ވިޕްލައިނާ ހިލާފުވާ ޕީޕީއެމް މެމްބަރުންގެ އަދަދު އިތުރުވަނީ!

ވެރިކަން ކުރާ ޕާޓީ، ޕީޕީއެމް ޕާލަމެންޓްރީ ގްރޫޕުން ނެރޭ ތްރީ ލައިން ވިޕާ ހިލާފުވެވަޑައިގަންނަވާ މެމްބަރުންގެ އަދަދު އިތުރުވެއްޖެ އެވެ.

ސަރުކާރުން ހުށަހަޅާ ބިލްތަކަށް ހުރިހާ މެމްބަރުން ވެސް ވޯޓު ދެއްވަން ޖެހޭނެ ކަމަށް ޕީޖީ ގްރޫޕުން އުސޫލެއް ކަނޑައަޅާފައި ވަނިކޮށް، ފަހަކަށް އައިސް ނެގި ވޯޓުތަކުގައި ބައެއް މެމްބަރުން ވަނީ ތަކުރާރުކޮށް ވިޕްލައިނާ ހިލާފުވެވަޑައިގެންފަ އެވެ. އޭގެ ތެރޭގައި ޖަލްސާގައި ހާޒިރުވެވަޑައިގެން ވޯޓު ނުދެއްވާ މެމްބަރުންނާއި ވަކި ކޮޅަކަށް ވޯޓު ނުދެއްވައި ތިއްބަވާ މެމްބަރުންގެ އިތުރުން ޖަލްސާ އަށް ހާޒިރުވެވަޑައިނުގެން ވިޕްލައިނާ ހިލާފުވެވަޑައިގަންނަވާ މެމްބަރުން ވެސް ހިމެނިވަޑައިގަންނަވަ އެވެ. އަދި ވޯޓު ދޭ ގަޑިއަށް ޖަލްސާ އިން ބޭރަށް ނުކުމެވަޑައިގަންނަވާ ބޭފުޅުން ވެސް ހިމެނިވަޑައިގަންނަވަ އެވެ.

މި މެމްބަރުން ދެކޮޅު ހެއްދެވި ބިލްތަކުގެ ތެރޭގައި ހިޔާލުފާޅުކުރުން ހުއްޓުވައި މިނިވަން ނޫސްވެރިކަން ނިގުޅައިގަތުމަށް ފާސްކުރި ބިލާއި އެއްވެ އުޅުން ހަނިކުރަން ފާސްކުރި ބިލުގެ އިތުރުން ކައުންސިލްތައް ކުޑަކުރަން ފާސްކުރި ބިލް ހިމެނެ އެވެ. މިއީ ފަހަކަށް އައިސް ޕީޕީއެމްގެ ތެރޭގައި ވެސް ވަރަށް ބޮޑަށް ޚިޔާލު ތަފާތުވުން އުފެދިގެން ދިޔަ ބިލްތަކަކެވެ.

ހިޔާލުފާޅުކުރުން ހުއްޓުވާ ބިލާ ދެކޮޅަށް ވޯޓު ދެއްވި މެމްބަރުން:

ކުޅުދުއްފުށީ ދެކުނު ދާއިރާގެ މެމްބަރު މުހައްމަދު ނަޝީދު

ތިމަރަފުށީ ދާއިރާގެ މެމްބަރު މުހައްމަދު މުސްތޮފާ

ދިއްގަރު ދާއިރާގެ މެމްބަރު ފާރިސް މައުމޫން

ނޮޅިވަރަމް ދާއިރާގެ އެމްޑީއޭ މެމްބަރު ހުސެއިން އަރީފް

ހިޔާލު ފާޅުކުރުން ހުއްޓުވާ ބިލް ފާސްކުރި ދުވަހު މަޖިލިހަށް ވަޑައިނުގަންނަވާ މެމްބަރުން

އޭދަފުށީ ދާއިރާގެ މެމްބަރު އަހްމަދު ސަލީމް (ރެޑްވޭވް ސަލީމް)

