ޚަބަރު / ނުކުޅެދުންތެރިކަން ހުންނަ މީހުން

ނުކުޅެދުންތެރިކަން ހުންނަ ކުދިންނަށް ހާއްސަ ކޭމްޕެއް ލ. އަތޮޅުގައި

އާކް އާއި ބިއުޓިފުލް އައިސް ޑައުން ސިންޑްރޯމް އިން ލ. ގަމުގައި ކުރިއަށްގެންދިޔަ ކޭމްޕުގައި އާކުގެ ފައުންޑިން މެމްބަރު އަދި ކުރީގެ ޖެންޑާ މިނިސްޓަރު ޒެނީޝާ ޒަކީ (ކ.2)، ކޭމްޕުގައި ބައިވެރިވި ކުއްޖަކާ ވާހަކަދައްކަވަނީ -- ފޮޓޯ: އާކް

ލަމްޔާ އަބްދުﷲ، މިހާރު

16 އޮކްޓޯބަރ 2019 - 15:44

2 comments

ނުކުޅެދުންތެރިކަން ހުންނަ ކުދިންނަށް ސްޕީޗް އެންޑް ހިއަރިން ކޭމްޕެއް ލ. އަތޮޅުގައި ބާއްވައިފި އެވެ.

މިއީ އެޑްވޮކޭޓިން ފޮ ދަ ރައިޓްސް އޮފް ޗިލްޑްރެން (އާކް) އާއި ބިއުޓިފުލް އައިސް ޑައުން ސިންޑްރޯމް (ބީއީޑީއެސް) ގުޅިގެން ލ. ގަމުގައި ކުރިއަށް ގެންދިޔަ ހަރަކާތެކެވެ. މިދިޔަ ހޮނިހިރު ދުވަހުން ފެށިގެން ހޯމަ ދުވަހުގެ ނިޔަލަށް ކުރިއަށް ގެންދިޔަ މި ކޭމްޕުގައި އެ އަތޮޅު ކުނަހަންދޫގެ އިތުރުން އިސްދުއާއި ފޮނަދޫ އަދި ގަމުގައި ދިރިއުޅޭ 25 ކުއްޖަކު ބައިވެރިވި އެވެ. މި ކޭމްޕު އަމާޒުކޮށްފައި ވަނީ އަޑުއެހުމުގަ އާއި ވާހަކަދެއްކުމުގައި އުނދަގޫތަކާ ދިމާވާ ކުދިންނަށެވެ.

އާކް އާއި ބިއުޓިފުލް އައިސް ޑައުން ސިންޑްރޯމް އިން ލ. ގަމުގައި ކުރިއަށްގެންދިޔަ ކޭމްޕުގައި ބައިވެރިވި ދަރިވަރެއް -- ފޮޓޯ: އާކް

މި ކޭމްޕުގެ ހަރަކާތްތައް ކުރިއަށް ގެންދިޔައީ ބޭރު ސްޕީޗް ތެރަޕިސްޓެއް ކަމަށް އާކް އިން ބުންޏެވެ. ކޭމްޕުގައި ބައިވެރިވި ކުދިން ބަލައި، އެ ކުދިން ބޭނުންވާ އެސެސްމެންޓުުތަކާއި ޓެސްޓުތައް ހަދައިދިނީ ވެސް އެ ތެރަޕިސްޓެވެ. މި ހަރަކާތްތައް ކުރިއަށް ގެންދިިޔައީ ގަން ރީޖަނަލް ހޮސްޕިޓަލުގަ އެވެ.

މީގެ އިތުރުން އެ ކުދިންނާ މުއާމަލާތުކުރުމުގައި ދިމާވާ ދަތިތަކާ ގުޅޭގޮތުން ހާއްސަ ސެޝަނެއް ވެސް އޭނާ ކުރިއަށް ގެންދިޔަ އެވެ. ވާހަކަދެއްކުމުގައި ރަނގަޅު އަޑުތައް ބޭނުންކުރުމުގެ މުހިއްމުކަމާއި މުއާމަލާތް ކުރުމުގައި ދިމާވާ ގޮންޖެހުންތައް މަދުކުރަން ކުރެވޭނެ ކަންތައްތައް ވެސް މި ސެޝަންގައި އޭނާ ކިޔައިދިން ކަމަށް އާކް އިން ބުންޏެވެ. ތިރީހަށް ވުރެ ގިނަ ޓީޗަރުން އާއި ބެލެނިވެރިން މި ސެޝަނުގައި ބައިވެރިވި އެވެ.