އޭޑީކޭގެ ބޭސް ފިހާރައެއް މާފަންނުގައި ހުޅުވައިފި

އޭޑީކޭއިން އަލަށް ހުޅުވި ފާމަސީ-- ފޮޓޯ: އޭޑީކޭ

އަހުމަދު ސާއިލް އަލީ، މިހާރު

23 އޮކްޓޯބަރ 2018 - 10:08

މާލޭގެ އެކި ހިސާބުތަކުން ފަސޭހަކަމާ އެކު ބޭސް ގަންނަން ލިބޭނެ އިންތިޒާމް ހަމަޖައްސަން އޭޑީކޭގެ ހަ ވަނަ ފާމަސީ މާފަންނުގައި އިއްޔެ ހުޅުވައިފި އެވެ.

އާސަންދައިގެ ހިދުމަތް ލިބޭ އެ ފާމަސީ ހުޅުވީ އީދު މިސްކިތް ހުންނަ ހަނދުވަރީ ހިނގުމުގަ އެވެ. އާ ފާމަސީ ހުޅުވީ ޖަވާހިރުމަގުގައި ކުރިން ހިންގި ފާމަސީ ބަންދު ކުރުމަށް ފަހުގަ އެވެ.

ބޭހުގެ އިތުރުން އޭޑީކޭއިން ރާއްޖެ އެތެރެކުރާ ބައެއް އެހެން ޕްރޮޑަކްސްޓްތައް އާ ފާމަސީން ލިބެން ހުރެ އެވެ. އޭގެ ތެރޭގައި ޑްރައިޕާސް ނެޕީ އާއި މިލްކީ އަދި މިލްގްރޯ ހިކިކިރު އަދި ލިބްރެސް ސެނިޓަރީ ނެޕްކިން ހިމެނެ އެވެ. ފުރޮޅުލީ ގޮނޑި އާއި ހުޅުހުޅުގައި އަޅާ ގާޑް ވެސް ލިބެން ހުންނާނެ ކަމަށް އޭޑީކޭ އިން ބުނެ އެވެ.

އޭޑީކޭއިން މާފަންނުގައި އަލަށް ހުޅުވި ފާމަސީ -- ފޮޓޯ: އޭޑީކޭ

އާ ފާމަސީ ހުޅުވުމާ ދިމާކޮށް ޕްރޮމޯޝަނެއް ވެސް ކުރިއަށް އެބަ ގެންދެ އެވެ. މި ޕްރޮމޯޝަންގައި ގަންނަ ކޮންމެ ޑްރައިޕާސް މެގާ ޕެކަކަށް ޑްރައިޕާސް ވެޓް ވައިޕްސް ޕެކެޓެއް ހިލޭ ލިބެ އެވެ.

ރާއްޖޭގައި އެންމެ ފުޅާ ދާއިރާއެއްގައި ސިއްހީ ފަރުވާދޭ އަމިއްލަ ކުންފުނި އޭޑީކޭއިން އަންނަނީ ޒަމާނީ ޓެކްނޮލޮޖީގެ އެހީގައި ސިއްހީ ފަރުވާގެ ގިނަ މަސައްކަތްތަކެއް ކުރަމުންނެވެ.