މަޑުއްވަރީ ދާއިރާގެ މެމްބަރު މުހައްމަދު އަމީތު

ތުޅާދޫ ދާއިރާގެ މެމްބަރު ނާޒިމް ރަޝާދު

މީގެ ތެރެއިން ނަޝީދާއި މުސްތޮފާ އާއި ފާރިސް އަދި ހުސެއިން އަރީފް ބިލާ ދެކޮޅު ހެއްދެވީ ޖަލްސާގައި ތިއްބަވައިގެންނެވެ. ސަލީމާއި އަމީތު އަދި ނާޒިމް ރަޝާދު ވޯޓު ދެއްވަން ޖަލްސާ އަށް ހާޒިރުވެވަޑައިނުގަންނަވަ އެވެ. އެ ދުވަހުގެ ޖަލްސާއަށް ސަލީމާއި އަމީތު އެއްގޮތަކަށް ވެސް ވަޑައިނުގަންނަވަ އެވެ. އެކަމަކު ނާޒިމް ރަޝާދު ޖަލްސާ އަށް ވަޑައިގަތުމަށް ފަހު، ވޯޓު ގަޑިއަށް މަޖިލިހަށް ވަޑައިނުގަތީ އެވެ.

އެއްވެ އުޅުން ހަނިކުރުމުގެ ވިޕްލައިނާ ހިލާފުވެވަޑައިގަތީ:

ދިއްގަރު ދާއިރާގެ މެމްބަރު އަހްމަދު ފާރިސް

ތިމަރަފުށީ ދާއިރާގެ މެމްބަރު މުހައްމަދު މުސްތޮފާ

ތުލުސްދޫ ދާއިރާގެ މެމްބަރު މުހައްމަދު ވަހީދު އިބްރާހިމް (ވައްޑެ)

ތުޅާދޫ ދާއިރާގެ މެމްބަރު ނާޒިމް ރަޝާދު

ގުރައިދޫ ދާއިރާގެ ޕީޕީއެމް މެމްބަރު ހުސެއިން މަނިކު ދޮން މަނިކު

އެއްވެ އުޅުން ހަނިކުރުމާ މި މެމްބަރުން ދެކޮޅު ހެއްދެވިއިރު، ލާމަރުކަޒީ ގާނޫނަށް އިސްލާހު ގެނައުމުގެ ވިޕްލައިނާ ނިލަންދޫ ދާއިރާގެ މެމްބަރު ހަލީލް ވަނީ ހިލާފުވެވަޑައިގެންފަ އެވެ.

މީގެކުރިން ތްރީ ލައިން ވިޕް ނެރޭއިރު ކޯލިޝަންގައި ހިމެނޭ 53 މެމްބަރުން ޖަލްސާ އަށް ހާޒިރުވެވަޑައިގެން ވޯޓު ދެއްވި ނަމަވެސް ބައެއް ވޯޓުތަކުގައި ވޯޓު ދެއްވާ މެމްބަރުންގެ އަދަދު ވަނީ 31 އަށް ދަށްވެފަ އެވެ.

ޕީޕީއެމްގެ ޕީޖީ ގްރޫޕްގެ ބައެއް މެމްބަރުން ވިދާޅުވި ގޮތުގައި ގާނޫނުއަސާސީއާ ހިލާފުވާ ގޮތަށް ބިލްތައް ހަދައި ފާސްކޮށް ރައްޔިތުންގެ ހައްގުތައް ނިގުޅައިނުގަނެވޭ ކަން މެމްބަރުން ގަބޫލުކުރައްވަ އެވެ. އެކަމަކު އެ ބިލްތަކާ އެއްކޮޅަށް ވޯޓު ދެއްވަނީ "ސަރުކާރު ދެކެ ބިރުން" ކަމަށް އޭނާ ވިދާޅުވި އެވެ.

އެކަމަކު އޭގެ ތެރެއިން ބައެއް މެމްބަރުން ވިޕްލައިނާ ހިލާފުވެވަޑައިގަންނަވަނީ ދާއިރާގެ ރައްޔިތުންގެ ފަރާތުން ކުރިމަތިވަމުންދާ ޕްރެޝަރުތަކާ ހެދި ކަމަށް "މިހާރު" އާ ވާހަކަ ދެއްކެވި އެއް މެމްބަރަކު ވިދާޅުވި އެވެ.

"ހަގީގަތަކީ މެމްބަރުން ތިއްބެވީ މާޔޫސްކަމަކާއި ފޫހިކަމެއްގެ ތެރޭގައި. އޭގެ ތެރެއިން ބައެއް މެމްބަރުން ބިލްތަކާ ދެކޮޅު ހައްދަވަމުން މި ގެންދަވަނީ ރައްޔިތުންގެ ހައްގުތަކެއް ނިގުޅައިގަންނަން ބޭނުން ނުވާތީ،" މެމްބަރު ވިދާޅުވި އެވެ.

