ރައީސް ޔާމީން ޕާކިސްތާނުގެ ޗީފް އޮފް ދަ ނޭވަލް ސްޓާފް އެޑްމިރަލް ޒަފަރު މަހްމޫދު އައްބާސީ އާ ބައްދަލު ކުރައްވަނީ. ފޮޓޯ: ރައީސް އޮފީސް
24 ޖުލައި 2018 - 15:11
6 comments
އިންޑިއާ ކަނޑުގެ ސަލާމަތީ ކަންތައް އިތުރަށް ފުޅާކޮށް، ވަރުގަދަ ކުރުމުގެ ގޮތުން ޕާކިސްތާނުން ރާއްޖެ އަށް ލޭންޑިންގް ކްރާފްޓް މެކަނައިޒްޑް (އެލްސީއެމް) އެއް ހަދިޔާ ކުރަން ނިންމާފައިވާ ކަމަށް ޕާކިސްތާނުގެ ޗީފް އޮފް ދަ ނޭވަލް ސްޓާފް އެޑްމިރަލް ޒަފަރު މަހްމޫދު އައްބާސީ ވިދާޅުވެއްޖެ އެވެ.
ރަސްމީ ދަތުރެއްގައި މިހާރު ރާއްޖެ ވަޑައިގެން އުޅުއްވާ އެޑްމިރަލް ޒަފަރު މިހެން ވިދާޅުވީ ރައީސް އަބްދުﷲ ޔާމީންގެ އަރިހަށް އިއްޔެ ކުރެއްވި އިހްތިރާމުގެ ޒިޔާރަތުގައި ވާހަކަ ދައްކަވަމުންނެވެ. ރައީސް އޮފީހުގައި އޮތް އެ ބައްދަލުވުމުގައި އެޑްމިރަލް ޒަފަރު ވަނީ ޕާކިސްތާނުން ޓެރެރިޒަމާ ދެކޮޅަށް އަޅާ ފިޔަވަޅުތައް އިތުރަށް ހަރުދަނާ ކުރާނެ ކަމުގެ ޔަގީންކަން ދެއްވާފައި އެވެ. އެގޮތުން މި ސަރަހައްދުގެ މެރިޓައިމް ސެކިއުރިޓީ ބެލެހެއްޓުމަށް ޕާކިސްތާނުގެ ކަނޑުގެ ސިފައިން އެހީތެރިވާނެ ކަމަށް ވެސް އޭނާ ވަނީ ވިދާޅުވެފައި އެވެ.
އެ ބައްދަލުވުމުގައި ރައީސް ޔާމީން ވިދާޅުވީ ރާއްޖެ އާއި ޕާކިސްތާނާ ދެމެދު އޮތް ސިޔާސީ ގުޅުން އިތުރަށް ބަދަހިކޮށް، ބައިނަލްއަގުވާމީ މަސްރަހުގައި ދެ ގައުމަށް ދިމާވާ އެއްގޮތް މައްސަލަތައް ހައްލު ކުރުމަށް ގުޅިގެން މަސައްކަތް ކުރެވޭނެ ކަމަށް އުންމީދު ކުރައްވައި ކަމަށެވެ.
އަދި ރާއްޖޭގެ ތަރައްގީ އަށް ޕާކިސްތާނުން ވެދޭ އެހީތެރިކަމާއި އެއްބާރުލުން ފާހަގަ ކުރައްވައި ކުރިމަގުގައި ވެސް ދެ ގައުމުގެ ސިޔާސީ ގުޅުން އިތުރަށް ބަދަހިވާނެ ކަމަށް އުންމީދު ކުރައްވާ ކަމަށް ވެސް ވިދާޅުވެފަ އެވެ.
މީގެ އިތުރުން އެމަނިކުފާނު ވަނީ ރާއްޖެ އާއި ޕާކިސްތާނާ ދެމެދު އޮތް ރަހުމަތްތެރިކަން އިތުރަށް ވަރުގަދަ ކުރުމަށް މަސައްކަތް ކުރައްވާނެ ކަމުގެ ޔަގީންކަން ދެއްވައިފަ އެވެ.
