ޓްރަމްޕާ މެދު ހިތްހަމަ ނުޖެހޭ ފަރާތްތައް ކޮންވެންޝަނާ ދުރުގައި

ކްލެވަލޭންޑް (ޖުލައި 19) - ނޮވެމްބަރު މަހު އެމެރިކާގައި އޮންނަ ރިޔާސީ އިންތިޚާބުގައި ރިޕަބްލިކަން ޕާޓީގެ ފަރާތުން ވާދަކުރުމަށް ޑޮނަލްޑް ޓްރަމްޕް އެންޑޯސް ކުރުމަށް ބާއްވާ ކޮންވެންޝަން ޕާޓީގެ މުހިންމު ބައެއް ބޭފުޅުން ބޮއިކޮޓް ކޮށްފި އެވެ.

ކޮންވެންޝަނުގައި ޓްރަމްޕުގެ ކެންޑިޑެސީ އަށް ހުރަސް އެޅުމަށް ބައެއް ފަރާތްތަކުން މަސައްކަތްކޮށްފައިވާ އިރު ރިޕަބްލިކަން ކުރީގެ ރައީސުން ކަމަށްވާ ޖޯޖް ބުޝް އާއި ޖޯޖް ޑަބްލިއު. ބުޝް ކޮންވެންޝަނުގައި ބައިވެރިވެވަޑައިނުގަންނަވަ އެވެ. ރިޕަބްލިކަން ޕާޓީގެ 2012 ވަނަ އަހަރުގެ ރިޔާސީ ކެންޑިޑޭޓް މިޓް ރޮމްނީ ވެސް ކޮންވެންޝަނަށް ވަޑައެއް ނުގަންނަވަ އެވެ. ރޮމްނީ ވަނީ ޕްރައިމަރީގެ ތެރޭގައި ޓްރަމްޕަށް ވަރަށް ބޮޑަށް ފާޑު ވިދާޅުވެފަ އެވެ. މީގެ އިތުރުން 2008 ވަނަ އަހަރުގެ އިންތިޚާބުގައި ރިޕަބްލިކަން ޕާޓީން ވާދަކުރެއްވި ޖޯން މެކްކޭން ވެސް ހުންނެވީ ކޮންވެންޝަނާ ދުރުގަ އެވެ. ޕާޓީގެ ކުރީގެ ކެންޑިޑޭޓުންގެ ތެރޭން ކޮންވެންޝަނުގައި ބައިވެރިވެވަޑައިގަންނަވަނީ ބޮބް ޑޯލް، 92، އެވެ.

ކްލެވެލޭންޑުގެ ބައްދަލުވުމުގައި ބައިވެރިވެވަޑައިނުގަންނަވާ ސެނޭޓަރުންގެ ތެރޭގައި ބައްދަލުވުން ބާއްވާ ސްޓޭޓް ކަމަށްވާ އޯހާޔޯގެ ރޮބް ޕޯޓްމަން އާއި ޕެންސިލްވޭނިއާގެ ސެނޭޓަރު ޕެޓް ޓޫމީ ހިމެނިވަޑައިގަންނަވަ އެވެ. އަދި ޕްރައިމަރީގައި ޓްރަމްޕާ ވާދަކުރެއްވި އޯހާޔޯ ސްޓޭޓުގެ ގަވަރުނަރު ޖޯން ކަސިޗް ވެސް ވީޑިއޯއަކުން ފެނިލި ނަމަވެސް ބައްދަލުވުމަށް ވަޑައެއް ނުގަންނަވަ އެވެ.

ހަތަރު ދުވަހުގެ މުއްދަތަށް ބާއްވާ ބައްދަލުވުމުގައި ޓްރަމްޕް ރޭ ވަނީ އޭނާގެ އަނބިކަނބަލުން މެލަނިއާ ތައާރަފްކޮށްދެއްވައިފަ އެވެ.

ކޮންވެންޝަނުގައި ޓްރަމްޕް ވިދާޅުވީ ކުރިއަށް އޮތް އިންތިޚާބު ރިޕަބްލިކަން ޕާޓީން ބޮޑު ތަނުން ކާމިޔާބު ކުރާނެ ކަމަށެވެ. ބައްދަލުވުމަށް އަނބިކަނބަލުން ތައާރަފްކޮށްދެއްވީ ވެސް އެމެރިކާގެ ކުރިމަގުގެ ފަސްޓް ލޭޑީގެ ގޮތުގަ އެވެ. މީގެ ކުރީގެ ކެންޑިޑޭޓުން ކޮންވެންޝަނުގައި ތަގްރީރު ކުރައްވާފައި ވަނީ ނޮމިނޭޝަނަށް ފަހު އެވެ.

