ޓޫރިޒަމް އިންޑަސްޓްރީގެ ހާލަތު ދެނަގަތުމުގައި ބަލަންޖެހޭނީ ޒިޔާރަތްކުރާ ޓޫރިސްޓުގެ އަދަދަށް އެކަނި ނޫން ކަމަށް، އިންޑަސްޓްރީގެ މައި ޖަމިއްޔާ މޯލްޑިވްސް އެސޯސިއޭޝަން ފޯ ޓުއަރިޒަމް އިންޑަސްޓްރީ (މަޓީ) ގެ ޗެއާމަން މުހައްމަދު އުމަރު މަނިކު (އެމްޔޫ މަނިކު) މިއަދު ވިދާޅުވެއްޖެ އެވެ.
ކުރުނބާ މޯލްޑިވްސްގައި ބޭއްވި މަޓީގެ 29 ވަނަ އަހަރީ އާންމު ޖަލްސާގައި މަނިކު ވިދާޅުވީ، ދާއިރާގެ ކުރިއެރުން ވަޒަންކުރުމުގައި އޮކިއުޕެންސީ ރޭޓް ފަދަ ކަންކަމަށް މިހާރަށް ބޮޑަށް ބަލަންޖެހޭ ކަމަށެވެ.
ޓޫރިޒަމް ދާއިރާގެ ކުރިއަރުވަން، ރީސާޗާއި ޑިވެޕޮލްމެންޓަށް އިންވެސްޓްކުރާ ވަރު އިތުރުކުރަންޖެހޭ ކަމަށް އޭނާ ވިދާޅުވި އެވެ. އަދި ފުރިހަމަ ރީސާޗަކަށް ބިނާކޮށް ޓޫރިޒަމް އިންޑަސްޓްރީގެ ނިންމުންތައް ބައްޓަން ކުރަންޖެހޭ ކަމަށް އޭނާ ވިދާޅުވި އެވެ.
އޭނާ ވިދާޅުވީ، މިދިޔަ އަހަރު ވެސް ޓޫރިޒަމް ދާއިރާއަށް ކުރިއެރުންތަކެއް ލިބުނު ކަމަށެވެ. އާ ރަންވޭއާ އެކު އިންޓަނޭޝަނަލް ފްލައިޓްތައް އަންނަ އަދަދުތައް މިދިޔަ އަހަރު އިތުރުވެފައިވާ ކަމަށް އޭނާ ވިދާޅުވި އެވެ.
މަނިކު ވިދާޅުވި ގޮތުގައި ފަތުރުވެރިކަމުގެ ދާއިރާ ކުރިއެރުވުމަށްޓަަކައި ރާއްޖޭގެ ގުދުރަތީ ރީތިކަން ރައްކާތެރި ކުރުމަށް ގިނަ މަސައްކަތްތަކެއް ކުރަންޖެހެ އެވެ. ރާއްޖޭގެ ގުދުރަތީ ރީތިކަމަކީ ރާއްޖޭގެ ޓޫރިޒަމް ކުރިއަރުވަން އޮތް އެންމެ ބޮޑު އެޑްވާންޓޭޖު ކަމަށްވާ އިރު ތިމާވެށި ރައްކާތެރިކުރުމާއި ފަތުރުވެރިކަން ކުރިއަރުވަން ޖެހޭނީ އެއް ވާނެއްގައި ކަމަށް އޭނާ ވިދާޅުވި އެވެ.