ޖޭޕީގެ ލީޑަރުގެ މަސްއޫލިއްޔަތުތައް ޑރ. ހުސެއިން އާ ހަވާލުކޮށްފި

ޖުމްހޫރީ ޕާޓީ (ޖޭޕީ) ގެ ލީޑަރުގެ މަސްއޫލިއްޔަތުތައް، އެ ޕާޓީގެ ހަތަރު ޑެޕިއުޓީ ލީޑަރުންގެ ތެރޭގައި ހިމެނިވަޑައިގަންނަވާ ޑރ. ހުސެއިން ރަޝީދު ހަސަނާ ހަވާލުކުރަން ޖޭޕީގެ ކައުންސިލުން މިރޭ ފާސްކޮށްފި އެވެ.

މިދިޔަ ހަފުތާ ބަންދުގައި ބޭއްވި ޖޭޕީގެ ތިންވަނަ ކޮންގްރެސްގައި އަސާސީ ގަވާއިދަށް ގެނައި އިސްލާހުގައިވާ ގޮތުން، އެއްވެސް ސަބަބަކާ ހުރެ ޕާޓީގެ ލީޑަރުގެ މަގާމު ހުސްވެއްޖެ ނަމަ ނުވަތަ އެ މަގާމު ފުރުއްވުމަށް އުޒުރުވެރިވެއްޖެ ނަމަ އެ މަގާމުގެ މަސްއޫލިއްޔަތު އަދާކުރައްވާނީ ޕާޓީގެ ކައުންސިލުން ކަނޑައަޅާ ނައިބު ލީޑަރެކެވެ.

މިދިޔަ ކޮންގްރެސްއާ ހަމައަށް ޖޭޕީގެ ލީޑަރަކީ ގާސިމް އިބްރާހީމް ކަމަށް ވީ ނަމަވެސް، އެ މަގާމަށް ބޭފުޅަކު ކަނޑައެޅުން އެ ކޮންގްރެސްގައި ވަނީ ފަސްކޮށްފަ އެވެ. ގާސިމަށް އެ މަގާމަށް ކުރިމަތި ނުލެއްވުނީ އޭނާ އަށް އިއްވާފައިވާ ތިން އަހަރުގެ ޖަލު ހުކުމާ ހެދި އެވެ.

JP ge leaderu ge baaruthah Raees ah nudhee Naibu leader ah dheyn nimmaifi

The most trusted news source in the Maldives

Mihaaru

ޖަލު ހުކުމަށް ފަހު، ސިންގަޕޫރަށް ބޭސްފަރުވާ އަށް ވަޑައިގެންނެވި ގޮތަށް ފަހުން ޖަރުމަނަށް ވަޑައިގެން ގާސިމް ދިރިއުޅުއްވަނީ ޖަރުމަނުގަ އެވެ. އޭނާ ޖަރުމަނުގައި އުޅުއްވަނީ އެ ގައުމުގެ ސަރުކާރުގެ ހިމާޔަތް ވެސް ހޯއްދަވައިގެންނެވެ.

މިރޭ ބޭއްވި ޖޭޕީގެ ކައުންސިލް ބައްދަލުވުމުގައި، ވަގުތީ ގޮތުން އެ ޕާޓީގެ އެންމެ އިސް ބޭފުޅަކީ ޑރ. ހުސެއިން ކަމަށް ހަމަޖެއްސުމަށް ހުށަހެޅުއްވީ އަހުމަދު ރަމީޒެވެ. އެކަމަށް ތާއީދު ކުރެއްވީ ގާސިމްގެ ހަގު އަނބިކަނބަލުން އާއިޝަތު ނަހުލާ (އާއިޝާ) އެވެ.

ޖޭޕީގެ ލީޑަރުގެ މަސްއޫލިއްޔަތުތައް ޑރ. ހުސެއިންއާ ހަވާލުކުރަން ފާސްވީ، ކައުންސިލްގެ މިރޭގެ ބައްދަލުވުމަށް ވަޑައިގެންނެވި 37 މެމްބަރުން [ރިޔާސަތު ހިމެނޭ ގޮތުން] ގެ ތެރެއިން 36 މެމްބަރުންގެ އަޣުލަބިއްޔަތުންނެވެ.

ގާސިމްއާ ވަރަށް ކުރިއްސުރެ ގާތްގުޅުމެއް އޮންނަ އަދި މިހާރު އަމަލުކުރާ ގާނޫނުއަސާސީ އިސްލާހުކުރި ރައްޔިތުންގެ ޚާއްސަ މަޖިލީހުގައި ތ. އަތޮޅުގެ ގޮނޑި ހަތަރު އަހަރެއްހާ ދުވަސް ވަންދެން ފުރުއްވި ޑރ. ހުސެއިން، ޖޭޕީގެ ތިންވަނަ ކޮންގްރެސްގައި އެ ޕާޓީގެ ޑެޕިއުޓީ ލީޑަރު ކަމަށް ދެވަނަ ފަހަރަށް އިންތިޚާބުވީ 224 ވޯޓުންނެވެ.

ޖޭޕީގެ ޑެޕިއުޓީ ލީޑަރުންގެ މަގާމަށް މި ފަހަރު އިންތިޚާބު ކޮށްފައި ވަނީ ޑރ. ހުސެއިންގެ އިތުރުން ރައީސް އަބްދުﷲ ޔާމީންގެ ސަރުކާރުގައި ރައީސް އޮފީހުގެ މިނިސްޓަރުކަން ކުރެއްވި އަބްދުﷲ އަމީނާއި ރައީސް ޔާމީންގެ ސަރުކާރުގައި ޓްރާންސްޕޯޓް މިނިސްޓަރުކަން ކުރެއްވި އަމީން އިބްރާހީމް އަދި ކުރީގެ ޑެޕިއުޓީ ޕޮލިސް ކޮމިޝަނަރު، ހޯމް މިނިސްޓްރީގެ ކުރީގެ ސްޓޭޓް މިނިސްޓަރު މުހައްމަދު ފަޔާޒް (އެފްއޭ) އެވެ.

ޖޭޕީގެ އެންމެ އިސް ބޭފުޅަކީ ލީޑަރު ކަމަށް ވާއިރު، އިދާރީ ގޮތުން އެންމެ އިސްކޮށް ހަރަކާތްތެރިވާނީ ރައީސް އަލީ ވަހީދެވެ. ނައިބު ރައީސަކަށް އިންތިޚާބު ކޮށްފައި ވަނީ ޑރ. އަބްދުﷲ މައުސޫމެވެ.