ޚަބަރު / ރިޔާސީ އިންތިޚާބު 2018

ރީ-ރަޖިސްޓްރީއަށް އިދިކޮޅުން 32،000 އަށްވުރެ ގިނަ ފޯމް ހުށަހަޅައިފި

މާރިޔާ މިއަދު ނޫސްވެރިންނާ ބައްދަލު ކުރައްވަނީ: ރިސޯޓުތަކުގައި ވޯޓު ފޮށި ބަހައްޓާ އަދަދު އިތުރު ކުރުމަށް އިލެކްޝަންސް ކޮމިޝަނުން ވަނީ ނިންމައިފަ -- މިހާރު ފޮޓޯ / އަހުމަދު ނިޝާތު

އާސިމާ ނިޒާރު، މިހާރު

08 އޯގަސްޓް 2018 - 17:37

4 comments

ރަށްވެހިވެފައިވާ ރަށް ނޫން އެހެން ރަށެއްގައި ވޯޓު ލާން ރަޖިސްޓްރީކުރަން 32،000 އަށްވުރެ ގިނަ ފޯމް ހުށަހަޅާފައިވާ ކަމަށް އިދިކޮޅު ކޯލިޝަނުން މިއަދު ބުނެފި އެވެ.

އަންނަ މަހު ބާއްވާ ރިޔާސީ އިންތިޚާބަށް ކޯލިޝަނުން ވާދަކުރައްވާ ކެންޑިޑޭޓް އިބްރާހިމް މުހައްމަދު ސޯލިހު (އިބޫ)ގެ ތަރުޖަމާން މާރިޔާ އަހުމަދު ދީދީ ބޭއްވި ނޫސްވެރިންގެ ބައްދަލުވުމުގައި ވިދާޅުވީ، ރީ-ރަޖިސްޓްރީކުރަން މިހާތަނަށް އިދިކޮޅު ޕާޓީތަކުން 32،062 ފޯމް ހުށަހަޅާފައިވާ ކަމަށެވެ.

"އެކަމާ އަޅުގަނޑުމެން ވަރަށް ހިތްހަމަޖެހޭ. އަދި އާއްމުން އެކަމުގައި ދެއްވި ތަރުހީބާއި އެއްބާރުލުމަށް ވަރަށް ބޮޑަށް ޝުކުރު ދަންނަވަން،" މާރިޔާ ވިދާޅުވި އެވެ.

އޭނާ ވިދާޅުވީ އަންނަ ހޮނިހިރު ދުވަހު ރީ-ރަޖިސްޓްރީވުމުގެ ފުރުސަތު ހަމަވާއިރު، ކަންބޮޑުވާ ކަމެއް ފާހަގަކުރެވިއްޖެ ނަމަ އެކަން ހުށަހަޅަން ޖެހޭނެ ކަމަށެވެ. އަދި ވޯޓުލާން ރަޖިސްޓްރީވެފައިވާ ތަން ކަށަވަރު ކުރުމަށް އިލެކްޝަންސް ކޮމިޝަން (އީސީ) އަށް ކޮންމެ ދުވަހަކު މެސެޖުކުރަން އިދިކޮޅު ކޯލިޝަނުން ވަނީ އެދިފަ އެވެ.

މާރިޔާ ވިދާޅުވި ގޮތުގައި ރަޖިސްޓްރީކުރަން ހުށަހަޅާ ފޯމުތަކުގެ ސައްހަކަން ބަލަން ފުލުހުންނަށް ހުށަހަޅަމުން އަންނައިރު، އެއީ އެމީހާގެ ފިންގަޕްރިންޓްތޯ އަހާނުލައި ފޯމް ފޮނުވުމަކީ ފުލުހުންގެ މަސައްކަތަށް ހުރަސްއެޅޭނެ ކަމެއް ކަމަށެވެ.

"އެންމެންނަށް ވެސް އެނގޭ ފުލުހުންނަކީ ޖިނާއީ ތަހުގީގުތައް ކުރަން ހުންނަ ތަނެއް. މިއީ އެމީހާގެ ފިންގަޕްރިންޓްތޯ އަހާނުލައި ފުލުހުންނަށް 2000 ފޯމް ހަވާލުކުރުމަކީ ފުލުހުންގެ މަސައްކަތަށް ހުރަސްއެޅޭ ނުވަތަ އެމީހުންގެ ރިސޯސަސްތައް އަސްލު ކުރަން ޖެހޭ ކަންކަމަށް ބޭނުންނުކޮށް އެހެންކަން ކަމަށް ބޭނުން ކުރާތަން ފެނިގެންދާނެ ތަނެއް،" މާރިޔާ ވިދާޅުވި އެވެ.

ރީ-ރަޖިސްޓްރީކުރަން ހުށަހަޅާފައިވާ ފޯމުތަކުގެ ފިންގަޕްރިންޓުގެ ސައްހަކަން ބަލަން އީސީން އަންނަނީ ފުލުހަށް ފޮނުވަމުންނެވެ. އެގޮތުން ސައްހަކަން ކަށަވަރު ނުވާ ފޯމުތައް ބާތިލްކޮށް ރަޖިސްޓްރީވާން ތިން ދުވަސް ލިބޭނެ ކަމަށް އެ ކޮމިޝަނުން ބުނެފައި ވެ އެވެ.

އިއްޔެގެ ނިޔަލަށް 45،000 މީހުން ރީ-ރަޖިސްޓްރީކޮށްފައިވާ ކަމަށް އީސީން ބުނެފައި ވެ އެވެ.