ސަރުކާރުން ހުށަހަޅާ ކޮންމެ ބިލަކާ ރުހި ގަބޫލުވާން ޖެހޭ ގޮތަށް ހަދައި، ތްރީ ލައިން ވިޕް ނެރުމަކީ ޑިމޮކްރަސީގައި ބީރައްޓެހި ސިފައެއް ކަން ފާހަގަކުރައްވައި މެމްބަރު ވިދާޅުވީ ޕީޕީއެމް ޕާލަމެންޓްރީ ގްރޫޕްގެ މެމްބަރުންނަށް "ޗޮއިސްއެއް ނެތް" ކަމަށެވެ.

"ކޮންމެ ކަމަކަށް ތްރީ ލައިން ރެޑް ނުވަތަ ގްރީން ނެރުމަކީ މިއީ މަޖުބޫރުކުރުން. ދުވަހަކު ވެސް ފްރީ ލައިން ވިޕެއް ނުނެރޭ،" އޭނާ ވިދާޅުވި އެވެ.

ޕީޖީ ގްރޫޕުން ބިލްތައް ހުށަހަޅަމުންދާ ގޮތާއި ހާއްސަކޮށް ގާނޫނުއަސާސީއާ ހިލާފަށް ބިލް ފާސްކުރާ މައްސަލާގައި މެމްބަރުންގެ ހިޔާލުތަފާތުވުން ބޮޑެވެ.

އެކަމަކު ޕާލަމެންޓްރީ ގްރޫޕްގެ ޑެޕިއުޓީ ލީޑަރު ރިޔާޒް ރަޝީދު އެކަން ދޮގު ކުރައްވަ އެވެ.

އޭނާ ވިދާޅުވީ މެމްބަރުންގެ މެދުގައި އެއްވެސް ހިޔާލުތަފާތުވުމެއް ނެތް ކަމަށެވެ. ސަރުކާރުން ފާސްކުރަން ބޭނުންވާ ބައެއް ބިލްތަކާ ބައެއް މެމްބަރުން ދެެކޮޅު ހައްދަވަނީ، އޭނާ ވިދާޅުވި ގޮތުގައި، އަމިއްލަ ކޮންމެވެސް މަސްލަހަތުތަކަކާ ގުޅިގެންނެވެ. އެއީ، ގާނޫނުއަސާސީއާ ހިލާފު ބިލްތަކަކަށް ވާތީ، ނުވަތަ ރައްޔިތުންނަށް އޭގެ އިން ގެއްލުންތަކެއް ލިބޭތީ ނޫން ކަމަށް އޭނާ ވިދާޅުވި އެވެ.

ރިޔާޒު ވިދާޅުވި ގޮތުގައި ބިލަށް ވަކި ގޮތަކަށް ވޯޓު ދެއްވަން އެއްވެސް މެމްބަރަކަށް އެއްވެސް ގޮތަކުން މަޖުބޫރުކޮށްފައެއް ނުވާނެ އެވެ.

ޕީޕީއެމް ޕާލަމެންޓްރީ ގްރޫޕުގައި މަޝްވަރާކޮށް މިހާތަނަށް މަޖިލީހުން ފާސްކޮށްފައިވާ އެއްވެސް ބިލަކީ ގާނޫނުއަސާސީއާ ފުށުއަރާގޮތަށް ނުވަތަ ރައްޔިތުންގެ ހައްގުތައް ގެއްލޭގޮތަށް ފާސްކޮށްފައިވާ ބިލެއް ނޫން ކަމަށް އޭނާ ވިދާޅުވި އެވެ. ހުރިހާ ބިލްތަކެއް ހުށަހަޅަނީ ރައްޔިތުންނާއި ގައުމުގެ ހާލަތު ރަނގަޅުކުރަން ވިސްނުންތަކެއް ވިސްނުމަށް ފަހު ރިޔާޒް ވިދާޅުވި އެވެ.

"ކޮންމެ ބިލަކީ ވެސް ކައުންސެލަ ޖެނެރަލް އަށް ހުށަހަޅައި ގާނޫނުއަސާސީއާ ނުވަތަ އެހެން ގާނޫނުތަކާ ތައާރަޒްވޭތޯ ބެލުމަށް ފަހު ފާސްކުރާ ބިލްތަކެއް،" ރިޔާޒް ވިދާޅުވި އެވެ.

