"ސުއީ ދާގާ" ގެ ޖާދޫގައި އެތައް ބަޔަކު ޖެހިއްޖެ

"ސުއީ ދާގާ: މޭޑް އިން އިންޑިއާ" ގެ ޕޯސްޓަރެއްގައި ވަރުން އާއި އަނުޝްކާ.

އަހުމަދު އަދްޝަން، މިހާރު

06 އޮކްޓޯބަރ 2018 - 08:58

މިދިޔަ ހަފުތާގެ ހުކުރު ދުވަހު ރިލީޒް ކުރި ފިލްމު "ސުއީ ދާގާ: މޭޑް އިން އިންޑިއާ" އިން، ވަރުން ދަވަންއަކީ ބޮކްސް އޮފީހުގައި ރަސްކަން ކުރެވޭނެ އެކްޓަރެއްކަން އަނެއްކާ ވެސް ސާބިތުކޮށްދީ، ބެލުންތެރިންގެ ހިތްތަކުން ޖާގަ ހޯދައިފި އެވެ.

މިދިޔަ މަހުގެ 28 ވަނަ ދުވަހު ރިލީޒްކުރި މި ފިލްމަށް ކްރިޓިކުން ވެސް ވަރަށް ބޮޑަށް ތައުރީފުކޮށްފައިވާ އިރު، "ސުއީ ދާގާ" އަށް އިންޑިއާ އާއި އިންޑިއާ އިން ބޭރުގެ މާކެޓްތަކުން ހުކުރު ދުވަހާ ހަމައަށް ލިބުނު އާމްދަނީ މިހާރު ވަނީ 90.36 ކްރޯޑް ރުޕީސް އަށް އަރައިފަ އެވެ.

އިންޑިއާ އިން އެކަނި ފިލްމަށް ލިބުނު އާމްދަނީ ހަފުތާއެއްގެ ތެރޭގައި 62.50 ކްރޯޑް ރުޕީސް އަށް އަރާފައިވާ އިރު، ބެލެވޭ ގޮތުން މިއީ އަނެއްކާ ވެސް 100 ކްރޯޑްގެ އާމްދަނީއެއް ކަޑައްތުކުރާނެ ފިލްމެކެވެ.

#SuiDhaaga has a SOLID Week 1... Witnessed strong trending from Day 1 to Day 5 [national holiday], but slipped on Day 6 and Day 7... Weekend 2 is crucial... Fri 8.30 cr, Sat 12.25 cr, Sun 16.05 cr, Mon 7 cr, Tue 11.75 cr, Wed 3.80 cr, Thu 3.35 cr. Total: ₹ 62.50 cr. India biz.
— taran adarsh (@taran_adarsh) October 5, 2018

ތަރަންގެ ޓްވީޓެއް.

ޝަރަތު ކަތަރިއާ ޑައިރެކްޓްކޮށްފައިވާ "ސުއީ ދާގާ" ގައި ކިޔައި ދެނީ ފަހައިގެންނާއި ޖަރީގެ މަސައްކަތްކޮށްގެން އަމިއްލަ ދިރިއުޅުން ކާމިޔާބުކުރާ ރަށްފުށުގެ ޒުވާން ދެމަފިރިއެއްގެ ވާހަކަ އެވެ. ވަރުންއާ އެކު ފިލްމުގައި ބަތަލާގެ ރޯލު ކުޅެފައި ވަނީ އަނުޝްކާ ޝަރްމާ އެވެ. މިއީ މި ދެ ތަރިން އެކުގައި ކުޅުނު ފުރަތަމަ ފިލްމެވެ.

Simple is beautiful... Success of #SuiDhaaga reaffirms the fact that well-made films will always find an audience... My opinion on Bollywood Hungama: https://t.co/ZeRCdYsVyg pic.twitter.com/XA3GGLCFDL
— taran adarsh (@taran_adarsh) October 3, 2018

ތަރަންގެ ރިވިއު.

