ރައީސް ޔާމީނަށް ސިޔާމްގެ ތާއީދެއް ނެތް، އަވަހަށް ގުޅިވަޑައިގަންނަވާ: އިބޫ

މި މަހު 23 ގައި އޮންނަ ރިޔާސީ އިންތިޚާބުގައި ރައީސް އަބްދުﷲ ޔާމީނަށް ތާއީދު ނުކުރައްވަން އެމްޑީއޭގެ ލީޑަރު އަހްމަދު ސިޔާމް ނިންމަވައިފި ކަމަށާއި އެހެންކަމުން ވީހާ ވެސް އަވަހަކަށް އޭނާ އިއްތިހާދާ ގުޅިވަޑައިގަތުމަށް އިދިކޮޅު ޕާޓީތަކުގެ ރިޔާސީ ކެންޑިޑޭޓު އިބްރާހިމް މުހައްމަދު ސޯލިހް (އިބޫ) މިއަދު ގޮވާލައްވައިފި އެވެ.

އިބޫ، އެ ދައުވަތު ދެއްވީ ސިޔާމްގެ އުފަން ރަށް، ނ. ކުޑަފަރީ އަށް ވަޑައިގެން އިދިކޮޅު ސަޕޯޓަރުންނާ ވާހަކަ ދައްކަވަމުންނެވެ.

ރައީސް އަބްދުﷲ ޔާމީނާ ގާތް ގުޅުމެއް އޮންނަ ސިޔާމް މި އިންތިޚާބުގެ ކެމްޕޭން އެއްވެސް ހަރަކާތެއްގައި ބައިވެރިވެވަޑައެއް ނުގަންނަވަ އެވެ. އެމްޑީއޭ އަދިވެސް ދެމިއޮތީ ޕީޕީއެމާ އެކު ކޯލިޝަންގައި ކަމަށް ރައީސް ޔާމީން ވިދާޅުވި ނަމަވެސް އެ ގުޅުމާ މެދު ސުވާލު އުފެދޭ ކަންތައްތަކެއް ދަނީ ހިނގަމުންނެވެ. އެއް ކަމަކަށް، އިންތިޚާބަށް ކުޑަތަންވެފައި އޮއްވައި އެމްޑީއޭގެ ހިންގެވުމުން ސިޔާމް ދުރަށް ވަޑައިގެން، ނައިބު ލީޑަރު އަލީ މައުރޫފްއާ ޕާޓީ ހަވާލުކުރުން ވެސް ހިމެނެ އެވެ.

އިބޫ ނ. ވެލިދޫގައި: އެމްޑީއޭގެ ހުރިހާ މެމްބަރުން އިދިކޮޅު ޕާޓީތަކާ އެކު ތިބުމަށް އިބޫ އެދިވަޑައިގަތް.--.ފޮޓޯ: އެމްޑީޕީ

އެ ކަންކަމަށް އިޝާރާތް ކުރައްވަމުން އިބޫ ވިދާޅުވީ އިންތިޚާބާ ގުޅޭ ގޮތުން ސިޔާމްގެ ނިންމެވުމަކީ ރައީސް ޔާމީނަށް އިތުރަށް ތާއީދު ނުކުރެއްވުން ކަމަށެވެ. އެހެންކަމުން ސިޔާމާއި އެމްޑީއޭގެ މެމްބަރުން ވެސް ދެން ކުރަން ޖެހޭ ކަމަކީ މި އިންތިޚާބުގައި އިދިކޮޅު ޕާޓީތަކާ އެކު ކުރިއަށް ދިއުން ކަމަށް ވިދާޅުވި އެވެ.

"އަޅުގަނޑު ސިޔާމަށް ދަންނަވާލާނީ، ބާކީވެވަޑައިނުގެން އަޅުގަނޑުމެންނާ ގުޅިވަޑައިގަންނަވާށޭ. މި ކާމިޔާބީގައި ހިއްސާވެވަޑައިގަންނަވާށޭ،" އިބޫ ވިދާޅުވި އެވެ.

ގައުމާއި ރައްޔިތުންނަށް އެންމެ ފައިދާ ހުރި ގޮތަކީ، އިބޫ ވިދާޅުވި ގޮތުގައި، އިދިކޮޅު ޕާޓީތަކާ އެކު ސިޔާމް މަސައްކަތް ކުރެއްވުމެވެ.

އިބޫ، ކުޑަފަރީ އަށް ވަޑައިގަތުމުން މަރުހަބާ ދަންނަވަން ގިނަ އަދަދެއްގެ ސިވިލް ސާވަންޓުން ނުކުތް ކަން ފާހަގަކުރައްވައި ވިދާޅުވީ ވަޒީފާގެ ބިރަށް ޖެހިލުންވެ ތިބުން ނިމުމަކަށް ގެންނަން ޖެހޭ ވަގުތު ޖެހިއްޖެ ކަމަށެވެ. ސިވިލް ސާވިސްގެ މުވައްޒަފުން ބިރުފަހަނާޅައި ނުކުންނަން ގޮވާލައްވައި، އިބޫ ވިދާޅުވީ ބޭއިންސާފުން ވަޒީފާ ގެއްލުވާލައިފި ނަމަ އަލުން އެ ވަޒީފާ އިޔާދަކޮށްދެއްވާނެ ކަމަށެވެ.

ސިޔާސީ ގޮތުން ބިރުދައްކައި މިހާތަނަށް ވަޒީފާ ގެއްލުވާލި މުވައްޒަފުންނަށް ބަދަލުދީ، އެ މީހުންނާ ދޭތެރޭ ބޭއިންސާފުން ކަންކަން ކުރި މީހުން އިންސާފުގެ ކުރިމައްޗަށް ގެންނަވާނެ ކަމަށް ވެސް ވިދާޅުވި އެވެ.