ސްލޮވީނިއާ އަށް އުފަން 46 އަހަރުގެ ކުރީގެ މޮޑެލް މެލަނިއާ ދެއްވި 14 މިނިޓުގެ ތަގްރީރުގައި ވަނީ ޓްރަމްޕަކީ ރަނގަޅު ބައްޕައެއް ކަމަށާއި ކާމިޔާބު ވިޔަފާރިވެރިއެއް ކަމަށާ އަދި ކުޅަދާނަ ރައީސަކަށް ވާނެ ކަމަށް ވިދާޅުވެފަ އެވެ.

ކޮންވެންޝަނުގައި މިއަދު ތަގްރީރު ކުރައްވާ ފަރާތްތަކުގެ ތެރޭގައި ހައުސްގެ ސްޕީކަރު ޕޯލް ރަޔަން އާއި ނިއު ޖާޒީގެ ގަވަރުނަރު ކްރިސް ކްރިސްޓީ ހިމެނެ އެވެ. ޓްރަމްޕްގެ ރަނިން މޭޓް މައިކް ޕެންސް މާދަމާ ތަގްރީރު ކުރައްވާނެ އެވެ. އަދި ބުރާސްފަތި ދުވަހު ޓްރަމްޕުގެ ދަރިކަނބަލުން އިވަންކާ ތައާރަފް ކުރައްވާނެ އެވެ. އަދި ކޮންވެންޝަން ނިންމާލުމުގެ ގޮތުން ޓްރަމްޕް ވެސް ތަގްރީރު ކުރައްވާނެ އެވެ.

ކޮންވެންޝަނުގައި ކޮންމެ ޕާޓީއަކުން ރައީސް އާއި ނައިބް ރައީސް ނޮމިނޭޓްކޮށް އެންޑޯޒް ކުރާނެ އެވެ. އަދި ޕާޓީގެ މެނިފެސްޓޯ އިއުލާން ކުރާނެ އެވެ. ކޮންވެންޝަނުގައި 2،472 ޑެލިގޭޓުން ބައިވެރިވެ އެވެ. އަދި މި އިވެންޓް 15،000 ނޫސްވެރިން ކަވަރު ކުރެ އެވެ.

ރިޔާސީ އިންތިޚާބުގައި ޑޮނަލްޑް ޓްރަމްޕް ވާދަކުރުން ހުއްޓުވުމަށް އޭނާއާ ދެކޮޅު ފަރާތްތަކުން ޕާޓީގެ ކޮންވެންޝަނުގައި ނަގަން އުޅުނު ވޯޓު ވަނީ ނާކާމިޔާބުކޮށްލައިފި އެވެ. ރިޕަބްލިކަން ކޮންވެންޝަން ކުރިއަށްދާ ހަތަރު ދުވަހު ޓްރަމްޕާ ދެކޮޅަށް އިހުތިޖާޖް ކުރުމަށް 50،000 މީހުން ކްލެވެލެންޑަށް ދާނެ ކަމަށް ބެލެވެ އެވެ.

ޓްރަމްޕަށް ފާޑުކިޔާ ފަރާތްތަކުން ދަނީ އަބްރަމް ލިންކަން އާއި ތިއޮޑޯ ރޫޒްވެލްޓް ފަދަ ވަރުގަދަ ޝަޚުސިއްޔަތުން ހިމެނޭ ޕާޓީގެ ރިޔާސީ ކެންޑިޑޭޓެއްގެ ގޮތުގައި މެކްސިކޯ އިން ރޭޕިސްޓެއްގެ ގޮތުގައި ސިފަކޮށްފައިވާ އަދި އެމެރިކާ އަށް މުސްލިމުން ވަނުމުން މަނާކުރުމަށް ގޮވާލާފައިވާ މީހަކު ނެރުމަކީ ހަމަޖެހޭ ކަމެއް ނޫން ކަމަށް ބުނަމުންނެވެ. އެކަމަކު ޕްރައިމަރީގައި ޓްރަމްޕް ވަނީ 13 މިލިއަން ވޯޓު ހޯއްދަވައިފަ އެވެ. ރިޕަބްލިކަން ޕާޓީގެ ޕްރައިމަރީގައި މީގެ ކުރިން އެހެން ކެންޑިޑޭޓަކަށް މި އަދަދަށް ވޯޓު ލިބިފައެއް ނުވެ އެވެ.