"ސުއީ ދާގާ" އާ ބެހޭ ގޮތުން ގިނަ ކްރިޓިކުން ބުނީ މިއީ ވަރަށް ސާދާ ސީދާ ވާހަކައެއް ކިޔައިދީގެން ބެލުންތެރިންގެ ހިތްތައް އަތުލި ފިލްމެއް ކަމަށާއި ޝަރަތުގެ ސްކްރީންޕްލޭ ވަރަށް ވެސް ފުރިހަމަވެފައި، އޭނާގެ ޑައިރެކްޝަން ވެސް ވަރަށް މޮޅު ކަމަށެވެ. އަދި މި ފިލްމަކީ ބެލުންތެރިން ސިނަމާ ހޯލުގެ ސީޓްގައި އިށީނީއްސުރެން ފޫހި ކުރުވާނެ ހިނދުކޮޅެއް ނުދީ، ކްލައިމެކްސްއާ ހަމައަށް ވާސިލުކޮށްދޭ ވަރަށް ވެސް އަސަރުގަދަ އެހާމެ އިބުރަތްތެރި ފިލްމެއް ކަމަށް ބުންޏެވެ.

#Pataakha is DULL in Week 1... Benefitted from holidays in its opening week, but did not maintain the momentum on working days... Fri 90 lakhs, Sat 1.40 cr, Sun 1.75 cr, Mon 94 lakhs, Tue 1.56 cr, Wed 56 lakhs, Thu 53 lakhs. Total: ₹ 7.64 cr. India biz.
— taran adarsh (@taran_adarsh) October 5, 2018

"ޕަޓާޙާ" އަކީ ފްލޮޕެއް.

އަދި ވަރުން އާއި އަނުޝްކާގެ އެކްޓިން ވަރަށް މޮޅު ކަމަށާއި ރަށްފުށުގެ ދެމަފިރިއެއްގެ ރޯލު އަސްލާ ވަރަށް އެއްގޮތަށް ދެ ތަރިން ވެސް ދައްކުވައި ދީފައިވާ ކަމަށް ކްރިޓިކުން ފާހަގަކޮށްފައިވެ އެވެ. ޔާޝްރާޖް ފިލްމްސް (ވައިއާރްއެފް) ގެ މި ފިލްމަށް ގިނަ ކްރިޓިކުން ދީފައި ވަނީ ތިނެއް ބައި ތަރީގެ ރޭޓިންއެކެވެ.

"ސުއީ ދާގާ" އާ އެކު ރިލީޒް ކުރި ވިޝާލް ބަރަދްވާޖްގެ ފިލްމު "ޕަޓާޙާ" ވެގެން ގޮސްފައި ވަނީ އޭނާގެ ލިސްޓަށް އިތުރުކޮށް ދިން އިތުރު ފްލޮޕަކަށެވެ. ރާދިކާ މަދަން އާއ ސާނިޔާ މަލްއުތުރާ ލީޑް ރޯލް ކުޅުނު މި ފިލްމަކީ ދެބޭންގެ ކޯޅުންތަކެއް ދައްކުވައިދޭ ޑާކް ކޮމެޑީއެކެވެ.

"ޕަޓާޙާ" އަށް ހުކުރު ދުވަހާ ހަމައަށް ލިބުނީ އެންމެ 7.64 ކްރޯޑް ރުޕީސް އެވެ.

އިއްޔެ ސިނަމާތަކަށް އައި ފިލްމުތަކަކީ އަޔޫޝްމަން ކުރާނާ އާއި ތައްބޫގެ "އަންދާދުން" އާއި އަލަށް ތައާރަފުވި އާޔޫޝް ޝަރްމާ އާއި ވަރީނާ ހުސައިންގެ "ލަވްޔާތުރީ" އެވެ.

މި ދެ ފިލްމުގެ ވިޔަފާރި އަށް ވެގެންދާ ގޮތެއް ކުރިއަށް މި ހަފުތާ ނިމިގެންދާ އިރު، އެނގިގެން ދާނެ އެވެ. ގިނަ ކްރިޓިކުން ބުނަނީ ސްރީރާމް ރަގްވަންގެ ސަސްޕެންސް ތުރިލާ "އަންދާދުން" އާ އަޅާކިޔާ އިރު، ސަލްމާން ހާން ޕްރޮޑިއުސް ކުރި ލޯބީގެ ފިލްމު "ލަވްޔާތުރީ" އަކީ ސުމެއްގެ ފިލްމެއް ކަމަށެވެ.