ބިލްތައް ގާނޫނުއަސާސީއާ ހިލާފުނުވާކަމަށް ރިޔާޒް ވިދާޅުވިއިރު، "ކުރިން ހުއްދަ ހޯދުމަކާ ނުލައި ސުލްހަވެރިކަމާ އެކު އެއްވެ އުޅެވޭނެ ކަމަށް" ގާނޫނުއަސާސީގައި ބުނެފައިވާއިރު އެ މާއްދާއާ ތައާރަޒްވާގޮތަށް ކުރިން ހުއްދަ ހޯދަން ޖެހޭ ގޮތަށް އަދި ހޯމް މިނސްޓްރީން ކަނޑައަޅާ ތަނެއްގައި އެކަނި އެއްވެ އުޅެވޭ ގޮތަށް ގާނޫނަށް ވަނީ އިސްލާހު ގެނެސްފަ އެވެ. މިއީ، ގާނޫނުއަސާސީއާ ހިލާފުވުން ނޫންތޯ ސުވާލު ދެންނެވުމުން ވިދާޅުވީ އެއީ "ގިނަ ބައެއްގެ ހައްގު ހިމާޔަތްކުރަން" ފާސްކުރި އިސްލާހެއް ކަމަށެވެ.

ރިޔާޒްއާ ދެކޮޅަށް ވެސް ބައެއް އެހެން މެމްބަރުންގެ ޝަކުވާ ވަކި މަދެއް ނޫނެވެ. ހިޔާލު ފާޅުކުރުން ހުއްޓުމުގެ ބިލް މަޖިލިހަށް ބަލައިގަންނަން މަޖިލިހުގައި ވޯޓު ނެގި ދުވަހު ރިޔާޒް މަޖިލިހަށް އެއްގޮތަކަށް ވެސް ވަޑައިނުގަތުމަކީ ވިޕްލައިނާ ހިލާފުވުން ކަމަށް ބައެއް މެމްބަރުން ވިދާޅުވެ އެވެ.

"މިސާލަކަށް އަބުރުގެ ބިލް ފާސްކުރުމުގެ ވޯޓަށް ހުސެއިން މަނިކު [ގުރައިދޫ ދާއިރާގެ މެމްބަރު] ގެނައީ އޭނާ އުމްރާގެ އަޅުކަމަށް ވަޑައިގަތުމަށް މައްކާގައި ހުންނަވަނިކޮށް. އުމްރާ ކެންސަލް ކުރުވާފައި ހުސެއިން މަނިކު ގެނައި ގޮތަށް ރިޔާޒް ރަޝީދު ވެސް، ބިލް ބަލައިގަތުމުގެ ވޯޓަށް ގެނެވެން ޖެހޭނެ. އެހެންވީމާ ރިޔާޒް ރަޝީދު ވެސް އެހުރީ ވިޕްލައިނާ ހިލާފު ވެފައި،" އެހެން ބައެއް ބިލްތަކުގައި ވިޕްލައިނާ ހިލާފުވި މެމްބަރަކު ވިދާޅުވި އެވެ.

ރިޔާޒް ވިދާޅުވި ގޮތުގައި ވިޕް ލައިންތަކާ ހިލާފުވެވަޑައިގަންނަވާ މެމްބަރުންނާ މެދު ފިޔަވަޅު އަޅާނެ އެވެ. މިހާރު ވެސް ބައެއް މެމްބަރުންނާ މެދު އެކި ކަހަލަ ފިޔަވަޅުތައް އަޅާފައިވާ ކަމަށާއި އޭގެ ތެރޭގައި ޕީޖީގެ ވައިބަ ގްރޫޕުން ނެރުމާއި ކޮމެޓީތަކުން ވަކިކުރުން ފަދަ ކަންކަން ހިމެނޭ ކަމަށް ވިދާޅުވި އެވެ.

"ވިޕް ލައިނާ ހިލާފުވެވަޑައިގަންނަވާ މެމްބަރުންނާ މެދު ކުރިއަށް އޮތް ތަނުގައި ވެސް ފިޔަވަޅު އަޅާނެ. ހުރިހާ ފިޔަވަޅުތަކެއް ފަހަރެއްގައި މީޑިއާ އަށް ނޭނގިދާނެ،" ރިޔާޒް ވިދާޅުވި އެވެ.

އެކަމަކު ވިޕްލައިނާ ހިލާފުވި މެމްބަރުންގެ ޝަކުވާއަކީ ރިޔާޒަށް ފިޔަވަޅު ނާޅާ މައްސަލަ އެވެ.