އިސްތަންބޫލް (އޮގަސްޓް 8) - ޕާލަމެންޓާއި ރައްޔިތުންގެ ރުހުން ދީފި ނަމަ ތުރުކީގައި އަލުން މަރުގެ އަދަބު ދޭން ފަށާނެ ކަމުގެ ޔަގީންކަން އެތައް ލައްކަ ބައެއްގެ ކުރިމަތީގައި ރައީސް ރަޖަބު ތައްޔިބު އުރުދުޣާން ވިދާޅުވެއްޖެ އެވެ.
އެ މީހުން އެ ބުނަނީ އީޔޫގައި މަރުގެ އަދަބެއް ނުދެއޭ. އެކަމަކު އެމެރިކާގައި މަރުގެ އަދަބު ދޭ. ޖަޕާނުގައި ދޭ. ޗައިނާގައި ދޭ. ދުނިޔޭގެ ގިނަ ގައުމުތަކުގައި މަރުގެ އަދަބު ދޭ. އެ ގައުމުތަކަށް މަރުގެ އަދަބު ދެވޭ. ތުރުކީގައި ވެސް 1984 ވަނަ އަހަރާ ހަމައަށް މަރުގެ އަދަބު ދިން،" އުރުދުޣާން
ތުރުކީގެ އެންމެ ބޮޑު ސިޓީގައި މިލިއަނަކަށް ވުރެ ގިނަ މީހުންނާ މުޚާތަބު ކުރައްވާ އުރުދުޣާން ވިދާޅުވީ އެމެރިކާގައި ދިރިއުޅޭ ފަތުހުﷲ ގުލަންގެ ކިބައިން މުޅި ގައުމު މި ފަހަރު ސާފުކޮށްލާނެ ކަމަށެވެ. ބަޣާވާތުގެ ފަހަތުގައި ވަނީ ގުލަން ކަމަށް ތުރުކީ ސަރުކާރުން ތަކުރާރުކޮށް ވަނީ ބުނެފަ އެވެ. ނަމަވެސް ގުލަން ވަނީ އެކަން ދޮގުކޮށްފަ އެވެ. ތުރުކީ ސަރުކާރުން ބުނެފައި ވަނީ އެއްވުމުގައި ފަސް މިލިއަން މީހުން ބައިވެރިވި ކަމަށެވެ.
މި ބޮޑު އެއްވުމަކީ މިދިޔަ މަހު ތުރުކީ އަށް ގެންނަން އުޅުނު ބަޣާވާތާ ދެކޮޅަށް ބޭއްވި އެންމެ ބޮޑު އެއްވުމެވެ. މި އެއްވުމުގައި ވަނީ އިދިކޮޅު ތިން ޕާޓީއެއްގެ ލީޑަރުންނާއި ދީނީ ބައެއް މީހުން ވެސް ބައިވެރިވެފަ އެވެ. ނަމަވެސް ކުރުދީ ޕާޓީ އަށް ދައުވަތު ދީފައެއް ނުވެ އެވެ.
ބަޣާވާތަށް ފަހު ތުރުކީގައި އަޅަމުންދާ ފިޔަވަޅުތަކުގެ ދަށުން އެ ގައުމުގައި އަލުން މަރުގެ އަދަބު ތަންފީޒު ކުރަން އުޅޭތީ ހުޅަނގުގެ ގައުމުތަކުން ވަނީ ވަރަށް ބޮޑަށް ފާޑު ކިޔަން ފަށައިފަ އެވެ.
"މަރުގެ އަދަބު ދިނުމާއި ނުދިނުން އޮތީ ތުރުކީ ޕާލަމެންޓުގެ އަތް މަތީގައި. މަރުގެ އަދަބު ދޭން ޕާލަމެންޓުން ނިންމައިފި ނަމަ އެކަމަށް އަޅުގަނޑު ހުއްދަ ދޭނަން،" އުރުދުޣާން ވިދާޅުވި އެވެ. "އެ މީހުން އެ ބުނަނީ އީޔޫގައި މަރުގެ އަދަބެއް ނުދެއޭ. އެކަމަކު އެމެރިކާގައި މަރުގެ އަދަބު ދޭ. ޖަޕާނުގައި ދޭ. ޗައިނާގައި ދޭ. ދުނިޔޭގެ ގިނަ ގައުމުތަކުގައި މަރުގެ އަދަބު ދޭ. އެ ގައުމުތަކަށް މަރުގެ އަދަބު ދެވޭ. ތުރުކީގައި ވެސް 1984 ވަނަ އަހަރާ ހަމައަށް މަރުގެ އަދަބު ދިން."
އުރުދުޣާން ވަނީ ގުލަންގެ ޖަމާއަތާ ގުޅިފައިވާ އެންމެން ހާމަކޮށް އެ އެންމެން ގާނޫނުގެ ކުރިމައްޗަށް ގެންނަވާނެ ކަމަށް ވިދާޅުވެފަ އެވެ.
އުރުދުޣާންގެ ކުރިން އެއްވުމުގައި ވާހަކަ ދައްކަވަމުން ބޮޑު ވަޒީރު ބިނާލީ ޔިލްދިރިމް ވިދާޅުވީ ގުލަން ތުރުކީ އަށް ގެންނާނެ ކަމަށާއި ބަޣާވާތުގެ އަގު އޭނާ އަދާކުރަން ޖެހޭނެ ކަމަށެވެ.
އާއްމުންނަށް ވަރަށް މަދުން މުޚާތަބު ކުރައްވާ ސިފައިންގެ ވެރިޔާ ހުލުސީ އަޚާރު ވިދާޅުވީ ޣައްދާރުންނަށް ވަރަށް ހަރުކަށި އަދަބު ދޭނެ ކަމަށެވެ. އަދި ބަޣާވާތް ނާކާމިޔާބުކޮށްލުމުގައި އާއްމުން އަދާކުރި ދައުރަށް ވަނީ ޝުކުރު އަދާކުރައްވައިފަ އެވެ.
ބަޣާވާތަށް ފަހު ތުރުކީގައި ވަނީ އެތައް ހާސް ބަޔަކު ވަޒީފާ އިން ވަކިކޮށް އެތައް ހާސް ބައެއްގެ ޕާސްޕޯޓް ކެންސަލްކޮށްފަ އެވެ. އަދި 18،000 މީހުން ވަނީ ބަންދުކޮށްފަ އެވެ.
