ބޮޑު އަލިފާނުގައި އިމާރާތްތަކަށް ލިބުނު ގެއްލުން 35 މިލިއަނަށް އަރާ: ޑިޒާސްޓާ

ކެމިކަލް ގުދަނެއްގައި ރޯވެގެން ހިނގި އަލިފާނުގެ ބޮޑު ހާދިސާއަށް ފަހު އެ ސަރަހައްދު ސާފު ކުރަނީ: އެ ހާދިސާގައި އިމާރާތްތަކަށް ލިބުނު ގެއްލުން 35 މިލިއަން ރުފިޔާއަށް އަރާ ކަމަށް އެންޑީއެމްއޭ އިން ބުނޭ -- މިހާރު ފޮޓޯ/ހުސައިން ވަހީދު

މުއިއްޒު އިބްރާހިމް، މިހާރު

01 ނޮވެމްބަރ 2019 - 18:28

5 comments

މިދިޔަ ސެޕްޓެމްބަރު މަހު މާލޭގައި ހިނގި އަލިފާނުގެ ބޮޑު ހާދިސާގައި އިމާރާތްތަކަށް ލިބުނު ގެއްލުމުގެ އަގު 35 މިލިއަން ރުފިޔާ އަށް އަރާ ކަމަށް ނޭޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން މިއަދު ބުނެފި އެވެ.

ކެމިކަލް ގުދަނެއްގައި ރޯވެ ހިނގި އަލިފާނުގެ އެ ހާދިސާގައި 14 ގެއަކާއި ހަ ގުދަނެއް ވަނީ އަނދައިފަ އެވެ. އެ ހާދިސާގައި އެކަކު މަރުވެ، 400 އަށް ވުރެ ގިނަ މީހުން ހާލުގައި ޖެހުނެވެ. އޭގެ ތެރެއިން މިހާރު އެންޑީއެމްއޭގެ ބެލުމުގެ ދަށުގައި ތިބީ 145 މީހެކެވެ.

އެންޑީއެމްއޭ އިން މިއަދު ބޭއްވި ނޫސްވެރިންގެ ބައްދަލުވުމެއްގައި އެންޑީއެމްއޭގެ ޑެޕިއުޓީ ސީއީއޯ އުމަރު ފިކުރީ ވިދާޅުވީ އެ ހާދިސާގައި އިމާރާތްތަކަށް ލިބުނު ގެއްލުން ބެލުމަށް ޕްލޭނިން މިނިސްޓްރީ އާއި ހައުސިން މިނިސްޓްރީ އާއި އެމްއެންޑީއެފްގެ އިންޖިނިއަރުން އެ ސަރަހައްދުގައި ހުރި 30 އިމާރާތެއްގެ އެސެސްމަންޓް ހެދި ކަމަށެވެ. މިދިޔަ ހަފުތާގައި ލިބުނު އެސެސްމަންޓްތަކުގެ ނަތީޖާ ދައްކާ ގޮތުން އެ އިމާރާތްތަކަށް ލިބުނު ގެއްލުމުގެ އަގު 35 މިލިއަން ރުފިޔާ އަށް ވުރެ އިތުރުވާނެ ކަމަށް އުމަރު ވިދާޅުވި އެވެ.

"އެ އިމާރަތްތަކީ ތަޅާލަން ޖެހޭނެ އިމާރާތެއްތޯ ނޫނީ މި އިމާރާތުގެ ކޮންކްރީޓްގައި މި އިމާރާތް ހިފަހައްޓާނެހާ ވަރު އެބަހުރިތޯ މިފަދަ ސުވާލުތަކެއް އުފެދިފައި ހުރި އިމާރާތްތަކެއް. ސްޓްރަކްޗަރަލް އެސެސްމަންޓް އަސްލު މިހާ ދިގުލައިގެން މި ދިޔައީ މި ސުވާލުތަކުގެ ޖަވާބު ހޯދަން އަޅުގަނޑުމެން މަސައްކަތް ކުރީމަ،" އުމަރު ވިދާޅުވި އެވެ.

