ހަމުގެ ކުލަ އަލިކުރަން ނުވަތަ އޮމާންކުރަން ބައެއް މީހުން އަބަދުވެސް ކޮންމެވެސް އެއްޗެއްގެ އަޖުމަ ބަލަ އެވެ. މިކަން މިހެން ދިމާވާ ހަގީގީ ސަބަބަކީ ކޮބައިކަން ވިސްނާލިން ހެއްޔެވެ؟ މި ސުވާލުގެ ޖަވާބު ލިބެނީ ޖަޕާން މީހުންގެ ފަރާތުންނެވެ.
ޖަޕާނު މީހުންނަކީ ހަންގަނޑު ރީތިކަމަށް އަބަދުވެސް މަޝްހޫރު ބައެކެވެ. އެއީ ކީއްވެެހެއްޔެވެ؟
ޖަޕާންގެ މަޝްހޫރު ސްކިންކެއާ ތަޖުރިބާކާރުން ބުނަނީ މިކަމުގެ އަސްލަކީ ޖަޕާން މީހުން ލޯޝަން، ސީރަމް އަދި ކްރީމް ފަދަ އެއްޗެހި ހަންގަނޑުގައި ނުހޭކުން ކަމަށެވެ. އޭގެ ބަދަލުގައި އެ މީހުން މީގެ ކޮންމެ ބާވަތެއް ބޭނުން ކުރިޔަސް ހަމުގައި މަޑުމަޑުން އޮއްބައިގެން އެ އެއްޗެއް ހަންގަނޑުގެ ތެރެއަށް ވައްދަނީ އެވެ.
މިއަށް ކިޔަނީ "ސްކިން ޕެޓިން" އެވެ. މާނައަކީ ލޯޝަން އުނގުޅުމުގެ ބަދަލުގައި ހަންގަނޑަށް އޮއްބާލުމެވެ.
މި ޓެކްނިކް ބޭނުންކުރުމުން ގައިގައި އަތުން "ޕެޓް" ކުރުމުގެ ފުރުސަތު ލިބެ އެވެ. މިކަމުގެ ސަބަބުން ލޭ ދައުރުވުން ހަލުވިވެ ކޮލާޖަން އުފެދޭ މިންވަރު އިތުރުވެ އެވެ.
ކޮސްމެޓިކް ޑާމަޓޮލޮޖިސްޓް ފްރެންސިސްކާ ފުސްކޯ ކޮސްމޯޕޮލިޓަން މަޖައްލާ އަށް ވިދާޅުވެފައިވާ ގޮތުގައި ހަންގަނޑުގައި ލޯޝަންތައް ހޭކުމަށް ވުރެ އަތުން އޮއްބުން މާ ރަނގަޅެވެ.
އަތުން އޮއްބުމުން ހަންގަނޑާއި މަސްތަކަށް އަރާމު ލިބޭނެ ކަމަށާއި ހޭކުމުން ހަންގަނޑު ދެމޭ ގޮތް ވާނެ އެވެ. އޮއްބުމުން ލިމްފެޓިކް ސިސްޓަމްގެ މަސައްކަތަށް ވެސް ބުރުލެއް ނާރާނެ ކަމަށް އޭނާ ވިދާޅުވި އެވެ.