ރޮހިންޖާ ރެފިއުޖީ ކޭމްޕްތަކަށް ސަލާމަތީ މަޖިލީހުގެ މަންދޫބުން ޒިޔާރަތްކޮށް ބައެއް މީހުންނާ ބައްދަލު ކުރަނީ. --ފޮޓޯ:އޭއެފްޕީ
29 އެޕްރީލް 2018 - 17:10
1 comments
ޑާކާ (އެޕްރީލް 29) - މިއަންމާގެ އަނިޔާވެރިކަން ބޮޑުވުމުން އެ ގައުމު ދޫކޮށް ބަންގްލަދޭޝް އަށް އެތެރެވި ރޮހިންޖާ ރެފިއުޖީންގެ އެތައް ލައްކަ ބަޔަކު ދިރިއުޅޭ ކޭމްޕްތަކަށް އދ.ގެ ސަލާމަތީ މަޖިލީހުގެ މަންދޫބުން މިއަދު ޒިޔާރަތްކޮށްފި އެވެ.
މިއަންމާގައި އެ މީހުން ދިރިއުޅުނު އިރު ހިންގި ރޭޕުގެ އަމަލުތަކާއި ގަތުލް އާއްމުގެ ވާހަކަތައް މުސްލިމް ބައެއް ރެފިއުޖީން ވަނީ ކަރުނައާ އެކު އދ.ގެ މަންދޫބުންނަށް ކިޔައިދީފަ އެވެ. ރެފިއުޖީން ދިޔައީ އެ މީހުންނަށް އިންސާފު ހޯދައިދިނުމަށް އެދި ގޮވާލައި އަޑު އުފުލަމުންނެވެ.
ފަނަރަ ގައުމު ހިމެނޭ ސަލާމަތީ މަޖިލީހުގެ ސީނިއާ ޑިޕްލޮމެޓުންގެ ހަތަރު ދުވަހުގެ ދަތުރުގައި މިއަންމާ އަށް ވެސް ދަތުރު ކުރާނެ އެވެ. އަދި އެ ގައުމުގެ ލީޑަރު އަން ސަން ސޫކީއާ ބައްދަލު ކުރާނެ އެވެ. އޭގެ ކުރިން ބަންގްލަދޭޝްގެ ބޮޑު ވަޒީރު ޝެއިޚް ހަސީނާއާ ސަލާމަތީ މަޖިލީހުގެ މަންދޫބުން ބައްދަލު ކުރާނެ އެވެ. މިއަންމާ އަށް ކުރާ ދަތުރުގައި ރަކީން ސްޓޭޓަށް ދިން ގެއްލުންތައް ހޮލިކޮޕްޓަރުގައި އދ.ގެ އޮފިޝަލުން ބަލާނެ އެވެ.
މިދިޔަ އޮގަސްޓް މަހު ފަހުކޮޅު ރޮހިންޖާ މުސްލިމުންނަށް މިއަންމާ ސިފައިން ދިން އަނިޔާތަކާ ގުޅިގެން އެ ގައުމުގެ ސަރުކާރަށް ވަރަށް ބޮޑަށް ފާޑުކިޔުންތައް އަމާޒުވި އެވެ. މިއަންމާ ސިފައިންގެ އަމަލުތައް އދ. އިން ސިފަކޮށްފައި ވަނީ ނަސްލެއް ނައްތާލުމުގެ ދަރަޖައިގަ އެވެ. ސަލާމަތީ މަޖިލީހުން ވަނީ ރެފިއުޖީން އަނބުރާ މިއަންމާ އަށް ދެވޭނެ އިންތިޒާމް ހަމަޖައްސައިދިނުމަށް ގޮވާލައިފަ އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
އަބްދުއްލާ
29 April 2018
އިންޑޮނީސިޔާ އިން ވަކިކުރުވާ ގައުމެއް އދ އިންވަނީ ހަދާދީފަ އެއީ ކްރިސްޓިއަން ދަވްލަތަކަށް ވީމަ. ސޫދާނުން ދާފޫރް ވަކިކޮށް ކްރިސްޓިއަން ދަވްލަތެއް ވަނީ ހަދާދީފަ. ނަސްލު ނައްތާލުމުގެ ފެންވަރުގާ މިޔަންމާ އިން އަނިޔާވެރިވަމުންދާއިރު ރޮހިންޖާ މުސްލިމުންނަށް ވަކި ދަވްލަތެއް ހަދާ ނުދޭންވީ ކީއްވެ.