އިމާރާތްތަކަށް ލިބުނު ގެއްލުމުގެ އިތުރުން އެތަންތަނުގައި ހިފާ ގެންގުޅުނު ޒަރޫރީ ތަކެއްޗަށް ލިބުނު ގެއްލުން މިލިއަނަކަށް ވުރެ މަތިވާނެތީ ޖުމްލަ ގެއްލުމުގެ އަގު 36 މިލިއަނަށް އަރާނެ ކަމަށް އޭނާ ވިދާޅުވި އެވެ.

މީގެ އިތުރުން ރޯވި އިމާރާތްތަކުގައި ކުއްޔަށް ދިރިއުޅުނު އާއިލާތަކަށް އެހެން ތަންތަނަށް ކުއްޔަށް ހިފަން ތިން މަހުގެ ކުލި ދައްކައިދޭން ސަރުކާރުން ނިންމި ނިންމުމާ ގުޅިގެން އެކަމަށް 1.1 މިލިއަން ރުފިޔާ ދޫކޮށްފައިވާ ކަމަށާއި އަދި ހާލުގައި ޖެހުނު މީހުންނަށް އިއްޔެގެ ނިޔަލަށް ކެއިން ބުއިމުގެ ޚަރަދަށް 1.5 މިލިއަން ރުފިޔާ ޚަރަދު ކޮށްފައިވާ ކަމަށް ވެސް އޭނާ ވިދާޅުވި އެވެ.

ދެން އޮންނާނީ ލިބުނު ގެއްލުންތަކަށް ބަލައި، އެކަމަށް ހުޅުވި ފަންޑަށް ލިބުނު ފައިސާ އެ އާއިލާތަކަށް ބެހުމުގެ މަސައްކަތް ކަމަށް އުމަރު ވިދާޅުވި އެވެ. އަދި އެ މަސައްކަތުގެ މައުލޫމާތު އަންނަ ހަފުތާގައި ހާމަކުރާނެ ކަމަށް އޭނާ ވިދާޅުވި އެވެ.

"ކޮންމެ އާއިލާއެއްގެ ވެސް ދިރިއުޅުމުގެ ފެންވަރު މި ހުންނަނީ އެކިވަރުގައި. އަޅުގަނޑުމެން އެއިން ކޮންމެ އާއިލާއެއްގެ ކޭސްއަކަށް ބަލައިގެން އެންމެ ރަނގަޅު ގޮތަކަށް ހަދައިދޭން މަސައްކަތް މި ކުރަނީ،" އުމަރު ވިދާޅުވި އެވެ.

ނޫސްވެރިންގެ ބައްދަލުވުމުގައި އެންޑީއެމްއޭގެ ސީއީއޯ ހިސާން ހަސަން ވިދާޅުވީ ހާލުގައި ޖެހުނު އެއްވެސް އާއިލާއެއް މަގުމަތި ކޮށްފައި ނުވާނެ ކަމަށާއި މިހާރު މަސައްކަތް ކުރަމުން ދަނީ އެ އާއިލާތަކާ ވާހަކަ ދައްކައިގެން އެހެން ތަންތަން ކުއްޔަށް ހިިފޭނެ މަގު ތަނަވަސް ކުރަން ކަމަށް އޭނާ ވިދާޅުވި އެވެ. އަދި ރޯވި ތަންތަނުގެ ވެރި ފަރާތްތަކާ ގުޅިގެން ވެސް ގިނަ މަސައްކަތްތަކެއް ކުރަން އެބަހުރި ކަމަށް އޭނާ ވިދާޅުވި އެވެ.

"އެއް ފަރާތުން ކުއްޔަށް ދީފައި އަދި އެ ފަރާތުން އެހެން ފަރާތްތަކަށް ކުއްޔަށް ދީފައި، ވަރަށް ބައިވަރު ބެކްގްރައުންޑް އިޝޫސްތައް އެބަހުރި މި އާއިލާތަކާއި އާއިލާތަކުގެ ވެރިންނާއި އަދި ކުއްޔަށް ދީފައިވާ ފަރާތްތަކާ ގުޅިގެން ހޯދަންޖެހޭ މައުލޫމާތުތައް،" ހިސާން ވިދާޅުވި އެވެ.

މާލޭގައި ހިނގި އަލިފާނުގެ އެންމެ ބޮޑު އެ ހާދިސާއަށް ފަހު ހުރިހާ ބާވަތެއްގެ ކެމިކަލް ގުދަންތައް ތިލަފުށްޓަށް ބަދަލު ކުރަން ސަރުކާރުން ވަނީ ނިންމައިފަ އެވެ.