އެޑްމިރަލް ޒަފަރު ވިދާޅުވެފައި ވަނީ ކުރިމަގުގައި އަސްކަރީ ޓްރެއިނިންގް ޕްރޮގްރާމްތައް ރާވައި ރާއްޖޭގެ ސިފައިންނަށް ޓެކްނިކަލް ސަޕޯޓު އެކި ގޮތްގޮތުން ދޭނެ ކަމަށް ވެސް ވިދާޅުވެފައި އެވެ.
އެޑްމިރަލް ޒަފަރްގެ މި ދަތުރުފުޅާ ބެހޭ ގޮތުން ރައީސް ވިދާޅުވީ މިއީ ފައިދާ ހުރި ކާމިޔާބު ދަތުރުފުޅަކަށް ވުމަށް އުންމީދު ކުރައްވާ ކަމަށެވެ. އަދި އެޑްމިރަލް ޒަފަރް ވަނީ ރާއްޖެ އިން ދެންނެވި ހޫނު މަރުޙަބާ އަށް ޝުކުރު އަދާކުރައްވައި ދިވެހި ސަރުކާރަށާއި ރައްޔިތުންނަށް ހެޔޮ އެދުންތައް އަރިސް ކުރައްވައިފަ އެވެ.
މި ބައްދަލުކުރެއްވުމުގައި ރާއްޖޭގެ ޗީފް އޮފް ޑިފެންސް މޭޖަ ޖެނެރަލް އަހުމަދު ޝިޔާމްގެ އިތުރުން ރައީސް އޮފީހުގެ މިނިސްޓަ އޮފް ސްޓޭޓް ފޮ ފޮރިން ރިލޭޝަންސް މުހައްމަދު ނަސީރު ބައިވެރިވެވަޑައިގެންނެވި އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
އުމަރުބެ
24 July 2018
މިއީ އިންޑިއާއަށް ހިތުން ޖެއްސުންކުރުމަށް ކުރާކަމެއް
ޝޮކްތެރަޕީ
24 July 2018
އިންޑިޔާ ހެލިކަޕްޓަރަކީ އިންޑިޔާއަ ޖާސޫސުކުރަން ދިންހެލިކަޕްޓަރެ އެމީހުން ދިންއެއްޗެއްނުން އެމީހުން އެ ހެލިކަޕްޓަރުދުއްވަނީވެސް. ޕާކިސްތާނުން ދޭއެޗަކީ ތަޅުދަޑިޔާއެކީ ދިވެހި ސަރުކާރަދޭ އެއްޗެ.
އއއ
24 July 2018
ކުރިންވެސް ތިހެން ހަދިޔާކުރި އެއްޗެހިއެހެރީ އެހެލާފައި. އަހަރުމެންނަށް އޮތީ ތީގެއިން ކޮންއުފަލެއް...
ރާއްޖެ
24 July 2018
އިންޑިޔާ ހެލިކޮޕްޓަރާއި ސިފައިން ރާއްޖެއިން ބޭރު ކުރާ ކެންޑިޑޭޓަކަށް ވޯޓް ދޭނަން.
ހގގތ
24 July 2018
އަހަރަމެން އިންޑިއާ ދަށެއް ނުވާނަމޯ ގޮވާފަ ހެލިކޮޕްޓަރު ފޮނުވާލާފަ އަނެއް އަތުން މިހިފަނީ ޕާކިސްތާނު އޮފާރގަ... ޕާކިސްތާނާއި އިންޑިއާ ކޯޅުމުގެ ތެރެއައް ރާއްޖެ ވަދެގެން ރައްޔިތުންނައްވާނީ ގެއްލުން..
ޤާދިރު
24 July 2018
ޕާކިސްތާނަކުން އެ ދުއްވާބަލަހައްޓާކަށް އިންޑިޔާހެން 100 ސިފައިން ރާއްޖޭގައި ތިބެ ޖާސޫސުކޮށް ޤައުމު ބައިބައިކުރަން މަސައްކަތް ކުރަން ޕާކިސްތާތު ސިފައިންނެއް ނާއްނާނެ. އިންޑިޔާއިން ނަމުގައި ހަދިޔާކޮށްފައި ރާއްޖޭގެ ސިފައިންގެ މީހަކަށް އެންމެ ކުޑަމިނުން އެ ހެލްކޮޕިޓަރަށް އަރަން ވެސް ހުއްދަ ނޯވޭ.