ކާރިސާތަކުން ލިބޭ ގެއްލުންތައް ރިޕޯޓު ކުރުމާއި ތަފާސްހިސާބު ބެލެހެއްޓުން ޑިޖިޓަލްކޮށް، ނޭޝަނަލް ޑިޒާސްޓާ މެނޭޖްމަންޓު އޮތޯރިޓީން (އެންޑީއެމްއޭ އިން ޑާލާ ނަމުގައި ޕްލެޓުފޯމެއް މިއަދު އިފުތިތާހުކޮށްފި އެވެ.
އެ ރަސްމިއްޔާތުގައި ޑާލާ ޕްލެޓްފޯމް އިފުތިތާހު ކޮށްދެއްވީ ހޯމްލޭންޑް ސެކިއުރިޓީ އެންޑް ޓެކްނޯލޮޖީ މިނިސްޓަރު އަލީ އިހުސާން އެވެ.
އެންޑީއެމްއޭއިން ބުނީ "ޑާލާ" ޕްލެޓްފޯމަކީ ކާރިސާތަކުގައި ލިބޭ ގެއްލުންތައް ރިފޯޓުކުރުން ޑިޖިޓަލްކޮށް، ކާރިސާތަކާ ގުޅޭ ރިޕޯޓްތައް ތައްޔާރު ކުރުމާއި ހެކީގެ މައްޗަށް ބިނާކޮށް ނިންމުންތައް ނިންމުމުގެ ނިޒާމު ހަރުދަނާ ކުރުމަށް ފަރުމާކޮށްފައިވާ ގައުމީ ޑިޖިޓަލް ޕްލެޓްފޯމެއް ކަމަށެވެ.
"ޑާލާ"ގެ ފަސޭހަތައް:
- ކާރިސާތަކުގެ ގެއްލުން ވަޒަން ކުރުމުގެ މަސައްކަތް މިހާތަނަށް ކުރަމުން އައީ މެނުއަލްކޮށް ކަމަށް ވިޔަސް އާ ޕްލެޓްފޯމާ އެކު، ރައްކާތެރި އަދި ގުޅިފައިވާ ޑިޖިޓަލް ނިޒާމަކަށް ބަދަލު ވާނެ.
- ކާރިސާތަކުގެ މައުލޫމާތު ކަމާގުޅޭ މުއައްސަސާތަކަށް އޮންލައިންކޮށް ރިޕޯޓު ކުރެވޭނެ.
- ލިބުނު ގެއްލުންތަކުގެ ހިސާބުތައް އޮޓޮމެޓިކުން ތައްޔާރު ކުރެވޭނެ.
- ގެއްލުން ވަޒަން ކުރުމުގެ ސައްހަކަން އިތުރުވެ އަވަސް ވާނެ.
- ކާރިސާގެ ބާވަތްތަކާއި ގެއްލުން ލިބުނު ކަމަށް ރިޕޯޓުކުރި ދާއިރާ އާއި ސަރަހައްދާއި އާބާދީގެ ގިންތިތަކާއި މުދަލުގެ ބާވަތްތަކަށް ބަލައި ވަކިވަކިން މައުލޫމާތު އެއްކުރުމުގެ ގާބިލުކަން ލިބިފައިވާނެ.
- ކާރިސާތަކުގެ އަސަރުތައް ފުންކޮށް ދެނެގަނެ، އެހީތެރިކަން ބޭނުންވާ ދާއިރާތަކަށް އަމާޒުކޮށްގެން ފިޔަވަޅު އެޅުމަށާއި ރޭވުންތެރިކަން އިތުރުކުރުމާއި އަދި ހަމަހަމަކަމާއެކު، އިޔާދަ ކުރުމުގެ މަސައްކަތްތައް ކުރިއަށް ގެންދިއުމަށް މަގުފަހިވޭ.
މި ޕްލެޓުފޯމާ ގުޅުވައި އެންޑީއެމްއޭގެ ސީއީއޯ ހިސާން ހަސަން ވިދާޅުވީ، އެއީ ހަމައެކަނި ޑިޖިޓަލް ނިޒާމެއް ނޫން ކަމަށާއި ސަރުކާރުގެ "ޑިޖިޓަލް މޯލްޑިވްސް 2.0" ސިޔާސަތަށް އޮތް އިތުބާރު ރަމްޒު ކޮށްދޭ ޕްލެޓްފޯމެއް ކަމަށެވެ.
އެންޑީއެމްއޭއިން ބުނި ގޮތުގައި، ޑާލާ ޕްލެޓުފޯމު ފަރުމާކުރުމުގެ މަސައްކަތްކުރީ ޔޫއެންޑީޕީގެ ފަންޑިން ވިންޑޯ މެދުވެރިކޮށް ޑެންމާކާއި ލަގްޒެމްބާގާއި ދެކުނު ކޮރެއާ ސަރުކާރުގެ އެހީގަ އެވެ.