އަލިފާނުގެ ހާދިސާ ކާރިސާ އެންޑީއެމްއޭ އިމާރާތްކުރުމުގެ ރައްކާތެރިކަން

5 ކޮމެންޓް, 16 ރިއެކްޝަންސް

The name is already taken The name is available. Register?

ކޮމެންޓުކުރުމުގެ ގައިޑްލައިންއަށް އެއްބަސްވަމެވެ.

ކޮމެންޓްތައް

އެންމެ ފަސް މަގުބޫލް

ރީތި މޫސަ

02 November 2019

މިވަރުކަމެއް ޤައުމުގަހިނގުމުން ގެއްލުންވިމީހުނަށް ސަރުކާރުން އެހީވެދިނުންރަނގަޅު ދެން ތަހްޤީގުނިމުނު ދުވަހަކުން ޒިންމާވާންޖެހޭ ފަރާތެއްވާނަމަ ސަރުކާރަށް ބަދަލު ނެގެމުން ނިމުނީ

The name is already taken The name is available. Register?

ކޮމެންޓުކުރުމުގެ ގައިޑްލައިންއަށް އެއްބަސްވަމެވެ.

ހަސަން ސަޢީދު

01 November 2019

ޔާމީންގެ ވެރިކަުގައި 2016 ގައި އިނޮމިކް މިނިސްޓްރީއިން ޒުވާނުންނަށް ދޫކުރި ގެޓްސެޓް ލޯނުވެސް އިތުރަށް 35 މިލިއަން ރުފިޔާ ލޫޓުވާލި ކަމަށްވަނީ، އެމީހުން އަތުން މިފައިސާ ހޯދާފަ މާލޭގެ އަލިފާނުގެ ހާދިސާ ގައި ގެއްލުން ލިބުނު މީހުންނަށް ދިނުން ބުއްދިވެރި.

The name is already taken The name is available. Register?

ކޮމެންޓުކުރުމުގެ ގައިޑްލައިންއަށް އެއްބަސްވަމެވެ.

ރަދީފުގެދަރި ކުމާރު

01 November 2019

މި ގެއްލުމުގެ ޒިންމާ ނަގާނީ ކާކުބާ؟ ކެމިކަލު ގުދަނުގެ ވެރިފަރާތްތަ؟ އެއިމާރާއްތަކުގައި އުޅޭ މީހުންތަ؟ ސަރުކާރުތަ؟ ނޫނީ ހަމައެކަކުވެސް ޒިންމާއެއްނުނަގާނެތަ؟........ މިކަން ސާފުވާން ބޭނުން.

The name is already taken The name is available. Register?

ކޮމެންޓުކުރުމުގެ ގައިޑްލައިންއަށް އެއްބަސްވަމެވެ.

ސުބުތީ

01 November 2019

ފަންޑުން ދިނަސް އޯކޭ 35 މިލިއަން. ދައުލަތުން ދީގެން ނުވާނެ.

The name is already taken The name is available. Register?

ކޮމެންޓުކުރުމުގެ ގައިޑްލައިންއަށް އެއްބަސްވަމެވެ.

އިންޓަލެކްޓު

01 November 2019

ހައުސިން މިނިސްޓްރީއިން %25 ސިޓީ ކައުންސިލުން %25 އެމް.އެން.ޑީ.އެޕް އިން %25 ކެމިކަލް ކުންފުނިން %25 ލައިގެން ގެއްލުންވި މީހުންނަށް ދީ. 4 ފަރާތް ވެސް ވަނީ އިހުމާލުވެފަ. ހައުސިން މިނިސްޓްރީއިން ރަގަޅު ތަނެއް ނުދެއްކުނު. ސިޓީ ކައުންސިލުން އާންމުންގެ ތެރޭ ގުދަންކުރަން ހުއްދަ ދިނީ. އެމް.އެން.ޑީ.އެޕް އިން ގުދަންބަލާފަ އޯކޭ ދީފަ. މީހުން ދިރިއުޅޭ ތަނެއްގަ ކެމިކަލް ބެހެއްޓުމަކީ ރައްކާތެރިކަމެއް ނޫންކަން އެންމެ ރަގަޅަށް އިގޭނީ ކެމިކަލް ވިއްކާ މީހުންނަށް.