު އެ ޚިޔާނާތުގައި ގެއްލުނު ފައިސާގެ ތެރެއިން ދައުލަތަށް މިހާތަނަށް އަނބުރާ ލިބުނީ ނިސްބަތުން މަދު އަދަދެއްގެ ފައިސާ އެވެ.
