އޮސްޓްރޭލިއާގައި އިމޯޖީތައް ނަމްބަރު ޕްލޭޓްތަކަށް

ކްއީންސްލޭންޑުން އަންނަ މަހު ވެހިކަލްތަކަށް އިމޯޖީ ނަމްބަރު ޕްލޭޓްގެ ހިދުމަތް ތައާރަފު ކުރާނެ.

އަހުމަދު އަދްޝަން، މިހާރު

21 ފެބުރުއަރީ 2019 - 07:37

ޓެކްނޮލޮޖީއާ އެކު ދިރިއުޅުމަށް އައިސްފައިވާ ބަދަލު ވެހިކަލްތަކުގެ ނަންބަރު ޕްލޭޓުން ފެންނަ ގޮތް ހަދަން އޮސްޓްރޭލިއާގެ ކްއީންސްލޭންޑުން ތައްޔާރުވާން ފަށައިފި އެވެ. ސްމާޓް ފޯނު ފަދަ ވަސީލަތްތަކާ އެކު މުއާމަލާތް ކުރުމުގައި ބޭނުންކުރުން އާންމުވެފައިވާ އިމޯޖީތައް ނަންބަރު ޕްލޭޓަށް ގެންނަނީ އެވެ.

އެއްގަމުގައި ދުއްވާ އުޅަނދުފަހަރުގެ ނަމްބަރު ޕްލޭޓްގައި އިމޯޖީތައް ހިމަނަން ބޭނުންވާ މީހުންނަށް އެ ފުރުސަތު އަންނަ މަހު ހުޅުވައިލަން ކްއީންސްލޭންޑްގެ ރަސްމީ އިދާރާތަކުން މިހާރު ވަނީ ނިންމައިފަ އެވެ. އެކަމަކު ބޭނުންހާ ޒާތެއްގެ އިމޯޖީއެއް ބޭނުމެއް ނުކުރެވޭނެ އެވެ.

ނަމްބަރު ޕްލޭޓްގައި ބޭނުން ކުރެވޭ އިމޯޖީތައް ލިމިޓްކޮށްފައިވާ އިރު، އޭގެ ތެރޭގައި ހިމަނަން ނިންމާފައި ވަނީ އުފާވެރިކަން އިހުސާސްކޮށްދޭ ކަހަލަ އިމޯޖީތަކެވެ. އޭގެ ތެރޭގައި ވިންކިން ފޭސް، ސްމައިލިން ފޭސް ވިތު ހާޓްސް، ލާފިން އައުޓް ލައިޓް، ސްމައިލިން ފޭސް ވިތު ސަންގްލާސް ފަދަ އިމޯޖީތައް ހިމެނެ އެވެ.

Emojis will soon be on our number plates, an idea that’s creating mixed emotions. The new design is being released next month in Queensland. @TristanVorias7 #7News pic.twitter.com/V4Tbr5UyPK
— 7 News Brisbane (@7NewsBrisbane) February 18, 2019

ރިޕޯޓްތައް ބުނާ ގޮތުން އިމޯޖީ ހިމެނޭ ނަމްބަރު ޕްލޭޓްގެ އަގުތައް ފެށޭނީ 340 ޑޮލަރުންނެވެ.

އިންޝުއަރެންސް ކުންފުންޏެއް ކަމަށްވާ ކްއީންސްލޭންޑްގެ ރޯޔަލް އޮޓޮމޮބައިލްސް ކުލަބް (އާރްއޭސީކިއު) އިން ބުނީ ނަމްބަރު ޕްލޭޓްތަކުގައި އިމޯޖީތައް ހިމެނިޔަސް އެއީ ވެހިކަލްތައް ފާހަގަކުރުމުގައި ރަސްމީކޮށް ބޭނުންކުރާނެ ނިޝާނަކަށް ނުވާނެ ކަމަށެވެ.

މިފަދަ ކަމެއް ތައާރަފުކުރާތީ ބައެއް ފަރާތްތަކުން ވަނީ އެކަމަށް ފާޑު ވެސް ކިޔައިފަ އެވެ. އެގޮތުން މިއީ ދައުލަތަށް ފައިސާ ވައްދަން ޖަހާ މަޅިއެއް ކަމަށް ބުނެފައިވެ އެވެ.